1-5 Aak Canaan.angan yim-yimanang may ke'anang wunin. / Nil Jacob.angan ngeey aak Egypt.an may thampangan-a, nil thaw puk nungantam al-alantan, “Niiy aak Egypt.ak iiyāna! may ngampar anpalan piiyāna!” thaw thant. Than Joseph.antaman wuny-kunch 10 anangan iiyin ngul. Puth Jacob.angan Benjamin.an kuunch many thanttam ke'am kuchan thanttanganiy, puth nil thaw thant, “Ngay ngangk wiy-wiyam, nil puth ngul mul wuniy yaaka.”

6-7 Ngul-ngulan-a, than kuunch Joseph.antam anangan wampin aak Egypt.angan. Than wampina, aakakam thuchin Joseph.antan. Nil Joseph.angan kan thiich thanang kuunch nungantam anangan, puth thanan kuunch nungantam al-alangan ke'am thiichin nunang. Nil Joseph.an wik pi'anang wak thanang, “Niiy aak wanttinpal wampan ee?” thaw thant. Thanan thawin nungant, “Ngan anpal wampan aak Canaan.ama, may piiyanakana.”

8-17 Ngula, Joseph.angan pith nungantaman ngaantam-ngeey, a' thaw thant, “Niiy nan yaa'an wampan-a, aak nganttam inan thathāna. Niiy yaa'-yaa'anang wampana yipam niiy aak way inan thathān, niiy yipmam ngulan palam wampān, a' kul ngul yumpāna!” Thanan puth kuunch nungantaman thawin nungant, “Appang, ngan ya'wey mooma! nganwey kan-kanam mayak wampana, inpalan piiyāna,” thawin nungant. Nganwey puk 12-a, pam thonamantama, aak Canaan.am anpalana. Nil kuunch many nganttam anman wantan nunang, piip nganttamantanga, puth thonan ya' utham.” Nil Joseph.an thaw thant, “Ngay kan yaa'an paathāng niiyang. Ngay kaangk thathāng pont many niiyantaman. / Nil ke' wampiy aak iikanakan-a, an niiy ke' iiyin aak inpalan ya'a!” “Nil thonam iiyowa, pal kalowana, niiy inangan ingam jail.ang wunāna. / Wik niiyantaman kan-kanam ya'ana, ngay mee'miiy niiy yaa'an wampana, aak thathanakaniya!” Nil Joseph.angan jail.ang ngul wunp thanang aak ma'-ko'alamak.

18-25 / Ma'-ko'alam kanan paanthin-a, nil Joseph.an thaw thant, “Niiy in ngeeyāna! Ngay niiyant thawāng. Ngay God.an ngaantam-ngeey-ngeeyang nunanga, nanpalan ngay wik min yumpang niiyant. Nil thonam ingman wunow jail.ang. Niiy wiyan ep iiyān may kalān wancha, puk niiyantamak. Pont many niiyantamana, pal kalān nunang ngathar, ngay yipam ngaantam-ngeeyāng wik niiyantaman kan-kanam yaaka'. Anpalaniya, / pont niiyantaman kanan wampathān nunang-a, ngay niiyant putham may thakan thee'āng, niiy ke' puth yipam mul wunān.” Nil Joseph.an wik Egypt.am thaw-thaw thant, nil pam thonamangan waa'-waa' thant, nil Joseph.an wantakan thaw thant.

Thanan puth thawin thanttakam, “Ngamp keenkan puth wayan iiyamp pont many ngamparamantan. Ngampan kan thathampan nil peeyan ngamparan, puth ngampan ke'am ngeeyampa. Nanpalan aak way inan wamp ngampara.” Nil Reuben.an thaw thant, “Ngay niiyant kan thawang, puk manyan ke' kuchin nunang, puth niiy ngayang wik ke'am ngeeyan.” Nil Joseph.angan wik kanam ngeey thanang, nil puth Joseph.an ya' weent thanttam, a' peey thanttam ngul. Ngul-ngulaniya, Joseph.an palam wamp, a' Simeon ma' kuuyang kathan. Anpalaniya, Joseph.an itangam thaw pam nungantamant, “Niiyalang, bags thanttaman mayang thaa' matathāna! Money pam al-alantaman koyam bag thanttamang wunpāna! a' may aathān thanang, than yipam may mungkayn wooyan wakanangan.” Than puth pam nungantan work iiy-iiyin than wik ngeeyin nunang.

26-28 Anpalaniya, than kuunch Joseph.antamangana, than donkeys thanttamang bags yot wunpin, a' kan-ngul iiyin. Kinch-wayang ngulana, paanthin, nil pam thonamang bag nungantam thaa’ tha'a, donkey nungantam may aathanak. Nil ngul money.an thath may nungantang kenyang wun-wunin. Ngul nilan thaw thant kuunch nungantamant, “Ayyang, niiyalang, money ngatharam inman bag ngatharanga!” Than puth yotam anangan winynyang weemin, a' thawin, “God.an wantak ngul weem ngampara?”

29-38 / Than kan-ngulan wampin aak Canaanang'an-a, than wik kath waa'in nungant piip thanttamantan. Ngula, Jacob.an thaw thant, “Joseph in ya'a, a' Simeon in ya'a ngul, in niiy Benjamin ngul kalān nunang ey? In niiy ngayang ngangk way yump-yumpanniiya.” Reuben.an ngul thaw piip-kunchant, “Nint Benjamin.an ma' ngatharang wantān nunanga! / Ngay ke'wey wampathāng nunang palaman nungkar-a, nint puth puk ngatharam kuchaman mulathān pulanga.” Nil puth Jacob.an thaw, “Puk many ngatharaman ke' iiyow niiyantanga.”