1-16 Anpalaniya nil Jacob.angan ngeey thanang pam nengk Laban.antaman thawin, “Nil Jacob.angan min sheep piip ngamparamantam wiy anangan kala.” Anpalana, nil Jacob.angan kan thiichan Laban.an ke'am ngul ngangk min iiyant ya'a, A’ piip God ngul thaw nungant Jacob.antan, “Nint kan iiyān aakaka. Ngay tham nungkarang ngul iiyānga.”

Anpalana, Jacob.an thaw pulant Rachela, Leah.ant, “Nip meeiya ngay piip niparamant work pi'an iiy-iiyang, nil puth ngayang ya’ mook-mathanya. Nil puth God.ang min sheep thak piip niparamantaman ngathar thee’, a’ nilan thawar ngay kan koyam aakak iiyānga.” A’ pul Rachela, Leah.angan thawpul nungant, “Ee'a, puth God.an thaw nungk iiyanakana.”

17-21 Nil puth Jacob.an kan-ngul iiyow piip-kunchant Isaac.antan, aak Canaan.angan wunan. Nil wanch puk nungantam anangana, min sheep thakan kal thanang. Nil wanch thum nungantamang Rachel.angan yuk ngeen-wiy anangan ma'-kuchanang maay piip-kunchantaman. Nil Laban.ana, ngoongk-ngoongkam than Jacob wee'anang kanaman iiyin.

22-42 /Ngaa’ ko'alamang kanan wantan-a, nil Laban.antan wee'ang yaaka’ waa'ant than Jacob wee'anang kanaman iiyin. Nil Laban.ana, Jacob wee'anang thant koy-koyyuw ngul iiy thant. Ngaa’ 7angan ngulan wantana, nil Laban.an wamp ngul Jacob.antan, a’ thawant, “Ayyang, nint ngath ngeenak iniya yimanangan yumpangana? Nint ngeenak ngayang man-monkan thenchana? /Nint puth wanch nengk ngatharam kalan-a, putha yuk ngeen-wiy ma'-kuchanang mo'athan ngatharama! Nil ngeenak wik ke'anang mo'an ee? Ngay nintang ke’ piikinga! puth ya'a, ngay ngutang pithangan God nungkaraman kon-konang thawar, nungkaran way ke’ iiyāng, a’ putha ngangk kul ke’ pi'āng nungkara.”

Nil puth Jacob.an thawant, “Ngay yuk ngeen-wiy ke'am ma-kuchanang maayanga. Ngay wik ke'anang ep iiyangan nungkaram puth ngay ngaantam-ngeeyangan nint puth wanch nengk nungkaraman ngul ma'am piiyan ngayanga.”

Anpalana, nil Laban.angan yuk way min Jacob.antaman thath-thath puth nil ke'am uw yuk ngeen-wiy nungantaman, ya'a, nil puth Rachel.angan ep thench thanang. Nil Jacob.an thaa’ kulam thaw Laban.antaniy, “/Ngay nungk kanan work iiyangan-a, min sheep nungkaram anangan thaa'-wantanam pi'-pi'angan, ngay min sheep thonam ke’ mungkanam nungkaram, ya'a. /Min sheep thak nungkaram yaan mo'inwey-a, ngay ngatharam thee'ang nungk. Puth nintan ya’ mook-mathan ngayang. Ana nil God ngatharamangan inpal keny thath ngalang, nil nanpalan ngutangan nungk wik thayan thaw way ke'an iiyān ngathar.”

43-55 A’ nil Laban.an thawant, “Wanch inangana, nengk ngatharam, puk inangana, ngechiyang ngatharama, pul nengka ngatharamantam puka, a’ min sheep thakan ngatharamana! puth ngay ke’ way iiying thant, ya'a! Ngal puth koyam minam iiyāl ngalantakam, ngal puth kampan!”

Pul Labana, Jacob.angan puth wik yumppul, a’ nil Laban.an thaw, “Nil God.angan karp ngul ma'-aathow ngalang. /Ngal nungkwoy pok-pokkapangan wunāl-a, ngal minam yipam iiyāl ngalantakaman. /Nint ke'wey wanch nengk ngatharaman min-minakaman pi'in-a, God.angan ngul thathowa.”

Anpalana, Jacoba puth kampan wiy nungantam al-alangan kunttow yalmathin, karp-karp wunpin thanang, achantang aakamana, a’ Laban ngul thawant, “Kunttow inangana, ka’ yuk puyngk menangan thanow ngalant. Ngay ke’ thaa’ peyāng, kul ke’ yumping nungkar. Nintana yimanang ke’ ngatharan thaa’ peyān, kul ke’ yumpān ngathar, nintiy-a, aak nungkaramang wunān, ngay aak ngatharamang wunāng.”

Nil puth Jacob.ang mee’ God.antang kaa'ngakan Laban.an ke'-ngulan kul yumpow nungant. Anpalana, Jacob.angan min mulath God.ant, min anmana, karpam ngul mungkin. Ngaa’ thonan mee’ nguntangam Laban.an ek, a’ wanch nengk nungantamana, putha puk ngechanchin nungantam anangan wal piint thanang. A’ nil wik min thaw thant, a’ kan-ngul koyam aakak iiy.