1-3 Iiypul aa, wamppul aak Sodom angan, aak ngaa' kanan chint. A' nil Lot.ana, thaa' gate thinth angman nyiin-nyiin, aak Sodom.akan ngoonchayn. A' nilana, ngaantiyongk kucham anangana, thath pulang a' umang iiy pulant, a' wikam thaw pulant, “Ayyang, nipaley! Nil pal iiyow aawuch ngatharamak, a' ngatharang thamp paanthowa!”

“Ya'a, ngan yoon wunāna!” puth pulan thawpula.

Puth nil Lot.ana, thaa'-ngoontan thaw-thaw pulant aawuchang pek ngoonchowpul nungantamangana, putha, mayan mungkowpul thamp, Yaa, pul nungantang iiypul ngul.

4-11 /Pul ngaantiyongkan ke' weepan wuniypul-a, than pam yot anangana, aak Sodom anpalan, pech-pechin nungant. Lot alantan, “Pul pam kucham anangan wanttin aa? Pulangan pal pentathān nganta! ngan yipmam wayathān pulanga! Woyimply kee'āna!” Nil pam Lot.an-, yoon pent aawuchaman, a' thaa'ana, ngath ngul. Nilan thaw thant, “Niiy way-wayaman ke' iiyān a! Niiy puth puk nengk wanch koman kucham ngatharam inangan kalāna, niiy puth pam kucham inangana, ke' wayathin pulanga.”

A' piim yot aak Sodom anpalana, thawin nungant, “Nint in nath-pal aak kecham wampana, nint ngul moom pi'an iiyān ngant ey? Ngan inana way yumpān nungkara.” A' than Lot.an tha'-tha'in nunang, a' poo poo thaa'an tha'-tha'in, ke' thapathiythan, ya'angam. Puth ngaantiyongk kucham al-alangana Lot'an ma' punth maman, palam wichpul nunang pek aawuchakan, a' thaa'ana, koyamana, ngathpul. Pul mee' ko'anch yumppul thanang piim yotam anangan ke' yipmam aawuch thaa'an uwayn.

12-14 Pul ngaantiyongk kucham anangana, thawpul nungant Lot.antan, “Nil Piip God.angana kan thath-thathan thanang pam wanch way-wayam paththaman iiyantan. Ngan aak inan wayathān thanttam. Nintiya kampan nungkaram anangana, kan kalān thanang aak thonak, niiy aak inan too wantāna!”

Nil Lot paththamana erkam iiy pam kucham al-alantan puk nengk wanch kucham anangan maayowpulana, pulant iiy, an puth ya'angam thaw pulant, pulana, kaangk ke' wik nungantaman ngeeyowpul nunang.

15-22 Mee' ngutangamana, ngaantiyongk kuchamangana, thaachpul nunang aakan wantow, pulana, puth-putham thaa'-thayanam thawpul nungant Lot.antan, “Niiy erkam paththam inman iiyāna!” Lot.an-a, angman miniy ween. Pul ngaantiyongk kucham al-alangana, ma' maman yoon pentathpul thanang, than inangan: Lota, puth wanch thum nungantama, a' putha puk nengk wanch koman kucham Lot.antaman, thanang anman yoonan pentathpul. Pul ngaantiyongk kucham anangan thawpul thant, “Puuy puuy mo'āna! Erkam mo'āna! Yoykaka! Niiy aak koyaman ke'-ngul thathān a! Niiy puth ngul uthamāna!” Nil Lot.an thaw pulant, “Ngay puth in winynyang mo'ānga, yoykan puth kecha! Ngay ompamang ngul uthamānga! Ngan ke' iiyin ey? aak thinthak ey? aak Zoar.akan ey?” Pul ngaantiyongk kucham anangan thawpul nungant, “Ee'a. Puth niiy puy othath iiyāna!”

23-29 / Kinch kanaman mat-a, Lot.ana an-aniyangan wamp aak Zoar angan. Nil piip God.angana, thum karkan yump, thum munth karkan anangan keek-keekin angman aak Sodom.angana putha, Gomorrah.ang angman, ka' ngakan uk-ukan inpal kenyana, yimanangan thum munth karkan anangan uk-ukin, aak Sodom.angana, puth Gomorrah.angana, aak um-yompanaman putha, pam wanch anangan piip God.angan wayath thanang ma'mangkam. Wanch thum Lot.antamana, mee' koyam thatha, an paththam nil utham angman thananang, ka' kunttow thayan ngul ween. Puth ngaantiyongk kucham anangana, kan thawpul nungant mee' koyaman ke' thathow, nil wik ke'am ngeey pulantama.

Kinch an-aniyangana, Abraham.ana um-kaaw than-than aak Sodom.aka, a' Gomorrah.akan thath-thath, a' nil ngeen thonakam thath a? yuw pi'an ngotan ween, thok amanaman aawuch thakan pench-penchin puth pam wanch puk anangan thamp pench-penchin, ke'-paal thok wuut pi'anan nath kenyakam mat.

30-38 Ngul-ngulana, Lot.ana winynyang ngul mo', kaangk ke' ngul wunow aak Zoar.angan, pam nil anman Lota, putha puk nengk wanch koman kucham anangan nungantam, thanana, aak yoykak iiyin ngul, kunttow pek-pekam yipam wunayn.

Anpalana, puk wanch kaa'-ngeechamana, thaw nungant wiil-kunchakan, “Aak inan pam ya' paththam, ngalangan maayiypul. Ngal piip ngalantamaka, ngak way thee'āl nungant mungkow, ngalana, angman wunāl nungantang, yipam ngal puk many uwāl nungantam. Aak yimanangan ke' wuniy ngalant ey? piip ngalantam ilantamana, kampan ya'-ya'am ngul wuna! Ngal puk many nungantam yipam kalāla!” puk nengk wanch kucham nungantam anangan thawpul.

Ma' kucham aak ngutangana, ngak wayan thee'pul nungant mungkowan, pulana angman wunpul piip pulantamantang, than karpam wun-wunin ngul. Piip pulantamana, ke' puth min-minan ngaantam-ngeeyiy kuchek waap nungantamangana, puth ngak wayan mungk, amanaman, kuchekan weent-weentant, ke'paal nilana, ngoongk-ngoongkam puk nengk wanch kucham nungantam anangan pi'-pi' pulang, ka' wanch thum nungantam kucham yimanangan karp pi'-pi' pulang. / Kep kanan wamp pulant-a, / puk manyan mee'-penchow pulantan-a, nil puk nengk nungantamang wanch kaa'-ngeechamangana, puk many wuut kal, namp nungantiy thee'a, Moab, nil wiil-kunchangana, puk wuut many thamp kal, namp nungantiy thee'a Benammi. Thanan yimanang pam wanch kampan pulantaman Moab.antama, putha Benammi alantaman kampan pulantaman yot ngul weemin.