1-15 Anpalaniya, nil Piip God.angana, paath nunang Abraham.an. Nil puth thaw nungant, “Nint kaangk paththam wunangan puk nengk nungkaramakan Isaac alantan aa? Yaa, nint in ngeeya! Nint karpam kalān nun aak-aakanakan Moriah.akan. Aak aniya, yoykangana, nintana, thumangan kiingkān nunang ngatharan,” nil Piip God.an thaw. (Ka' min sheep anangan thumangan kiingkantan thananga, nil Abraham.angan yimanangan thumangan kiingkow nunang nengk nungantaman piip God.antan.)

Mee'-ngutangam ngaa' thon ngulana, Abraham.angana, thum yot yalmath thanang, a' pik-pungkang donkey.antang wunp, thum anangan. A' than kan-ngul iiyin, Abrahama, puth nengk nungantam Isaaca, putha pam kucham anangan workan iiy-iiypul nungant Abraham.antan, thanana kan-ngul iiyin. Thaniya kinch ma'-ko'alamak iiy-iiyin aak-aakanakaman aak Moriah.akan.

/ Kan-ngulan wampin-a, nil Abraham.an thaw pulant, pam kucham al-al antan work an iiy-iiypul nungant, “Nip ingman kuupow ngathara. Ngaya, puk nengk ngatharam inana, ngan kenyan yipam iiyān yoykaka, a' ngan mee'wuthanamān nungant piip God.antan. Ngan palam ngul wampān nipara.”

Nil Isaac.angana, thum yot anangana, nil ngul kal thanang, nil Abraham piip nungantam alangana, nengk-peempan kal-kal, a' putha, thum kok thamp kal, yipam Abraham.angana, thum mee' pathathow. / Pul iiy-iiypulan-a, nil' nengk-kunch Isaac.ana, thaw piip-kunchakan, “Piip ngatharam-ang, min sheep wanttin e? ngal yipam thumangan kiingkāl piip God.antana?” Nil piip nungantam Abraham.an thaw nungant, “Ayyang, puk nengk ngatharam-ang, nil piip God.angan nilam ngul min uwowa, ngul thee'ow ngalant thamp.”

/ Pul aakang kanan wamppul-a, Abraham.angana kunttow anangan yalmath thanang, a' karp-karp wunp kunttow anangan, aakamana achantang wunow, ka' yuk thaa' yimanangan. Amanamaniya, Abraham.angana, thum ngul wunp thanang kunttow kenyangkan. A' nil piip-kunch Abraham.angana, kuuyang kath nengk nungantaman Isaac.ana, a' thum kenyangk wunp nunang. Amanamaniya, piip-kunch Abraham.angana, nengk-peempanana maay, ka' angman mulathiy nunang nengk nungantaman piip God.antan. A' nil ngaantiyongk God.antaman pech paththam nungant Abraham.antan, “Ay-ey! Abraham-ang! Nint ke' mulathān puk nengk nungkaram nanana! Ngay kan thiichang ngul nintang wik erkam ngeeyangan nunang God.ana, nint puth puk nungkaram kaa'-thonaman ke'am weekan nungant.”

Amanamana, nil Abraham.angana, min sheep wuut thath wip-wip peerp wuthanang, kech ke'anam. Nil min sheep.an erkam mam, a' nengk nungantamana, kuchan ngul, ke'am mulath nunang, nengk nungantamana. Nil min sheep.ana, thum kenyangk wunp nunang, a' nengk-peempanan maay, mulath nunang ngul. Nil min sheep.an angman thumang ngul kiingk nungant Piip God.antan. A' Abraham.angana, aak alantan namp thee', Jehovah-jireh, wik ngamparamanga, yimanang thawanamp, “Nil Piip God.angan min-min pi'an ngampang.”

16-19 A' nil ngaantiyongk Piip God.antamana anpal keny putham pech nungant, Abraham.antan, “Ngay inan thawang nungk, puth in thamp ngeeya! ngay ke'-ngul ngaantam-ngeeying thon-thon ngulana, ngay wik inan kaa'ngakang nintang, nint puth puk nungkaraman Isaac.ana, ke'am weekan ngathara, nint ngangk minangam thee'an ngath, ngay ke'paal kampan nungkaram anangana, yot thaa'-wantanam ngul yumpāng thanang, ka' thunp inang kenyan wuntan yuwangan, putha, ka' ngaan thompangan wuntan, thanana, kampan nungkaram anangan yimanangan weenayn aak ingan. Pam kul thantan yumpayna, an than ke' ma' thee'ayn thant. Nint putha wik nganyang ngeeyan, yaa, puth amanamana, ngay kampan nungkaram anangan minam ngul pi'āng thanang. Pam wanch yot anangana, nath-nathan wuntana, ngathar ngul thawayn minam pi'-pi'āng thanang, ka' ngay niiyang yimanangan pi'-pi'ang.”

Yaa, Abraham.ana, puth nengk nungantam Isaac.ana, a' putha pam kucham anangan pul workan iiy-iiypul nungantan, than koyam kan-ngul iiyin aak Beersheba.akan.

20-24 Anpalana, wik wamp nungant Abraham.antan, wikan yimanangan waa' nungant, pont nungantamang Nahor.ang puk wuut yot 8 wunp. Puk nengk nungantam thonanganana namp Bethuel.ana, puk thampa puk wanch many, namp nungantiya, Rebekah.