1-8 Kaap kuchamangan wanta, ngutanganiy nil King Pharaoh.angan pith kucham pith.

Ngul ngaa' thonana, /Pharaoh.angan pithan ngaantam-ngeeya, nil ngangk wiy-wiyam ween, puth wee'angam waa'iy nungant pithaniy?

9-13 Pam anana, Pharaoh.ant may wine kala, thawant, “Ngay pam anan ngaantam-ngeeyangan Joseph.an. / Nintan man kulan wampan ngath-a, puth pam thon alantan may bread thakan kiingk nungk, nint nganang jail.angan wunpan. Ngan ngutangan karpam pithan, a' nil Joseph pam komp aak Canaan.aman nil angman jail.ang, nil ngant pithan waa'. Nint nganyang koyam work.angan wunpan, a' pam thonan yukangan waanchan nunang. Wik Joseph.antaman kan-kanam, puth nilan kan-kanam waa' ngant pithaniy.”

14-24 Nil Pharaoh.an puth Joseph.ant wik kuch. Nil Joseph.angan yangan ump, a' thaa' pench ump nungantakam, a' jail.aman pent ngul. A' nil ngook min ngooncha, a' wamp Pharaoh.ant. Nil Pharaoh.an thaw Joseph.ant, “Ngay pithanga, puth than wiyang ngath ke' waa'iythan. Ngay wik ngeeyangan nungkarama, nint ep pithan waa'-waa'angan.” Nil puth Joseph.an thaw Pharaoh.ant, “God ngatharamang ngul wik min waa'owar pith nungkaramakaniya.” Ngul Pharaoh.an thaw Joseph.ant, “Pithan inana: Ngayan wo'uw Nile.ang wonkang than-thanang, ananiya, min cows wuut pi'-pi'anam 7 pentin wo'uw amanaman. / Than wakan mungk-mungkin-a, 7 cows many olmp-olmpiy anangan pentin wo'uw anpal, a' 7 cows wuut pi'an kempatiy anangan lokang thu'in thanang. Ngul anpalaniya, ngay wur ekangan, a' koyam weep wunangan, a' thonangan pithangan. May corn 7 pi'-pi'anam yuk thonamang em-emin. Ngula, corn 7 way anangan em-emin yukangan, a' ya' lokang thu'in thanang may corn pi'-pi'anam anangan.”

25-36 Anpalaniya, Joseph.an thaw Pharaoh.ant, “Pith inaniya, ka' thonangan ka'athaman pithan God.angan meenath nil ngeen ngulan kuchow ngampar. Ngulana, ngamp may thakan thaa' wantar pi'āmp kaap 7.angan aak inganiya Egypt.angana. Anpalaniya, aak way ngul wampow ngampar, ngak ke' uk-ukowa, a' ngamp may ke'anang wunāmp kaap 7.angan. Nint pam kuchek min mi'ān nil yipam moom iiyow mayak thakan. Nil pam alangan yipam pam kuchow thanang mayan ma' yalmathayn yim-yimanangaman kaap min-minangam, a' than may anangan sheds.ang wunpayn thanang yipam kaap wayangana, may thampang uwayn ngampang.”

37-45 Anpalaniya, nil Pharaoh.an thaw Joseph.an “God.angan kuchek min thee' nungk a! Ngay work ngatharaman-a, a' pam wanch aak inan Egypt.angan wuntan, ma' nungkarang wantāng! Nint pi'ān thanang.” Ngula, Pharaoh.angan ring ma' nungantam anpalan thapath, a' ma' Joseph.antang thench, a' puth ngook min ngoonchathan, a' manangan gold necklace ngoonchathan. An-aniyangan, nil Joseph.an kaap 30.ang want nunang. A' nil King Pharaoh koman aak Egypt.am uw nungant, Joseph.ant. A' pul ngentuwpul ngul. Namp nungantiya, koman alantamaniya, Asenath, A' puk wuut kucham uwpul ngul, Manasseha, Ephraim.

46-57 Anpalana, kaap 7 minangan uw thanang. Than Josepha, puth pam nungantam wee'anang may ma' yalmathin, a' sheds pi'-pi'anangan thench-thenchin aak pal puuy Egypt.angan. / An kaap 7 min minch ngulan-a, kaap 7 ma' thaanchang ngul uw thanang. Than pam wanch ananganiya, Pharaoh.ant ngul thawin mayak. Nil Pharoah.an thaw thant, “Niiy Joseph.ant iiyāna! Wik nungantaman ngeeyāna! A' nil may ngul thee'ow niiyant.” Than Joseph wee'ananga, sheds anangan thaa'an tha'athin ngul, a' than pam wanch aak Egypt.am al-alangan may piiyin thanttaman, Aak ma' thaanchaniya, aak nath-nathan wamp thant, may ke'anangan wunin. Than pama, wanch nath-nath-palana, Joseph wee'anang thant wampin mayan piiyin thanttaman.