1-4 /Nil Isaac.an wuut kath ngulan weema-a, mee’ ko'anch, aak mee’ pur thath-thath. Nil Esau.ant pech, a thawant, “Ngay in wuut kath ngula, ngay yaaka’ ngul-ngulam uthamāng. Nint bow-a, putha arrow nungkaraman kalāna, a’ aak kangkak iiyāna, a’ min mulathān ngatha. Nint anman kiingkān ke’ nintaman kiingk-kiingkangana, ka’ ngayan kaangk mungkāng, nintana min ngathara kiingkān. /Min anan ngay kanan mungkāng-a, ngay ma’ ngatharaman ngul wunpāng kuchek nungkaramang, a’ wik min thawāng nungkara mee’ God.antang.”

5-17 /Nil Esau.an kanan iiy minakan-a, nil Rebekah.angana, Jacob.ant waa’ wik Isaac.an thaw Esau.antana; a’ nil kaath pulantaman thaw Jacob.antaniy, “Nint inaniy wikan ngeeyān ngayanga!” Min goat kucham mulathān, a’ pal kalān ngay yipmam min kiingkāng piip nungkaramantan, a’ nintan kalān nungantaniy. /Nil mungkowan-a, nil yipam ma’ kuchek nungkaramang wunpow, a’ wik min yipam nungk thawow mee’ God.antang.” Nil puth Jacob.an thaw kaath-kunchantaniy, “Puth nil kuunch ngatharam Esau.ana thuu'atiya. Ngay ep ya'a, puth piip ngatharamangan ngayanga thuu’ ke'anang ngul mama! Puth nilan ngaantam-ngeeyiy ngayangana, ngayan mook-mathing nunang ka’ ngay Esaua. An nil ke'-ngul ma’ wunpiy kuchek ngatharamang, a’ putha wik minan ke'-ngul thawiwar mee’ God.antang, an nil koonchow ngayanga!”

A’ kaath-kunch Rebekah.an thawant, “Nil nintang ke’ wayathow, nil ngayang koonchowanya, an kana, an ngay puth thawang nungk, thaachang nintang thawān nungantan yimanangan, nil ngayang waa'owa. Nint puth wik ngayangan ngeeyāna!”

Nil Jacob.angan puth wik ngeeyan ngul kaath-kunchan, /nil min goats kucham mulath-a, a’ kal nungant. Nil Rebekah.angana, minan min-minam kiingk. Anpalana, nil ngook min Esau.antaman wich, a Jacob.ana, ngoonchathan, a'min pe'an thuu’ thampan ma’ Jacob.antang wunp, a’ wiyiya manang wunpantang. Anpalana, mayan thee'ant, piip-kunchantan kalow.

18-29 A’ nil Jacob.an iiy ngul Isaac.antana, a’ thawant, “Ayyang, piip ngatharam-ang!” Nil puth Isaac.an thaw, “In nint wee'a? Puk kaa'-ngeecham ngatharaman ey? Esau ey? Nint ey? or puk manyan nintiy Jacob.an wampan ngath?”

Nilan puth thawant, “Ngay Esaua! puk nengk nungkaram kaa'-ngeechamana,” nilan thawant. Nintan ngath thawan minakan iiyāng, ngay puth min kanam mulathangana, a’ putha kanam kiingkangan. /Nint kanan mungkān-a, ma’ kuchek ngatharang wunpāna, a’ wik min thamp thawān ngathar mee’ God.antang.”

Puth Isaac.an thawant, “Nint want-wanttak puth min erkaman uwan e?” A’ nil Jacob.an thawant, “An puth nil Piip God.angan ma'-aath ngayanga min inan erkam uwang.” A Isaac.an thawant, Jacob.antan, “Nint kan pal-pal iiya, ngay kan mamāng nintanga.” Nil Jacob.an thinth-thinth iiyant, ngul nil Isaac.angan mamanana, a kan-ngul thawant, “Wik man aawal nungkaraman ka’ Jacob.antam puth ma’ punthan ka’ Esau yimanangan. Nint ngul ina kan-kanam Esau ey?”

Nil puth Jacob.an thaw, “Ee'a, piip ngatharama, ngay Esau kan-kanama.” A’ piip nungantam Isaac.an thawant, “Yaa, min nungkaraman pal kan thee'ar ee! ngay yipam mungkānga! Amanamaniya, ngay ma' kuchek nungkaramang wunpāng, a’ wik min ngul thawāng nungkar mee’ God.antang.”

