1-6 Anpalaniya, Abraham.angana, wanch thonangan maaya, namp nungiya, Keturah. Nil wanch Keturah.angana puk wuut six kal. Namp thantiya, inangan: Simran, Jokshan, Medan, Midian, Ishbaka, puth Shuah. A’ nil Abraham.angan yuk way min thee’ thant, a kuch thanang, mal kaaw wunayn. Nil Isaac.antan yuk way min thaa'-wantanam thee'ant.

7-11 /Nil Abraham.an kaap 175angan wantan-a, nil mul ngul wun. Pul puk nungantam kuchamang kaamppul nunang, Isaac.anga, puth Ishmael.ang kaamppul nunang, piip pulantaman, aak cave Machpelah angan, aak angman nil Abraham.angan Sarah wanch thum nungantaman kaampan.

Anpalana, nil Isaac.ana, yiip ngul iiy, aak namp Lahairoi aakanakan, ang ngul wun, ngak pantam thinth. /Nil Piip God.ang ka’ piip nungantaman Abraham.an ma'-aathan-a, nil Isaac.ana, yimanang ma'-aathan nunang, Piip God.angan.

12-18 Ishamel.ana, aak Assyria.ang wun. Nilaniy puk wuut 12 wunp thanang. Anpalana, /nil kaap 137angan wantan-a, nil utham ngul.

19-26 Nil Rebekah.ana, wanch Isaac.antamana, puk ke'anang iiy-iiy. Nil puth Isaac.ana mee'-wuthanam Piip God.ant wanch nungantamang yipam puk uwow. A’ Rebekah.an iimpanang ngul iiy-iiy.

Anpalana, God.an Rebekah.ant thaw, “Ayyang, Rebekah-ang! Nint puk manyiy um kucham kal-kalangan pulanga! Ngul-ngulaniya, pulaniya, wuut mangk aak kuchamak iiyowpula. Nil thonan wuut mangk pam wanch aak Edom punychany al-alantan iiyow, a’ nil thonanganiya, wuut mangk pam wanch aak Israel punychanyant iiyow. Nil thonan ep pam pi'an iiyow. Nil wuny-kunchan pont-kunchant work iiy-iiyow.”

Anpalana, Rebekah.angan puk wuut manyiy um kucham kal pulang. Pul kaath piip-kunchangan puk kaa'-ngeechaman namp Esau thee'pul nungant, a’ thon alantaniy-a, namp Jacob thee'pul nungant.

27-34 /Pul puk wuut anangan empul ngulan-a, nil Esau.an min-thup em-ema, nil Jacob.an ep ya'a, nil pam mochan iiy-iiy, nil kaangk tent nungantamang angman nyiin-nyiinow. Nil Isaac.angan kaangk nunang Esau.an, nil puth kaangk min Esau alantam.an mungk-mungkow. Nil wanch-kunchangana, Rebekah.angan kaangk nunang Jacob.aniy.

Anpalana, nil Jacob.angan min kam kiingk-kiingk, may kaanch wewm ka’ wu’ yinang thampang. A’ nil wuny-kunch Esau.aniya, meech wamp minam. A’ nil Jacob.ant thaw, “Ayyang! Nint ngath may wewman thee'ānara.” Nil puth Jacob.an thawant, “Ngay ke’ kaa'-ngeecham yinanga! Nganyang puth kaa'-ngeecham waa'ān, ngay ka’ wuny nungkaram yinang, ngay ngulana, yipam yuk way min piip ngalantamantaman maayāng, ngay mayan yipam thee'āng nungkar.”

Nil puth Esau.an thaw Jacob.ant, “Ngay puth meecha, ngay ngul uthamāng, ngul ngay ngeenak kaa'-ngeechaman iiy-iiyānga? An puth min ngath ya'a. Yaa, nint puth kaa'-ngeecham iiyāna!”

Nil puth Jacob.an thaw, “Nint puth kan-anam thawangan ngathar ey?” Nil Esau.an thawant, “Piip in kenya, ngay kan-kanam thawang nungk.” Yaa, anpalana, Jacob.angan may ngul aathan, a’ nil Esau.angan mayan mungk ngul, mayana, erkam mungk.