15
Katzꞌaq uchiꞌ ri Jesús chwach ri taqanel Pilato
(Mt. 27:11-14; Jn. 18:33-40)
1 Echiriꞌ xsaqirik, ri nimaq e aj chakunel pa Rocho Dios kukꞌ taq ri nimaq winaq re ri tinamit, raj kꞌutunel re ri tzijpixabꞌ y konoje ri uchapom wi ribꞌ ri qꞌatbꞌal tzij, kiꞌanom chi tzij chikiwach puwi saꞌ ri kakiꞌan rukꞌ ri Jesús. Xkikꞌam kꞌu bꞌi ri Jesús yututalik y xeꞌkiyaꞌa chwach ri taqanel Pilato. 2 Ri Pilato xutzꞌonoj kꞌu che ri Jesús:
—¿Lal kami riꞌ ri rey ke raj judiꞌabꞌ? —xcha che.
Ri Jesús xukꞌul uwach:
—Lal kabꞌiꞌn la re —xcha che.
3 Yey ri nimaq e aj chakunel pa Rocho Dios lik kakitzꞌaq uchiꞌ.
4 Xutzꞌonoj tanchi kꞌu ri taqanel Pilato che:
—¿E kami laꞌ na kakꞌul ta la uwach? ¿Na kata ta kami la janipa chi mak kakikoj chiꞌij la? —xcha che.
5 Na rukꞌ ta kꞌu riꞌ, ri Jesús na xukꞌul ta uwach. Ruma kꞌu waꞌ, ri Pilato lik xkam ranimaꞌ che.
Kaqꞌat tzij re kamik puwi ri Jesús
(Mt. 27:15-31; Lc. 23:13-25; Jn. 19:1-16)
6 Chupa kꞌu ri nimaqꞌij Pascua, ri taqanel romano xex kuꞌan wi kuyolopij bꞌi jun chike ri e kꞌo pa cárcel, yey e ri winaq kechaꞌwik china ri kakaj kayolopix bꞌi. 7 Kꞌo kꞌu jun achi Barrabás rubꞌiꞌ, rire kꞌo pa cárcel kukꞌ jujun rachbꞌiꞌil ruma xkiꞌan kamik echiriꞌ xeyaktaj chirij ri taqanel aj Roma. 8 Xebꞌopon kꞌu ukꞌiyal winaq chwach ri taqanel Pilato y xkijeq utzꞌonoxik che e kuꞌan pachaꞌ taq ri uꞌanom lo ronoje junabꞌ.
9 Ewi ri taqanel Pilato xutzꞌonoj chike:
—¿Kaꞌaj alaq kanyolopij bꞌi ri rey ke raj judiꞌabꞌ? —xchaꞌ. 10 Xubꞌiꞌij waꞌ ma retaꞌam ri nimaq e aj chakunel pa Rocho Dios xeꞌkiyaꞌa ri Jesús chwach, xa ruma kꞌax kikꞌuꞌx chirij.
11 Ekꞌu ri nimaq e aj chakunel pa Rocho Dios xkikoj pa kijolom ri ukꞌiyal winaq e kakitzꞌonoj kayolopix bꞌi ri Barrabás. Yey rike jelaꞌ xkiꞌano.
12 Ri Pilato xutzꞌonoj tanchi chike:
—¿Saꞌ kꞌu riꞌ kaꞌaj alaq kanꞌan rukꞌ ri kabꞌiꞌij alaq e rey ke raj judiꞌabꞌ? —xchaꞌ.
13 Yey ri winaq lik xesikꞌin tanchi che ukꞌulik uwach:
—¡Kamisax chwa cruz! —xechaꞌ.
14 Ekꞌu ri taqanel Pilato xutzꞌonoj chike:
—¿Saꞌ kꞌu rumak uꞌanom? —xchaꞌ.
Noꞌj ri winaq más ko xesikꞌinik:
—¡Kamisax chwa cruz! —xechaꞌ.
15 Ewi ri Pilato xa ruma xraj kakanaj kan chi utz kukꞌ rukꞌiyal winaq, e xuyolopij bꞌi ri Barrabás. Yey xebꞌutaq ri soldados che ujichꞌik upa ri Jesús. Tekꞌuchiriꞌ, xuya bꞌi pakiqꞌabꞌ re kakikamisaj chwa cruz.
16 Ri soldados xkikꞌam kꞌu bꞌi ri Jesús che ruwa ja re rupalacio ri taqanel. Chiriꞌ xmoliꞌ kichiꞌ konoje taq ri soldados. 17 Ekꞌu ri soldados xkikoj jun kꞌul morato*“Morato”: Kil “púrpura” pa vocabulario. che ri Jesús. Che kꞌu rujolom xkikoj jun corona pachꞌum rukꞌ kꞌiix. 18 Xkijeq kꞌu kesikꞌin che, jewaꞌ kakibꞌiꞌij:
—¡Nim uqꞌij ri rey ke raj judiꞌabꞌ! —kechaꞌ.
