1-8 / Nil Abraham.an yippak angamanan wun-wun aak Mamre.angan-a, nil Godaniya, inpal kenyan uk nungant. Wik kathana, inan nil Piip God.an uk nungant, aak angman.

Nil Abraham.ana, tent nungantamang thaa'angan nyiin-nyiin, a' nil pam ko'alam thath thanang, a' nil yoon pent thant, umang wak thanang. A' thaw thant, “Awey, pal iiyiy a! yuk pek-pekam ingan nyiināna! Ngay ngaka, a' may thamp uwāng niiyant. Niiy kan tha' pungāna! a' may ngul mungkān. Amanamaniya, niiy kan-ngul iiyān.”

Yaa, Abraham.ana, erkam paththam pek ngoonch tent.akan, a' thaw nungant Sarah.antana, “Ayyang! Nint may erkam mamāna, a' kiingkān thampa!”

Yaa, amanamana, Abraham.ana, kamp mo', min puk nyiingkanaman-a, mulath. / Wanch work pulantan iiy-iiy-a, nila may minan kiingk-kiingk. A' Abraham.angana, thee' thant, may min menchan anangan mungkayn pam ko'alam al-alangan. Thanwey mayan mungk-mungkin nil Abrahamana, angman thanttang than-than yuk pek-pekam angman.

9-15 A' than thawin nungant, “Wanch thum nungkaram wanttin e? Sarah.an e?” Nil Abraham.an thaw thant, “Nil tent.ang nan pek nyiin.”

A' nil pam thonamana, Lord God.an wamp pam kucham al-alantangan. Nilan thaw nungant, Abraham.antan, “Ayyang, in ngeeya! Kaap thonangana, / kep nine.angan kanan wantow-a, ngay palam wampāng, a' Sarah.angana, puk wuut many kalow.”

/ Nil Sarah.angan wik inangan ngeeya, nil itangam thengk-thengk, tent.ang angam pekan. Nil nungantakaman thaw, “Ngaya, pam ngatharamanga, ngan wuut wanchinth ngul weenana, ngan puth want-wanttak puk manyan uwin ee?”

A' nil Lord God.ana, thaw nungant Abraham.antan, “Sarah.ana ngeenam thengk-thengkan ee? Ngay Lord God.ang ngayam thonamang ma'mangkam yumpinga. / Kaangk ngayan yumpāng-a, ngay yumping. Nil Sarah.angana, puk wuut many ngul kalow kaap thonana.” Sarah.ana, winynyang mo' a' thaw, “Ngay ke'am thengkangana.” Puth Lord God.ana, thaw nungant, “Nint kan-kanam thengkana!”

16-33 Anpalana, than pam ko'alam anangana, kan-ngul iiyin aak Sodom.akan. Nil Abraham.ana, angman iiy thanttang-a, monkan kuchow thanang woyan ompamang. A' nil Lord God.an thaw nungant, “Ayyang, kan in ngeeya! Ngay thath-thathang pam wanch aak Sodom amanamana, putha, aak Gomorrah amanaman than pam wanch way-wayam iiyantana. Ngay pek ukānga, thathāng thanang. Than way-wayama nathiya, ngay wayathāng thanang,” nil Lord God.an thaw.

/ Piim kucham kanan iiy-iiypul woyan wakanangan aak um Sodom.akan-a, Abraham.ana engk nungant, Lord God.antan, “Nint ngul pam wanch min anangan thamp wayathān ey? pam wanch way al-alantangan karpam ey? Than nath 50 pam wanch min-miniy nan wuntana, nint aak thampan wayathān ey? Nintiya, Lord God paththam wuut pi'an epa, a' nintan ep pam wanch aak imanaman umang thanathan yot um yompanam, ngul nint wanttak ke' ngangk mamin thanang ey? pam wanch wiy min anangan iiyantan nungk ey? Nint puth minam ke' iiyin thant ey?”

Nil puth Lord God.an thawa, “Yaa, / pam wanch 50 nath min-miniyan wuntan-a, ngay puth aakan ke' wayathāng.”

Abraham.an putham engk piip God.antan, “Pam wanch 50 nath ya' yaaka', / puth pam wanch 45 min-miniyanwey wuntan-a, ngul nint wayathān thanang ey?”

Nil Piip God.an thawa, “Yaa, / pam wanch 45 min-miniyanwey wuntan-a, ngay aak ke' wayathing ya'a.”

Abraham.ana putham thawant Piip God.antan, “Pam wanch 45 nath ya' yaaka', / puth pam wanch 40 min-miniyanwey wuntan-a, nint ngul wayathān aakan ey?”

Nil Piip God.an thaw nungant Abraham.antan, “ / Pam wanch 40 min-miniy'anwey wuntan-a, ngay aak ke' wayathing ya'a.”

Abraham.ana putham engkant Piip God.antan, “Pam wanch 40 nath ya' yaaka', / puth pam wanch 30 min-miniyanwey wuntan-a, nint ngul wayathan thanang ey?” Nil puth Lord God.an thaw, “Ya' anman, ngay ke' wayathāng thanang.”

Nil Abraham.ana putham ma'-thonam ngul engkant Piip God.antan, “Pam wanch 30 nath ya' yaaka' / puth pam wanch 20 min-miniy aakanwey wuntan-a, ngul nint wayathān thanang ey?” Nil puth Lord God.ana, thaw nungant, “Ya' anman, ngay ke' wayathing thananga.”

Nil Abraham.ana, ma'-thonam ngul thawant Piip Godantan, “Nint ke' man kul wampān ngath ey? Ngay inan ma'-thonam ngul engkāng nungk ey? Pam wanch 20 nath ya' yaaka' / puth pam wanch 10 min-miniyanwey wuntan-a, nint ngul wanttak yumpāna? nint ngul aak ma'-mangkaman wayathān ey?” Nil Lord God.an thaw nungant, “Ya'a, / pam wanch 10 min-miniywey an wuntan-a, ngay aak ma'-mangkamana ke' wayathānga,” Lord God.an thaw.

/ Pul wik kanan thawpul-a, nil God.an kan-ngul iiy, a' nil Abraham.ana, kan-ngul iiy aak nungantamakan. Pam kucham ngaantiyongk pul anangana, pul an-anman iiypul, aak Sodom.akan.