1-5 Nil puth Isaac.angan Jacob.an umpana, ma’ kuchekang wunpant, a wik min thawant. A’ thaw ngul nungant, “Nint wanch aak Canaan anpalana, ke’ maayāna. Nint wanch nengk Laban alantaman maayāna, kaath nungkaramantaman kuunch niliya, puk alantaman ep maayāna. Puth God.angan nungk puk yot-yotam ngul thee'owa. Nil God.angan Abraham.an aak kaa'ngakan. Aak ananiya, puth nungk ngula, a puth puk nengk nungkaramant thee'owa,” nil Isaac.an thaw Jacob.antan. Anpalaniya, Jacob.an kan-ngul iiy aak Haran.ak wee'an Laban.an wun-wun.

6-9 A’ nil Esau.angan wik kanam ngeey Jacob.antana. Nil anan thampa kanam ngaantam-ngeey nil piip-kunchangan wanch aak Canaan anpalana, kaangk ke’ nil nengk-kunchangan maayow. Nil puth nengk Ishmael.antam maayan ngul. Ishmael.aniya, pam nengk Abraham.antam.

10-17 /Nil Jacob.an iiy-iiy aak Haran.akan-a, aakan kan-ngul ngaa’ chint, a nil puth an-ngul paanth, chip-chipam. Nil kuchekakaniya, kunttow wunp, a’ kan-ngul weep wun. Ananiya pith-pith ngul, pithana, yimanang pitha: steps ongk aak anpalan kenyana aak ingan uk. A’ ngaantiyongk God.antam anangan thath-thath thanang pal kenyan uk-ukina, a’ koyam kenyan ngul matin, nil yimanangaman, puth yimanangan nilan pitha. A’ nil Piip God ngul thawant, “Ngaya God Abraham.antam a’ Isaac.antam. Ngay aak inan nungkara thee'āng, a’ puth puk nungkaramak thee'ānga. Thanan putha yot-yotam ngul iiyayn, aak pal puuy wun-wunayn aak inganiy. Ngay puth mi'ang niiyang, nintanga, putha, kampan nungkaram, niiy yipam pam wanch ngatharaman iiy-iiyān, wik ngatharaman ngeeyān —puth amanamana, ngay ngul pam wanch yotam minam ngul pi'-pi'āng aak ingan wuntan. Ngay nunkarang karpam iiyānga, a’ palam aak iikanakam wampathāng nintang. Wik ngatharaman kan-kanama,” nil God.an thaw nungant, Jacob.antan. Anpalana, Jacob.an ngangk ik, a’ weepaman ek ngul, a’ thaw, “Kan-kanama, nil Godana aak ingan thamp wun-wuna, aak in nungant tham, ngay puth ngoongk-ngoongkama! Aak inan ka’ aak woyan thaa’ iikanak kenyan wunan.”

18-22 /Aak kanan man than-than-a, aak paanthanakana, nil Jacob.ana, weepaman ek. Nil kunttowana maay, nilan kuchekangan maak. A' angman wunpan nil yipmam ngaantam-ngeeyow aak angman nilan pith, a nil Jacob.angana, oil.ang kuungkan kunttowaniy piip Godant yipam thank-you thawow, puth aak thanttam yimanangan wun. A’ aakaniya, namp waa’ Bethel, wik ngamparamang thawanamp ‘ngorkal piip God.antam'. A’ nil Jacob.an thaw piip God.antan, “/Nint ngatharangwey iiyin-a, maya, ngookan ngathwey thee'inar-a, a' palaman puth wampathin ngayanga, aak piip ngatharamant minama, yaa, puth ngayana, nintangana wik ngul ngeey-ngeeyāng. /Yuk way min nint ngathan thee'ān-a, ngayan wiyaniya, pi'āng ngatharakaman, wiyaniya, koyam thee'āng nungkar.” Nil Jacob.an wik yimanangan thaw God.antan, a’ kan-ngul iiy.