1-9 /Nil Abraham.an wuut kath ngulan ween-a, nil thaw nungant pam alantan work.an iiy nungant, “Ayyang, nint wanch ngul uwān nungant, puk ngatharamakan Isaac alantan. Puth nint in ngeeya! Nint ke’ iiyān pam wanch al-alantan aak ingan Canaan.angan wuntan, ya'a, nint aak-aakanakan ep iiyān pam wanch ngan aak-kunch al-alantan iiyān thant. Nint in kan-kanam thawangan ngathar ey? mee' Piip God.antang nint kan-kanam uwān nungant ey?”

Nil pam work nungantan iiy-iiyana, thaw nungant, Abraham.antan. “/Nil wanch komanan ke'an kaangka pal wampow ngatharangana, an wanttaka, ngay Isaac.ana, ke’ kaling nunang thant ey, niiy aak-kunch al-alantan ey?” “Ya'a,” Abraham.an thaw, “Nint puk nengk ngatharamana, ke’ kalin nunang aak-aakanakana. Nil Piip God.angana, ngaantiyongk nungantamana, ngul kuchow, nil yipam ma'-aathow nintang wanchan yipam uwān nungant, puk ngatharamakan aak nangan. /Nil wanchan ke'an pal wampow-a, yaa, an puth kana.” Pam anman work.an iiy-iiyan Abraham.antana, nilan thaw, “Ngay inana wik thayan thawang nungk, /nint wik nyiingkan thawan ngathar-a, ngay yumpāng nungk.”

10-14 Yaa, nil puth pam alangana, way min min-minam anangana, yot kal thanang, a’ camel 10 uw thanang, a’ angman wunp way min anangan camel.antang. Nil pamana, kan-ngul iiy aak Mesopotamia.akan, aak pam kampan Abraham.antaman pam Nahor.an wun-wun, aak Haran thinth. A ngak pantamak wamp, aak angman ngangkangan thee'. Nil pamana, mee'-wuthanam nungant Piip God.antan, “Ayyang, Piip God.ang, nint minam iiyān nungant Abraham.antan, nint puth ngayangan ma'-aathāna! Than wanch koman anangana, aak an punychanyaniya, ngakak wamp-wampantan. Ngay mak thawāng thonamantan ngak thee'ow ngathar. /Nil wik inangan nath thawiy ngath-a, ‘Yaa, nint mungkaa! a’ puth ngay camels nungkaramak ngak empāng thanta!’ yaa, ngay kan-ngul thiichāng nintan kan mi'ān nunang wanch thum Isaac.ant.”

15-25 /Nil mee'an yippak wuth-wuthanam-a, wanch koman wamp, ngak pantamakan, ngak empow nungantakam. Nil wanch koman menth-mentham-ow! Nil mina, pik ke'anang. Namp nungantiya, Rebekah. /Nil pam Abraham.antan work iiy-iiyan-a, thaw nungant wanch koman alantan, “Ngak pal kalān ngathara! ngay yipam mungkānga!” Wanch koman Rebekah alangana, ngakana, erkam paththam uw nungant pam alantan, a’ thawant, “Ngay min camels nungkaram nanangana, ngak thamp aathāng thanang.”

/Nil ngakan aath-aath thanang-a, nil pam alanganiya, oth thath-thath nunang Rebekah.an, ngaantam-ngeey-ngeey nilaman, “Wanch komanan inant-ee! God.angan meen-meenath ngathara!” /Nil kanan minchath ngakan aath-aath thanang camels anangan-a, nil pam alangana, ring kaa'ak anangan thee'ant, a' puth bangles kucham thamp thee'ant wanch koman Rebekah alantan. A’ engk nungant Rebekah alantan, “Nint in puk nengk wee'antama?” Nil wanch koman Rebekah.an thaw, “Piiip ngatharama, Bethuel. Nila nengk pulantam Milcah alantaman pul Nahor.antam.” Nil paman thaw nungant, “Yaa, ngay aak wanttin nath paanthānga?” Nil Rebekah.an thawant, “Ngal kan iiyāla! piip ngatharaman wanttak nath thawow nungka, ing nath paanthān nganttang. May nanangana, min camels nungkaramangan mungkayn ngutangan.”

26-27 Pam anman Abraham.antan work iiy-iiya, kuchek pekam thuch, piip God.an thaa'-kuump nunang. Nilan thaw Piip God.antan, “Nint ma’ yotam minam anman iiy-iiyangan nungant moom ngatharamantan, minam paththam iiy-iiyangan nungant, ke'-paal nintan woyan min koochanam kalan ngayang kampan nungantamakan,” nil paman thaw Piip God.antan.

28-31 Nil Rebekah.ana, kamp paththam mo’, kampan nungantamakan waa'ow. A’ kuunch nungantam Laban.ana, ngak pantamakan iiy, a’ angman umang wak nunang, paman. Nilan thaw nungant, “Awey! pal iiya! nint nganttang ang paanthāna! Ngay aak kanam yumpang nungkara, aawuch nganttangana.” Yaa, Laban.ang pul karpam kan-ngul iiypul aawuchakan.

