1-7 Anpalaniya, than Abraham wee'anangana, aak Mamre.an wantin ngul, a' yiip iiyin aak thonak, aak namp alantaniya, Gerar. Nil Abraham.ana, winynyang mo' pam al-alantaman, aak an punychany, nilan puth thaw thant, “Wanch inana, Sarah.an, wiil many ngatharama.” Puth nil Abimelech.ana, pam wuut pi'an king aak anan wak-waka, nil Sarah.an kal nunang aawuch pi'an nungantamakan. Aak ngutang ngulana, piip God.ana pithangan thaw nungant, “Nintiya wanch meek pam thonantam kumpathana, puth nintiya uthamāna.” Puth Abimelech.angana, wanch Sarah anana, kemp ke' mam nunang, ya' anman. Nil puth Abimelech.an thaw nungant Piip God.antana, “Ayyang, ngul nint ngayanga, pam wanch ngatharam yot inangan mulathān nganang ey? Nil puth Abraham.angan waa' ngathar, 'Wanch anana, wiil ngatharama, nil puth Sarah.an thaw ngath, 'Ee'a, in wuny ngatharama’ Ngay ngaantam-ngeeyang ka' kan-kanam Abraham.antam wiila, ngay ke'paal thaa'-palathang nunang aawuch ngatharamakan, ngay puth ngoongk-ngoongkama nil wanch thum nungantamana.”

Nil piip God.an thaw nungant, “Ngay inan meemiya, wiy ngayan thawang nungk wanch Sarah.an ke' pi'ān nunang, puth wanch thum Abraham.antam naniya. Nint wanch Sarah nanana, koyam kuchān nungant pam thum nungantamant, Abraham.antana. Nil pam inmana, work iiy-iiyan ngathar, wik ngatharam kal-kalan. Nil thamp ngul mee'-wuthanamow nungkar, nint yipam ke' uthamān,” nil God.an thaw nungant, Abimelech.antan.

8-18 Mee'-ngutangamana, ngaa' thon ngulana, Abimelech alangana, wik anangan waa' ngul pam nungantamakan, thaniya, puth ngula, winynyang mo'in. Nil puth Abimelech.angana, Abraham.ana, pal ump nunang, a' thaw nungant, “Ngan puth way ke'am yumpan nungkara, puth nint ngayang mook-mathan ey?” Abraham.an thaw nungant, “Niiy puth God.an ke'am yippak thiichan nunanga, ngay wiy winynyang mo'ang niiyantam, niiy puth ngul mulathān ngayang, a' wanch ngatharaman Sarah.an-a, nangam pi'in nunang. Ngayana, ke'paal waa'ang niiyant, Sarahana ka' wiil ngatharam, ngay yimanangan thawang niiyantana. In puth kan-kanam ngan Sarah.angan piip thonamam, puth kaath kuchamam. Ngay puth Sarah.ana, wanch ngatharak ngentangan nunang ngul.”

A' nil Abimelech.angana, Sarah.an koyam kuch nunang Abraham.antan. Putha, pam wiy anangan thee' nungant, work.an iiy-iiyayn nungantan, a' min sheepa, min bullocks thakan yot thee' nungant. Nil Abimelech.an thaw nungant Abraham.antan, “Aak ngatharam inan thatha! / Kaangk nint wanttingan wunan-a, nint wunān aak inganiya,” nilan yimanangan thaw nungant.

Nil piip God.angana, keenkama, ma'-kee'-wunp wanch nungantam anangan Abimelech.antaman, yipam puk manyiyana, ke' uw-uwayn. Nil puth Abraham.ana, mee'-wuthanam piip God.antan yipam ma'-aathow thanang Abimelech.angan, puk many yipam uwayn wanch nungantam al-alangan.