1-8 Aak Egypt.angana, nil King Pharaoh.angana, pam yot pi'-pi' thanang work nungantan iiy-iiyin. Ngulaniya, nil pam kuchamant man kul wamp pulant. Nil pam thonamana, garden nungantan pi'-pi', a' wine.an kalant. Nil thon alanganiya, may bread thakan kiingk-kiingkant. / Nil Pharaoh.an puth man kul wamp pulantan-a, a' jail.ang wunp pulang, Joseph.antang angman.

Ngula, ngutang ngulana, pam kucham inangana, pith ngul pithpul, aak jail.ang angan. / Nil Joseph ngulan wamp pulant ngaa' thonan-a, pam pul ananiya, kaa' wal wiy-wiyam nyiinpul, ngangk way nyiinpul, a' thawpul Joseph.ant, “Ngan pith-pithana, nil puth wee'angam waa'iya ngant pithaniy?” A' Joseph ngul thaw pulant, “God ngatharam epa, mee'miiy pith thakaniya! / Nip ngath waa'ow pithaniy-a, God ngatharamangan ngul waa'owar pith niparamaniy.”

9-15 Ngula, nil pam alangan Pharaoh.ant wine.an kala, nil pith nungantaman waa' Joseph.anta. “Ngay kuuy punth ko'alam thathangan ngul may pach pi', ngul-ngulana, may grapes paththam ngul menchan weemin. Ngay may kam grapes.antaman cup King Pharaoh.antamang inthangan, a' thee'angan nungant.” Anpalaniya, nil Joseph.an thawant, “Ngay mee'miiy pith alantam'aniya, inan ngeeya! Kuuy punth ko'alamana, ka' nint aak ma' ko'alam wunān ingana, a' pentān ngul. King Pharaoh.an thawow nungk may wine thakan kalān nungant, ka' nint keenkaman may wine thakan kalān nungant. / Nint pentānan-a, ngayang ngaantam-ngeeyān, Pharaoh.antan waa'ān ngay puth ke'am way yumpang, thanan ngayangan jailangan wunpin.”

16-19 / Ngul nil pam thon alangan Pharaoh.antan may bread thakan kiingkant Joseph.an ngeeyan-a, nil thaw Joseph.ant, “Ngay yimanang pithangan. Ngayan ik ko'alam kal-kalang kuchekangan. Ik kenyangkana, may bread min wiy-wiyam wunin, a' min waatha, parpang mungkin thanang.” Nil Joseph.an thawant, “Pith nintan pithana, ngay mee'miiy. Ik ko'alaman ka' aak ma' ko'alam wunān. Kan-ngulana, nintang King Pharaoh.angan man kuuyang kathow, a' yukang waanchow nintang. / Mul ngulan wunāna, a' waatha, parpang kemp nungkaramaniy mungkayn.”

20-23 / Ma' ko'alam kanan wunin-a, nil Pharaoh.an thaw thant pam wanch nungantamak, “Niiyalang, maya, min yot kiingkān birthday ngatharamaka!” A' nil King Pharaoh.angan koyam wik kuchant pam may wine thakan kalant, a' work nungantaman koyam ngul wunpan ka' Joseph.an thawant. A' thonaniya, may bread thakan kiingkanta, yukang waanchan. Ngul nil pam alanganiya, King Pharaoh.ant may wine.an kalanta, nil Joseph.an kon ngathan. Nil ke'am Pharaoh.ant waa'an nunang Joseph.aniy.