1 Ri Jesús xujeq tanchi kakꞌutun chuchiꞌ ri mar y lik e kꞌi ri tikawex xemolotaj chiriꞌ pa kꞌo wi Rire. Ruma kꞌu riꞌ xok chupa jun barco kꞌo chwi ri mar, xtzꞌuyiꞌ chupa y konoje ri tikawex e kꞌo pana chuchiꞌ la mar. 2 Xujeq kꞌu kakꞌutun chikiwach rukꞌ ukꞌiyal taq kꞌambꞌal naꞌoj, yey jun che taq rukꞌutunik e waꞌ:

3 «¡Chitapeꞌ! Kꞌo jun awanel xel bꞌi chaꞌ keꞌawanoq. 4 Ekꞌuchiriꞌ katajin che ujopopexik rijaꞌ,*E rojertan chilaꞌ Israel echiriꞌ kakiꞌan rawanik re ri trigo xa kakijopopej rijaꞌ pulew, tekꞌuchiriꞌ kakichꞌuq uwiꞌ rukꞌ ulew. kꞌo xtzaq kan chuchiꞌ ri bꞌe. Xekꞌun kꞌu lo tzꞌikin, y xoꞌlkitija bꞌi.

5 »Kꞌo ijaꞌ xtzaq kan pa taq abꞌaj; yey ruma na jinta ukꞌiyal ulew chuxeꞌ, xel tan lo rijaꞌ. 6 Ekꞌuchiriꞌ xel lo ri qꞌij, xkꞌatik; yey ruma na jinta ratzꞌayaq, xchaqijik.

7 »Kꞌo ijaꞌ xtzaq kan pa taq kꞌiix. Echiriꞌ ri kꞌiix xkꞌiyik, rijaꞌ xjiqꞌ kan chuxeꞌ; ruma kꞌu riꞌ, na jinta reqaꞌn xuyaꞌo.

8 »Noꞌj kꞌo ijaꞌ xtzaq kan pa chomilaj ulew. Ekꞌu riꞌ waꞌ xel loq, xkꞌiyik y lik xuꞌan reqaꞌn. Kꞌo jujun raqan xuya treinta, jujun chik xuya sesenta y kꞌo ne xuya jun ciento» xchaꞌ.

9 Ekꞌuchiriꞌ, ri Jesús xubꞌiꞌij tanchi chike: «China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.

10 Echiriꞌ ri Jesús xkanaj kan utukel, ri e kꞌo chunaqaj y ri kabꞌlajuj utijoꞌn xeqibꞌ rukꞌ, xkitzꞌonoj kꞌu che saꞌ keꞌelawi wa kꞌambꞌal naꞌoj xuya chike. 11 Ekꞌu ri Jesús xubꞌiꞌij chike:

«Chiwe riꞌix yaꞌtalik kaqꞌalajisax runaꞌoj ri Dios chwi rutaqanik. Noꞌj chike taq ri winaq na e jinta chupa rutaqanik, xa rukꞌ taq kꞌambꞌal naꞌoj kabꞌiꞌx ronoje chike. 12 Ma tobꞌ rike ketzuꞌnik, e junam rukꞌ na ketzuꞌn taj; tobꞌ ketanik, e junam rukꞌ na ketan taj y e riꞌ na jinta kꞌo kakimaj usukꞌ. Na kakaj ta kꞌu riꞌ kakitzelej kitzij chaꞌ jelaꞌ kakuytaj kimak»*Is. 6:9-10 xchaꞌ.

13 Ekꞌuchiriꞌ, xutzꞌonoj chike:

«¿Na kimaj ta kami usukꞌ riꞌ wa kꞌambꞌal naꞌoj? ¿Saꞌ kꞌu uꞌanik riꞌ kimaj usukꞌ ronoje taq ri kꞌambꞌal naꞌoj kankꞌut chiwach?

14 »Ri awanel e pachaꞌ ri katikow Ruchꞌaꞌtem ri Dios.

