1-8 Anpalaniya, /nil Abram.an kaap 99.angan uwan-a, God.ana, thaw nungant, “Ngay God inan pi'an ma'-thayan thamp. Nint ngayanga, wik ngeey-ngeeyāna! minam iiy-iiyan mee' ngatharangan. Puth in ngeeya! Ngay kan-kanam waa'ang wik inan nungk wik ngulakam kaa'-ngakang nintang. Kaa'-ngakang nintanga, puk nungkaramaka, a' puk thanttamak, thanana ngul-ngulakam. Than thaa'-wantanam ngul weenayn; nint wuut mangk thanttam thaa'-wantanamtam ngul weenan, nint puth kaa'-ngeecham,” nil God.an thaw Abram.antan. / Nil kanan thaw nungant-a, nil Abram.ana kuchek pek thuch nungant, thaa'-kuump nunang.

A' nil God.an putham thawant, “Yaa, wik ngatharamaniya, kan-kanam wunow murkanim, nint puth wuut mangk thanttam thaa'-wantanamantam ngul weenān. Puth in thamp ngeeya! Namp nungkaramaniya, Abram aa? Yaa, namp nungkar inan nyiingkanam ngul thee'āng, namp Abraham ngul nungka, nint puth piip wuut yotamanta. Puth kampan nungkaram anangan yot thaa'-wantanam ngul weenayn. Pam kampan nungkaram wiy anangana, pam pi'an ngul weenayn. / Wik nintang inan kaa'ngakang-a, inan-a, wik yimanangan wunow murkanim ngulakam thanta, kampan nungkaram al-alantakan, ka' nungkar inan thawang, ngay puth God nungkarama, a' puth God thanttam thamp. Ngay aak Canaan inana, nungk thee'āng, a' putha, kampan nungkaramak tham thee'āng aak inan, ngay puth God niiyantam.

9-16 Niiyaniya, wik ngatharam inan ngeey-ngeeyāna! Ninta, kampan nungkaram anangana, putha, pam nungkarangan work iiy-iiyantana, kemp pe'an umpanam anman yot iiyāna! Nil puk wuut manyana, kinch eight.ang ngulana, niiy paththam erkam pe'an umpān nunang. / Niiy kemp pe'an umpanaman thath-thathan niiyantakaman-a, yaa, niiyana wik ngatharaman ngaantam-ngeeyān, ngayan wik kaa'ngakang niiyang. / Nil pam wee'-nathan pe'an ke' umpanaman iiy-iiyiy-a, nil paththam niiyangana too wantow ngul aak um puyam, aak ingana, niiyantangana, ke'-ngul wuniy.

Wanch thum nungkaram nampa, Sarai.ana, ya' ngul, ngay namp nungantiya nyiingkanam thee'āng, Sarah wunow ngul. Nil wanch nungkaramangana, puk wuut many ngul kalow nungka, a' nil wanchinth mangk kampan niparam al-alantaman ngul iiyow, puth kampan niparam anangan yot thaa'-wantanam ngul weenayn,” nil Piip God.an yimanangan thaw nungant Abraham.antan.

17-22 Puth Abraham.angana, ngaantam-ngeey pulantakam, pulan putha, wuut wanchinth ngul, pukan ke'-ngul uwiypul, a' thengk ngul. Nil God.antan thaw, “Wanch ngatharamangan puk want-wanttak'ana? uwowa? nil puth wanchinth ngula! Ayyang, nint ngaantam-ngeeyān Ishmael.ana.”

Nil God.an thawant, “An ya'a, puth Sarah.anganiya, nil puk wuut many ngul kalow kaap thonan, nintiya namp nungantiy thee'ān Isaac. / Wik nintangan kaa'ngakang-a, an nengk nungkaramakan thamp. Puth Ishmael.antana, ngay min anman iiy-iiyāng nungant. Nil ngulana, piipiy ngul weenow, a' kampan nungantam anangana, yot thaa'-wantanam weenayn. Pam nungantam wiy anangana, pam pi'an ngul weenayn,” thaw Piip God.an. / Nil kanan thawant-a, Abraham.anta, nil keny ngul mat.

23-27 Yaa, kinch thonamangana, nil Abraham.angan pam anangana, puk wuut anangan ma'mangkam pe'an ump thanang, wik thayan God.antamana.