1-6 Anpalaniy-a, aak way ngul wamp thant, aak um yompanamana aak may ke'anang ngul wunin. Puth nil Isaac.an iiy aak Gerar.akan aak ananiy Philistia.angan. Nil Abimelech.aniy King iiy-iiy aak-aakanakan. God.an Isaac.ant thaw ngul, “Ayyang, in ngeeya! Nint aak ingman wunāna! Nint ke' yiipan iiyān aak Egypt aakanakan. /Nint wik ngeeyin ngayangwey-a, yaa, ngay nungkarang ngul iiyāng, ngay minam pi'-pi'āng nintang, puth ma'-aathāng nintang. Ngay puth aak inan nungkar thee'āng, a’ putha, puk thaa’ nyiingkanamakan, ngulan aak ngeey-ngeeyayn nungkaram anpalana, aak inaniya thant thamp thee'āng, kampan nungkaramakan. Kampan nungkaram anangana, yot thaa'-wantanam ngul weenayn, ka’ thump inan kenyan yuwangan wuntan ngutangana, yimanangan weenayn. Ngay wik inangan kaa'ngakang nintang, ka’ ngay piip nungkaram Abraham.an ka'athaman kaa'ngakang nunang. Nil puth ngayang wik ngeey, wik ngatharaman yipam kan-kanam wampow pam wanch kampan nungkaram al-alantan,” nil Piip God.an thaw nungant yimanang.

7-11 Anpalana, than pam aak an punychanyan thawin nungant, Isaac.antan, “Ayyang, wanch anana Rebekah.ana nil nungkara wanttaka?” Nil puth Isaac.an winynyang mo’, nil puth yaan thaw thant, “Nil wanch kuunch ngatharama.”

Ngulaniya, Abimelech.an kan-ngul meemiy ngul weem nil Rebekah.an wanch thum Isaac.antaman. Nil Abimelech.an thawant ngul Isaac.antan, “Nint ngul ngeenak ngayang mook-mathana?” “Ngay puth winynyang mo'angan pam al-alantamana, than ngayang ngul mulathina,” Isaac.aniy thawant. Nil Abimelech.an thaw thant pam aak an punychany al-alantan, “Niiy ke’ wayathān pulang, a’ ke’ piikān pulang thamp, Isaaca, Rebekah.an.” Yaa, minam ngul wunin, nil Isaac.an ke'-ngul winynyang mo’ thanttam.

12-16 /Nil ka'athaman wamp aak Gerar angan-a, nil Isaac.angana, may kaanch kaamp-kaamp aakangan. Amanaman may yot-yotam em-emin. A’ min sheep thakan nungantam thaa'-wantanam ngul weenin. Than pam wanch aak an punychany Philistia amanamana, wayam thawin nungant, puth nil may yot minam emath thanang, a’ min anangan yot pi'-pi’ amanaman. Than puth ngak pantaman koyam kaampin nungantam. A’ nil King Abimelech.an thaw Isaac.antan, “Nint pam pi'an, ma’ mangkkiya! Nint aak inpalana kan iiyāna, aak thonanganak ngul kan ekāna! Aak in nungk ya'a! Kan aak um-puyam iiyān, ngan kaangk ke’ thathān nintang aak ingan wunāna!”

17-22 Nil puth Isaac.aniya, kan-ngul iiya, aak thonak aakanakan, aak ongk punth-umang angan wun-wun. /Nil Abraham.an man-yathaman yippak iiy-iiy-a, than pam nungantaman workan iiy-iiyina, than ngak pantam thee'-thee'in aak angman. /Abraham kanan utham-a, than pam aak Philistia punychany al-alangana, ngak pantaman koyam kaamp-kaampin. Isaac wee'anangana ngak pantaman putham thee'in, a’ than pam nungantamangan ngak mee’ bul-bulan pich-pich pal pekkuwamana uwin. A’ than pam aak an punychany Gerar.amana, than pam al-alangan kul yumpin thant pam Isaac.antamakaniy, than angman thaa'-thay-thayanamin. A’ than pam aak an punychany thawin thant, “Ngak pantam inaniya, nganta.” Than puth pam Isaac.antamangan ngak pantam thonangan ngul thee'in. Pam al-alangan ngak pantam anan thampang mee’ wakin thanttam. A’ putham Isaac.an iiy aak thonak, a’ ngak pantam thonangan ngul thee'. Anpalana, an ep ke'am ngul thaa’ thay-thayanamin. Nil puth Isaac.an thaw, “God.ang ngampar aak pech we'ar thee'a.”

23-25 Ngul anpalaniya, Isaac.an iiy aak Beersheba aakanakan. Aak angana, God.ang putham ma'-aathan nunang. Nil puth Isaac.angan kunttow achantang wunp, puth ngeenaka, nil God.an thaa'-kuumpan nunang putham.

26-33 Ngul-ngulaniya, King Abimelech.ang pul pam pi'an nungantamangan wamppul Isaac.antan a’ thawpul nungant, “Nil God.angan ma’ yotam ma'-aathan nintang. Ngamp inman kan ngurp ngamp iiyāmp.”

Yaa, nil Isaac.angan may pi'an yump thant, a’ ngula ngaa’ thon ngul'ana, than kaa'ngakwin than ngurp than ngulan iiyayn. /Pul King Abimelech pul pam pi'an nungantamang kanan iiypul-a, than pam Isaac.antam anangan wampin nungant, a’ waa'in Isaac.antaniya, “Ngan ngak pantam thonangan thee'an, a’ ngak uwana.” Nil puth Isaac.angana, pantam ananiya waa’ ‘Sheba’, ngamp wik ngamparamangan ‘Seven’ waa'anampa.

34-35 Anpalana, nil Esau.an iiy aak Heth aakanakan, a’ wanch kucham aak anpalan maay, wee'a Judith, wanch nengk Beeri.antam, a’ Basemath, wanch nengk Elon.antam. Pul kaath piip nungantam Rebekaha, putha Isaac pulana ngangk way-wayam wun pulant, (pul puth kaangk nil wanch kampan nungantam al-alantaman maayiy).