1-6 Sarai.ana, wanch thum Abram.antamana, puk ke'anang iiy-iiy. Sarai.antana, wanch aak Egypt.am anpalan wamp work iiy-iiy nungant, namp nungantiya, Hagar.

Anpalana, nil Sarai.ana, thaw nungant, Abram.antan, “Nintana, wanch Hagar.ana, maayān nunang, nil yipam puk kalow, puk ngath yipam emathāng.”

Yaa, nil Abram.angana, wanch Hagar.ana maay nunang, a' nil iimpanang ngul iiy. / Nil iimpanangan iiy-a, Hagar.ana, kemp puu' ulpant, ulp-ulpanang ngul iiy-iiy Sarai.ant, puth Sarai.angana, puk ke'am uw, nanpalan.

Nil Sarai.ana, thaw nungant, Abram.antan, “Nil Hagar.ana, ulp-ulpanang ngul iiy-iiy ngathara! nil puth puk uw nungkaram. Yaa, nint ngathar way yumpan ey?”

Abram.ana, puth thaw nungant, Sarai.antan, “Nint puth kaangk nath wanttakan ngaantam-ngeeyangana, nint yumpān nungant.” Nil Sarai.ana man kul wampant Hagar.antan, a' nil Hagar.ana, appench ngul, aak waykayakan mo'.

7-16 Nil Hagar.ana, iiy-iiy, a' ngak mee'-yoon ngul uw, nil nyiin-nyiin ngul, ngak thinth. A' nil ngaantiyongk God.antaman-a, thath nunang, a' nil thawant, “Ayyang, Hagar-ang, nint wanttinpal wampana? A' nint in wanttinak ngul iiyāna?” Nil Hagar.an thaw nungant, “Ngay ya' appenchang nungantam, Sarai.antama!” niliy thaw nungant, ngaantiyongkantan.

Nil ngaantiyongkan thaw nungant, “Nint koyam iiyān nungant Sarai.antan, a' nintiya, wik ngeeyān nunang thampa. Puth nint in ngeeya! Kampan nungkaram yot ngul weenayn. Way nungkaramana, piip God.angan kan thathan. Nint puk wuut many ngul kalān, namp nungantiya, thee'āna Ishmael. Nil ka' man kulliy anangan iiyantana, nil puk nungkaramana, yimanangan iiyow, kul yump-yumpow thant. A' nil kampan nungantam al-alantanga, thinth ngul wunow, mal kaaw angman wun-wunow.”

A' nil Hagar.angana, God.an min waa' nunang, nil thaw, “Nil God.angan-a, thath-thathan ngayanga! A' ngay ka' piip God thathang nunang yimanangan, puth ngay man-yatham yippak iiy-iiyang ey!” A' nil koyam ngul iiy, a' puk wuut many nungantaman-a, kan-ngul mee'-penchant. Nil piip-kunchana, Abram.ana, kaap 86 ngul ween-a, an-aniyangan puk manyan aak-ngeey nungant, namp Ishmael.an thee'in nungant.