1-15 / Nil Joseph.angan wik anan ngeey-a, an putham war'am peey, a' pam nungantam anangan yotam kuch thanang yoon. Ngul ananiya, nil Joseph.angan othamayan peeyath thanang kuunch nungantam anangan. Than pam wanch yotangan wik ngeeyin nunang peey-peeyaniy. Joseph.an thaw kuunch nungantamant, “Ngay in Josepha! Ngul nil piip ngamparaman man-yatham kan-kanam ey?” Thanan kuunch nungantaman ke'am thawin nungant, than thaa'am ikin. Joseph.an thaw thant, “ / Niiy ngayang pam al-alantan thee'an aak Midian.aman-a, thanan ngayang pal aak iikanakan wampathin aak Egypt.ak. Puth niiyan ke' waa'ān niiyantakam. God.ang ngayang keenk kuch yipam man-yatham pi'āng niiyang, yipam ke' uthamān. God.ang ngayang wunp aak Egypt inan ngay pi'āng. An kaap kuchamang aak way ma' thaanchaniy wamp, an aak way kaap 5 yippak wampow ngampar. Niiy erkam iiyān piip ngamparamant, a' thawān nungant pama, wancha, yuk way min pal wampathow thanang aak Egypt.ak. / Ngul anan aak wayan wunow-a, ngay yipmam niiyang ingan thinth-thinth pi'āng. Niiy mee'miiy ngula, ngay Joseph.an. Ngay niiyant kan-kanam thaw-thawang.” Joseph.angan Benjamin ompam kathan, a' thanang wiy kuunch nungantam anangan ompam kath-kath thanang.

16-28 / Nil Pharaoh.angan ngeey kuunch Joseph.antaman wampin-a, nil ngangk min ngul wun. Ngula, nil thaw Joseph.ant, “Nint kuunch nungkaramant thawān thant wagons.an kalayn koyam aak Canaan.aka. A' than piip niiyantama, pama, wancha, puk anangan pal kalayn thanang.” Nil Joseph.angan maya, ngook thee' thant iiyanakan, a' moneya, ngook yot-yotam thee' Benjamin.ant. Nil donkeysa, may yot thakan kuch piip-kunchantaniy.

Thanan kuunch Joseph.antam'aniy-a, kan-ngul koyam iiyin aak Canaan.ak, a' wampinana, than wik waa'in nunang Joseph.an piip thanttam Jacob.ant. Nil puth Jacob.an popam anman nyiin-nyiin. / Ngul nil wagons.an thath Joseph.angan kuchant-a, nil Jacob.an ngangk min paththam wun, a' thaw, “Yaa, kan-kanam nil Joseph.an man-yatham yippak aa! Ngay kan iiyānga, thathāng nunang ngay mul ngulan yipam wunānga.”