A’ nil Jacob.angana minana thee'ant. Nil puth Isaac.angan mayan mungk, a’ wine ngul mungk. Anpalana, nil thaw Jacob.antaniy, “Pal pal iiya, a’ wal piintān ngayanga.” Nil puth Jacob.angan piip-kunchan ompam kathan, a’ wal piintan. /Nil Isaac.angan aawalan Esau.antanan ngookang nuuth-a, aawal ka’ min unychan, a’ nil putha ma’ kuchek Jacob.antang wunp, a’ wik min thawant, wik inangan, “Nil God.angan aak min thee'ow nungk, ngakatiy aak, a’ garden nungkaramangan may anangan min-minam emayn nungkar. Puth pam wiy aak thon-thon nath-palana, work iiyayn nungk, a’ ngaantam-ngeeyayn nintang ka’ pam pi'an yimanangan. Nint ka’ pam kampan nungkaram yimanangan ke’ iiyāna, ya'a, nint ka’ pam pi'an yimanangan iiyāna. Thananiya nintanga ngaantam-ngeeyayn ka’ pam pi'an yimanangan. /Than wee'-wee'anangan koonchayn nintang-a’, an puth nil God.angan thanangam koonchow. /Than wee'-wee'anangan wik minwey thawayn nungk-a, anan nil God.angan ma'-aathow thanang,” nil piip-kunchan Isaac.an thaw nungant, Jacob.antan.

30-40 / Nil Isaac.an kanan wik thaw-a, /nil Jacob.an kan-ngulan iiy-a, piip-kunchan wantan-a, yaam ke'anama, nil Esau.an may thampan wamp piip-kunchant. A’ nil piip nungantamant thaw, “Piipa, ngay inam wampang nungka, min wampathang nungk, nint min kan mungkāna, a’ nint ma’ ngul wunpāna kuchek ngatharang, a’ wik min thawān ngath mee’ God.antang.”

“In nint wee’ e?” piip nungantaman thaw. “Ngay Esaua, puk nengk nungkaram kaa'-ngeechaman,” Esau.aniy thawant. Nil Isaac.an kemp akangam than-than, a’ thawant ngul, “Puth nilana wee'ang may ngath ka'athaman kalar e? Ngay puth mayana mungkang, a’ amanamana, ma’ kuchekang ngul wunpang nungantang, a’ wik min thawangan nungant mee’ God.antan ga! an puth ngayan ke'-ngul wikan epankathinga.”

Nil Esau.an othamayan peey-peey, “Nint ma’ kuchek ngatharang thampang wunpāna, a’ wik min ngathar thampang thawāna, mee’ God.antanga,” nilaniy peey-peey.

Nil puth Issac.an thawant, “Kuunch nungkaramangan mook-mathanya, a’ puth ngayan wiy thawangan nungant nilana ep pam pi'an iiyowa; nintana, ep ya'a, pam manya iiyān, pam wanch kampan nungkaram anangan, thaniya, pam wanch kampan nungantamant work iiy-iiyayn. A putha, may yot em-emayn aak nungantangan.” Anpalana, Esau.ana peey-peey, a' thaw piip-kunchantan, “Nint piip wik min ngath thamp ke’ thawinar ey? mee’ God.antang ey?” Isaac.an thaw ngul nungant, “Ya'a, nint puth aak wayang ngul wun-wunāna, aak ngak manyan uk-ukow nungkara. Putha, niiy pek-pekwun anmana. Nintaniy kuunch nungkaramant work iiyāna. Puth ngul-ngulana, an ep, minam ngul iiyāna.”

41-46 Nil puth Esau.angana, ngank wayangam kal-kal.an ngul Jacob.aniy, nil ngaantam-ngeey ke’ mulathiy nunang. Ngul Rebekah.angan wik ngeeya, a' pul Jacob.ang wik yumppul Jacob.an kuchow nunang aak thonak. Ngul nil Rebekah.ana, Isaac.ant thaw, “Ngay kaangk ke’ Jacob.angan wanch aak in punychanyan maayow ka’ Esau.angan maaya, ngal kuchāl nunang nil wanch kampan nganttam anpal maayowa.”