15 »E kꞌo kꞌu jujun tikawex e pachaꞌ rijaꞌ xtzaq kan chuchiꞌ ri bꞌe; waꞌ xtik Ruchꞌaꞌtem ri Dios pa kanimaꞌ y kakita ne riꞌ. Pero kakꞌun kꞌu lo ri Satanás y kumaj bꞌi ri Chꞌaꞌtem xtikiꞌ pa kanimaꞌ.

16 »E kꞌo jujun chik e pachaꞌ rijaꞌ xtzaq kan pa taq abꞌaj. Waꞌ e ri kakita Ruchꞌaꞌtem ri Dios y na jampatana kakikꞌul rukꞌ kiꞌkotemal. 17 Pero ruma na e tikil ta chi utz, na kekowin taj. Ma echiriꞌ kakꞌun lo ri kꞌambꞌal kipa o keternabꞌex rukꞌ kꞌax ruma kikꞌulum Ruchꞌaꞌtem ri Dios, kepajtaj kꞌu riꞌ.

18 »E kꞌo jujun chik e pachaꞌ rijaꞌ xtzaq kan pa taq kꞌiix. Waꞌ e ri ketaw Ruchꞌaꞌtem ri Dios. 19 Pero rubꞌis kikꞌuꞌx chwi taq ri kajawax chike, rukꞌ ri sokosoꞌnik re ri bꞌeyomalil y ri kirayibꞌal che taq ronoje ri kꞌolik; ronoje kꞌu waꞌ e kusach uwach Ruchꞌaꞌtem ri Dios kꞌo pa kanimaꞌ. Ruma taq kꞌu riꞌ waꞌ na jinta kꞌana kijiqꞌobꞌalil kilitaj che ri kibꞌinik.

20 »E kꞌo kꞌu jujun e jelaꞌ pachaꞌ rijaꞌ xtzaq pa chomilaj ulew. Waꞌ e ri kakita Ruchꞌaꞌtem ri Dios, kakikꞌul chi utz y lik kꞌo kijiqꞌobꞌalil kilitaj che ri kibꞌinik. E jelaꞌ pachaꞌ rijaꞌ lik xuꞌan reqaꞌn; kꞌo jujun raqan xuya treinta, jujun chik xuya sesenta y kꞌo ne xuya jun ciento» xchaꞌ.

21 Ri Jesús xubꞌiꞌij tanchi chike:

«¿Kꞌo nebꞌa junoq kutzij juna aqꞌ y kuchꞌuq uwiꞌ rukꞌ juna mulul re pajbꞌal o kujuꞌ chuxeꞌ ruwarabꞌal? ¿Na re ta nebꞌa kuya lo chupa rukꞌolibꞌal chikaj? 22 Ma kopon ri qꞌij echiriꞌ janipa ri na qꞌalajisam taj, kaqꞌalajisax na; yey janipa ri ewatalik, ketaꞌmaxik. 23 China kꞌu ri kꞌo utanibꞌal che utayik, ¡chuta kꞌu riꞌ!» xchaꞌ.

24 Jewaꞌ xubꞌiꞌij tanchi chike:

«Lik chita chi utz janipa ri kambꞌiꞌij chiwe, ma “rukꞌ ri pajbꞌal kixpajan wi riꞌix, rukꞌ tanchi wa pajbꞌal kaꞌan pajanik chiwe.” Ekꞌu ri Dios kuya na chiwe lik kimaj usukꞌ ri kambꞌiꞌij, we lik e kita ri nutzij. 25 Ma china ri kukꞌul chi utz janipa ri kakꞌut chwach, riꞌ kakꞌut ne más chwach y jekꞌulaꞌ kumaj más. Yey china ri na kukꞌul ta ri kakꞌut chwach, riꞌ kamaj ne che janipa ri kuchꞌobꞌo umajom chi usukꞌ» xcha ri Jesús.