32-49 /Laban.angan kanan min camels anangan aath thanang-a, nil ngak uw nungant ma'an pungow, a’ may tham wampathant. Nil pam Abraham.angan work iiy-iiya, kan-ngul thaw thant, “Ayyang, ngay kan waa'āng niiyant ngay ngeenakan wampang niiyanta. Ngay in wik tham wampang niiyanta. Ngay kan ka'atham waa'āng niiyanta, amanamana, ngay may ngul mungkāng. Ngay inana, Abraham.antan work iiy-iiyang. Nil Piip God.angan minaman pi'-pi'an nunang, a’ ma'-yotam ma'-aath-aathan nunang thamp, moom ngatharaman, way min nungantaman yota. Pul Saraha, puth Abraham.ana, pul wuut wanchinth ngulan weenpula, wanch nungantam Sarah alangana, puk wuut many kal, pul nampaniya, thee'pul nunganta, Isaac. /Nil Abraham.an uthamowan-a, nengk nungantam Isaac alangan way min nungantam anangan uwow. Abraham.an thaw ngathar, ‘Nintiya iiyān a’ wanch uwān nungant puk nengk ngatharamakan Isaac alantan. Nintaniya, angan iiyān kampan ngatharam al-alantan. Nintang nil Piip God.angan ngul ma'-aathow nintang. /Puth kampan nungantamang wanch koman alantaman ke'-wey kuchayn nunang-a, yaa, an puth kana, ngay puth kul ke'-ngul thawing nungkar,” nil moom ngatharam Abraham yimanangan thaw ngatha. Yaa, /ngay ngak pantamakan kanan wampang-a, ngayana, mee'-wuthanamang Piip Godant, ‘Nint menathān ngathara wanch koman want-wanttinan nungant Isaac.antana.’ Yaa, nil Piip God.angana, meenath ngathara wanch komanan inama, namp nungantiya, Rebekah. Niiy ngul Rebekah.an thee'ān nunang puk nengka Abraham.antamakan ey? Niiy wikam thawān ngathara, ngay yipam meemiy ngul iiyāng.”

50-61 A’ Bethuel.ana, piip Rebekah.antanana, pul Laban.ana, kuunch nungantaman thawpul, “Piip God.angan inan yump nganta, puth ngan ke’ thawin. Nint Rebekah.ana, kan kalān nunanga, a’ nip kan-ngul iiyowa.”

Amanam.aniya, pam Abraham.antan work iiy-iiya, nil way min yot thee’ thant. Ngaa’ thon ngulana, nil paman kaangk koyam kan-ngul iiyowa. A’ kaatha, puth kuunch nungantam Rebekah.antaman thawin pam alantan, “Nip kan ingam ke’ wuniw ey? Kinch 10.akaman ey? A’ Rebekah.ana, kan-ngul iiyow nungkarang.” Puth nil pamana thaw, “Ya'a, ngay inman kan iiyānga.” A thanana engkin nungant Rebekah.antan, “Nint kaangk inman iiyān ey, pam ilantangan ey?” Nil wanch koman Rebekah.an thaw thant, “Ee'a, ngay inman iiyāng nungantang.” A’ kuunch nungantam Laban.an-a, putha kaath nungantaman thawpul nungant Rebekah.antan, “Yaa, nint yipmam kaath pi'an puk uuyak weenān-a! puk yot ngul weenayn nungkarama! Ngul nathweya, wiy al-alangan kul nath ngul yumpayn kampan nungkaramakana, puth than ke’ ma’ thee'iythan thant, ya'a.”

Yaa, nil pam alangana, wanch koman Rebekah.ana, kan-ngul kal nunang, putha, wanch anangan work nungantam Rebekah.antan iiy-iiyin, than thamp iiyin nungantang.

62-67 /Kinch ko'alamangan kanan want thanang-a, nil pam komp Isaac.ana, paddock angan iiy-iiy, kinch-wayang ngula, nil aak kech thath, an paththam min camels anangan epam thath thanang pal kan wamp-wampin. An-aniyangana, nil wanch koman Rebekah.angana, an-aniyangan thath nunang Isaac.an thamp. Nil camel.ana, erkam uk, a’ engk nungant pam Abraham.antan work iiy-iiyan, “Pam anan wee'a?” Pam nil Abraham.antan work iiy-iiyana, thaw nungant Rebekah.antana, “Pam nanan Isaaca, moom ngatharamana.” Rebekah.angana, kaa'wal nungamangana, ngookang kang, yimanangan iiy pam komp Isaac alantan nilan mayow nunangan (puth aak thant yimanangan wun ngook ke'anangan ke’ iiy.iy).

Pamana, Isaac.antan iiya, wikan waa'-waa’ nungant.

Amanam.ana, nil Isaac.angana, wanch koman Rebekah.an kan-ngul kal nunang aak nungantamakan, a’ nil wanch thum nungantakam ngul ween. Nil Isaac.an kaangk-wun nungant, pulana kaangk wunpul pulantakaman, ngangk minangam wunpul ngul.