1-8 / Nil Abraham.an kaap 100.angan uwan-a, wanch nungantam alangana, puk wuut many kal, puth piip God.an keenkamana, thaw nungant Abraham.antan, wanch nungantam alangan puk wuut manyan ngul-ngulan uwowa. Yaa, / puk manyana kanam aak-ngeeyant-a, piip-kunch alangana, namp inan thee'ant Isaac. / Puk wuut many inman Isaac.an kinch eightang kanan uwan-a, piip-kunch Abraham alangana pe'an umpan, puk nungantaman.

Nil wanch Sarah.an-a, ngangk min ngul iiy puk many Isaac alantamana, nil puth thaw, “Nil Piip God.angana, ngangk min yump ngayanga! / Pam wanch yotangan wik inan ngeeyayna ngay puk wuut manyan kalang-a, an ngangk min wunow thanta! / Puth nungkwoy ngan pam thum ngatharamang wuut wanchinth kath ngulan iiyanan-a, ngay puk wuut many kalangana!” nil Sarah.an wik inangan thaw.

/ Nil puk manyan em-em-aa, a' ngulana, Sarah.angan ke'-ngulan thuut aath-aathan, Isaac.ana, nil puk thaa'-paapiy ya'-ngulana, aak an-anyangana, Abraham.angana, may wuut pi'anan yump, puk many Isaac alantaman.

9-14 / Than may pi'anan mungk-mungkin-a, Isaac.antamana, nil Sarah.angana thath nunang, Ishmael.angan puk Hagar.antamangan man-aath-aath nunang Isaac.an, nil Sarah.ana, thaw nungant, Abraham.antan, “Ayyang, nint thaw.ān nungant Hagarantan nath kan iiyowpula! puk nungantam alangana! nil Ishmael.angana ke' yipam uwow way min nungkaram nintan uthamān.”

/ Nil Abraham.angan wik inan ngeey-a, ngangk way wun nungant. Puth Piip God.an thaw nungant Abraham.antan, “Nint ke' ngangk way wunān pulantam Hagar.anga, a' putha, Ishmael.antamana. An puth Ishmael.ana, puk kaa'-ngeecham nungkaram thampa, nungantam anpalana kampan yot thaa'-wantanam ngul weenayn. Puth puk many Isaac.ana, nil puk anman ngayan nath-palman kaa'ngakang nintang, ka'athaman thawang nungk puk wuut ngulan wampow nungk, a' kampan nungkaram anangana, yot thaa'-wantanam yimanangan ngul weenayn,” nil piip God.an thaw nungant Abraham.antan.

Mee'-ngutangama, ngaa' thon ngulana, Abraham.angana, maya, puth ngak thamp thee'ant Hagar.ant, yipam kalow pulantakaman Ishmael.ang a' thawant, “Nip kan iiyowa!” Pul puk nungantamangana, aak anana wantpul, a' kan-ngul iiypul. Puth pulana, um pal puuy iiypul, aak kal-kalpulweya, pulan puth aak meemiy ya'a, ke'paal pul ma' kaath pukana, aak thonang wamppul, aak ka' waykay yimanangan, yuk ke'anang, aak namp alantaniya, Beersheba.

15-21 Ngul-ngulana, ngakana kan-ngul minch pulantam, ma' kaath pukantam ya'-ngul. Hagar.anganiya, puk nungantam Ishmael.ana, yuk many ngoyngk pek-pekam nyiinathan, a' kaath-kunchana, aak nath yaan iiya, nilana nyiin, a' peey-peey othamayan, “Ngay kaangk ke' thathāng puk ngatharaman mee' ngatharangan uthamowa!” nil kaath-kunchan thaw nungantakaman.

Vt Puth nil ngaantiyongkana, wamp, a' thaw nungant Hagar.antan, “Ayyang, nint ke' winynyangan mo'āna! Nil puth Piip God.angana, kan ngeey nunang, puk nungkaram Ishmael.an peey-peeyan. Nint iiyāna! A' puk manyana maayān nunang, nil ke' uthamiya, ya'a, an man-yatham iiyowa, a' kampan nungantamana, yot thaa'-wantanam ngul weenayn.” A' nil Piip God.angana, ngak mee'-yoon meenath nungant Hagar.antan.

Nilan iiy, ngakana, uw, a' puk nungantaman aath nunang ngakan. Yaa, nil Ishmael.ana, kemp minam ngul iiy, ke'am utham, ya'a.

Pula, aak Paran.akan iiypul, angman ngul wunpul, aak ka' waykay yimanangan, puth ngak ke'anang aak. Nil Ishmael.ana, minam em-em pamakam, a' wanch ngul maay, aak amanaman Egypt.am anpalan.

22-26 Anpalaniya, Abimelech.ana, putha pam pi'-pi'an nungantam anangana, thintham wampin nungant Abraham.ant, a' Abimelech.an thaw nungant Abraham.antan, “Ayyang, Piip God.angan ma' yotam ma'-aathan nintang. Ngay puth ngurp nungkaram, ngay nath-palman minam iiy-iiyang nungk. Nint puthangkaniya, minam iiy-iiyān ngathara, kan-kanam ey?”

Abraham.an-a, thaw nungant, “Ee'a, ngay kan-kanam minam iiyāng nungka. A' in ngeeya, pam work nungkaran iiy-iiyantana, than ngak pantam nganttamana, ya' kumpathin.” Abimelech.an thaw, “Ngay puth meemiy ya'a! Ngay ngoongk-ngoongkama! Yaa, ngay ngul thawāng thant ngak pantam nungkaramana, mak wunow nungk.”

27-32 Yaa, pul Abraham.angana, wik ngul yumppul minam iiyowpul pulantakaman, a' nil Abraham.angana, min anangan thee' nungant Abimelech.antan. Nil puth min sheep wanch anangana, seven pokkapang wunp thanang. Abimelech.ana, engk nungant Abraham.antan, “Nint ngul min wiy inangan ngeenak pokkapang wunpan thananga?”

Nil Abraham.an thaw, “Nint min inangan kan-kanam puuy kalān thanang nungka. / Pam wanchangan thath-thathaynan-a, thanan thiichayn ngak pantam inan ngayan thee'ang.” (Puth aak thanttam yimanangan wun.) Abraham.angana, namp aak ananiy waa' Beersheba. Amanamana, Abimelech.ana, putha pam pi'-pi'anam nungantam anangana, koyam iiyin aak namp Philistia.akan.

33-34 Ngulana, nil Abraham.angana, yuk many kaamp, ngak pantam thinth (yuk tamarisk waa'antan). A' nil aak angan mee'wuthanam nungantan piip Godant, nil puth kan thiich nil piip God.ana, anman murkanim man-yatham wunan. Nil puth thaa'-kuump nunang, Piip God.an. A' nil Abraham wee'ananga, aak angman yaam wun-wunin, aak Beersheba thinth.