19 Kakichꞌay rujolom rukꞌ jukutaj tani y kakichubꞌaj rupalaj. Kakixukubꞌaꞌ kꞌu kibꞌ chwach, lik xa uꞌanikil kakiyak uqꞌij. 20 Echiriꞌ ya lik xkichꞌamij, xkesaj ri kꞌul morato kikojom che y xkikoj tanchi ruqꞌuꞌ. Xkesaj kꞌu bꞌi chaꞌ keꞌkikamisaj chwa cruz.
Rukamik ri Jesús chwa ri cruz
(Mt. 27:32-56; Lc. 23:26-49; Jn. 19:17-30)
21 Kꞌo kꞌu jun achi aj Cirene petinaq pa juyubꞌ e riꞌ kikꞌow chiriꞌ. Ekꞌu ri soldados xkitaq che kutelej bꞌi ri cruz re ri Jesús. Rachi, Simón rubꞌiꞌ, rire e kiqaw ri Alejandro y Rufo.
22 Y xkikꞌam bꞌi ri Jesús pa jun luwar Gólgota kabꞌiꞌx che, waꞌ keꞌelawi “luwar re ubꞌaqil ujolom animaꞌ”. 23 Yey xkiyaꞌ che ri Jesús vino kojotal mirra rukꞌ; noꞌj Rire na xutij taj.
24 Echiriꞌ kiyaꞌom chi ri Jesús chwa ri cruz, ri soldados rukꞌ jun sorteo xkijach kibꞌ puwi ruqꞌuꞌ chaꞌ kakilo saꞌ taq ri kakikꞌam bꞌi chikijujunal.
25 Anim che ri ubꞌelej ora,†“Ri ubꞌelej ora”: Kil “hora” pa vocabulario. xkiya ri Jesús chwa ri cruz. 26 Chwi kꞌu lo rucruz ri Jesús tzꞌibꞌitalik suꞌbꞌe xqꞌat tzij puwiꞌ, jewaꞌ kubꞌiꞌij: «RI REY KE RAJ JUDIꞌABꞌ.»
27 Xekiya kꞌu kaꞌibꞌ eleqꞌomabꞌ chwa cruz, jun puwikiqꞌabꞌ y jun pumox ri Jesús.
28 Ekꞌu xuꞌana riꞌ ri tzꞌibꞌital kan chupa Rutzij Upixabꞌ ri Dios:
E jun Rire xajilax bꞌi kukꞌ ri winaq itzel kikꞌuꞌx. Is. 53:12
29 Ri winaq kebꞌikꞌow chiriꞌ kakiyoqꞌ kanoq, kakiyiriyaꞌ ri kijolom che y jekꞌuwaꞌ kakibꞌiꞌij che:
—¡Ah! At peꞌ ri abꞌiꞌim kawulij ri Rocho Dios y xa pa oxibꞌ qꞌij kayak tanchik. 30 Chakolobꞌej kꞌu awibꞌ riꞌ y chatqaj lo chwa ri cruz —kechaꞌ.
31 Jenelaꞌ riꞌ xkiꞌan ri nimaq e aj chakunel pa Rocho Dios junam kukꞌ raj kꞌutunel re ri tzijpixabꞌ; rike lik kakichꞌamij, jewaꞌ kakibꞌiꞌij chikiwach:
—Lik waꞌ kꞌut e kꞌi ri xebꞌukolobꞌej che taq yabꞌil y che kamik, yey na kuriq ta waꞌ ukolobꞌexik ribꞌ rire. 32 Laꞌ laꞌchi kabꞌiꞌx “Cristo, Rey ke Raj Israel” che, qaja lo riꞌ utukel chwa ri cruz chaꞌ kaqilo y jelaꞌ kaqakojo e rire ri Uchaꞌoꞌn lo ri Dios —kechaꞌ.
Y jenelaꞌ ri kaꞌibꞌ eyaꞌom chwa cruz junam rukꞌ, lik xkichꞌamij Rire.
33 Ekꞌuchiriꞌ xtikꞌoj ri qꞌij, xok qꞌequꞌm che ruwachulew y waꞌ xuꞌkꞌisa kꞌa che ri urox ora bꞌenaq qꞌij. 34 Chupa kꞌu laꞌ la ora, ri Jesús lik ko xsikꞌinik, jewaꞌ xubꞌiꞌij pa ri chꞌaꞌtem kachꞌaꞌt wi Rire:
—Eloi, Eloi, ¿lama sabactani? —xchaꞌ. Waꞌ keꞌelawi: “Lal nu Dios, Lal nu Dios, ¿suꞌbꞌe xinoqꞌotaj kan la?”*Sal. 22:1
35 Jujun kꞌu chike ri e kꞌo chiriꞌ, echiriꞌ xkita waꞌ, xkibꞌiꞌij:
—Chitapeꞌ, waꞌchi e kusikꞌij ri qꞌalajisanel Elías —xechaꞌ.