26 Xubꞌiꞌij tanchi ri Jesús chike:

«Rutaqanik ri Dios e jelaꞌ pachaꞌ juna achi kutik rijaꞌ pulew. 27 Rachi chaqꞌabꞌ keꞌwaroq y paqꞌij kawaꞌlij tanchik; yey na kumaj ta usukꞌ suꞌanik kel lo rijaꞌ y kakꞌiyik. 28 Ma rulew utukel kuꞌan ribꞌ che ukꞌiyisaxik ri tikoꞌn. Nabꞌe na e kel lo ri raqan ri tikoꞌn, teran kꞌu lo rutzikꞌ; tekꞌuchiriꞌ, kawachinik. 29 Ekꞌuchiriꞌ ya xriꞌjobꞌik, katzaq bꞌi ri jos che ma e riꞌ xopon ruqꞌijol molonik» xchaꞌ.

30 Xubꞌiꞌij tanchi ri Jesús:

«¿Saꞌ rukꞌ kaqajunimaj wi rutaqanik ri Dios, o saꞌ juna kꞌambꞌal naꞌoj kuqꞌalajisaj waꞌ? 31 E pachaꞌ rijaꞌ re moxtasa echiriꞌ katik pulew. Ma e ijaꞌ waꞌ más chꞌutiꞌn chwa taq rijaꞌ kꞌo che ruwachulew, 32 pero echiriꞌ tikital chik, we xkꞌiyik más kanimar chwa taq ri tikoꞌn kꞌo pa ri werta. Kel kꞌu lo nimaq taq uqꞌabꞌ y kekꞌun lo ri tzꞌikin kexikꞌikꞌ che ruwa kaj y kejeqiꞌ chuxeꞌ rumuꞌj» xchaꞌ.

33 Rukꞌ ukꞌiyal taq kꞌambꞌal naꞌoj pachaꞌ taq waꞌ, xkꞌutun ri Jesús puwi Ruchꞌaꞌtem ri Dios, e chirij ri kakimaj usukꞌ ri winaq. 34 Y na jinta kꞌo xukꞌutu we na rukꞌ ta kꞌambꞌal naꞌoj xuꞌano; noꞌj chike rutijoꞌn xuqꞌalajisaj ronoje echiriꞌ e kꞌo kitukel.

35 Chupa kꞌu laꞌ la jun qꞌij echiriꞌ xok raqꞌabꞌ, ri Jesús xubꞌiꞌij chike rutijoꞌn:

—Joꞌ, chojqꞌax chꞌaqa yaꞌ —xcha chike.

36 Echiriꞌ ebꞌuchꞌaꞌbꞌem chi kan rukꞌiyal winaq, rutijoꞌn xkikꞌam bꞌi ri Jesús e laꞌ chupa ri barco pa tzꞌul wi Rire, yey e kꞌo chi jujun barcos ekachbꞌilam bꞌi.

37 Xpe kꞌu jun nimalaj kaqjiqꞌ chwi ri mar. Ekꞌu ri yaꞌ kuroj ribꞌ che ri barco; y waꞌ xujeq kanoj che yaꞌ, ya laj kamuqutajik. 38 Ekꞌu ri Jesús kꞌo pa ri barco pukꞌisbꞌal re chirij, kawar chwi jun chꞌakat.

Rutijoꞌn xeꞌkikꞌosoj y jewaꞌ xkibꞌiꞌij che:

—¡Qajawal! ¿Na kok ta kami la il chiqe? ¡Ma ya kojkamik! —xechaꞌ.

39 Ekꞌu ri Jesús xyaktajik, xuqꞌatej ri kaqjiqꞌ y jewaꞌ xubꞌiꞌij che ri yaꞌ:

—¡Chat-tanaloq! ¡Chatkubꞌuloq! —xcha che. Ri kaqjiqꞌ xtaniꞌik y ri yaꞌ xyeniꞌik.

40 Tekꞌuchiriꞌ, xubꞌiꞌij chike rutijoꞌn:

—¿Suꞌchak lik kixiꞌij iwibꞌ? ¿Suꞌbꞌe na kubꞌul ta ikꞌuꞌx wukꞌ? —xcha chike.

41 Ewi xok lo jun xiꞌin ibꞌ kukꞌ y xkibꞌiꞌij chikiwach:

—¿Saꞌ ruwach waꞌ waꞌchi? ¡Ma tobꞌ ne e ri kaqjiqꞌ y ri yaꞌ kakikoj utzij! —xechaꞌ.