36 Kꞌo kꞌu jun xeꞌek lik kanik, xumuꞌ jun esponja pa vinagre, xuxim kꞌu chutzaꞌm jun tani y xuya pan che ri Jesús re kutzꞌubꞌu, y jekꞌuwaꞌ xubꞌiꞌij:
—Qila peꞌ we kakꞌun ri Elías re koluꞌqasaj lo chwa ri cruz —xchaꞌ.
37 Noꞌj ri Jesús lik ko xsikꞌinik y jelaꞌ xkamik. 38 Ekꞌuchiriꞌ, ri telón kꞌo chupa ri Rocho Dios‡“Telón”: E jun kꞌul kujach upa ri Luwar Santo rukꞌ ri Luwar lik Santo. Éx. 26:31-33; Heb. 6:19; 9:3-12 xrichꞌrobꞌ chunikꞌajal; xujeq lo puwiꞌ y xoꞌlkꞌis kꞌa chuxeꞌ.
39 Ekꞌu ri capitán§“Capitán”: Waꞌ e aj wach ke cien soldados. takꞌal chwach ri Jesús, echiriꞌ xuto xsikꞌinik yey xrilo saꞌ rukamik, jewaꞌ xubꞌiꞌij:
—¡Paqatzij wi, waꞌ waꞌchi e Ukꞌajol ri Dios! —xchaꞌ.
40 E kꞌo kꞌu jujun ixoqibꞌ kakitzutzaꞌ pana chinimanaj. Chikixoꞌl waꞌ e kꞌo ri María ri aj Magdala, ri Salomé y ri María kichu ri Jacobo (ri más kꞌakꞌal) y ri José. 41 Waꞌ wa ixoqibꞌ lik xeterej chirij ri Jesús y lik kinimam loq echiriꞌ Rire kꞌo Galilea. Rike kukꞌ jujun chik ukꞌiyal ixoqibꞌ, xepaqiꞌ lo rukꞌ pa ri tinamit Jerusalem.
Ri Jesús kamuqik
(Mt. 27:57-61; Lc. 23:50-56; Jn. 19:38-42)
42 Bꞌenaq qꞌij, echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri qꞌij re uxlanibꞌal, 43 ri José aj Arimatea xok chwach ri taqanel Pilato y na xuxiꞌij ta kꞌana ribꞌ xutzꞌonoj rucuerpo ri Jesús**Chupa taq rutaqanik ri Dios kubꞌiꞌij we kꞌo junoq kakamisax chwa cheꞌ, chirajawaxik kamuqik echiriꞌ kꞌamajaꞌ kok raqꞌabꞌ. Ruma kꞌu waꞌ, ri José xraj kumuq kan rucuerpo ri Jesús echiriꞌ kꞌamajaꞌ kajeqer ri qꞌij re uxlanibꞌal yey waꞌ kajeqer pa rokibꞌal aqꞌabꞌ. Dt. 21:22-23 chaꞌ kukꞌam bꞌi. (Ri José lik kꞌo uwach chike ri uchapom wi ribꞌ ri qꞌatbꞌal tzij yey lik royeꞌem rukꞌunibꞌal rutaqanik ri Dios.)
44 Ri Pilato lik xkam ranimaꞌ che echiriꞌ xuto kaminaq chi ri Jesús. Ewi xusikꞌij ri capitán chaꞌ kutzꞌonoj che we qatzij. 45 Echiriꞌ xuta chi uchiꞌ ri capitán kaminaq chi ri Jesús, xuya luwar che ri José kukꞌam bꞌi rucuerpo.
46 Ekꞌu ri José xuloqꞌ jun manta, xuqasaj lo rucuerpo ri Jesús chwa ri cruz y xupis bꞌi chupa ri manta. Xuꞌyaꞌa kꞌu riꞌ chupa jun muqubꞌal kꞌotom paꞌbꞌaj y xutaq uketebꞌaxik kan jun nimalaj abꞌaj chuchiꞌ re tzꞌapibꞌal re. 47 Yey ri María ri aj Magdala y ri María ruchu ri José, xkilo pa xmuq kan wi.
*15:17 “Morato”: Kil “púrpura” pa vocabulario.
†15:25 “Ri ubꞌelej ora”: Kil “hora” pa vocabulario.
*15:34 Sal. 22:1
‡15:38 “Telón”: E jun kꞌul kujach upa ri Luwar Santo rukꞌ ri Luwar lik Santo. Éx. 26:31-33; Heb. 6:19; 9:3-12
§15:39 “Capitán”: Waꞌ e aj wach ke cien soldados.
**15:43 Chupa taq rutaqanik ri Dios kubꞌiꞌij we kꞌo junoq kakamisax chwa cheꞌ, chirajawaxik kamuqik echiriꞌ kꞌamajaꞌ kok raqꞌabꞌ. Ruma kꞌu waꞌ, ri José xraj kumuq kan rucuerpo ri Jesús echiriꞌ kꞌamajaꞌ kajeqer ri qꞌij re uxlanibꞌal yey waꞌ kajeqer pa rokibꞌal aqꞌabꞌ. Dt. 21:22-23