Adzera Baibel 1 Petrus 2

Nifutsarif Isu Tauf Bini Mingꞌa Ratar

1 Agam isu faꞌ sib, ibinigi da agam watangin sanab maisan santan agam nanga i rib fain da uwayant iyuꞌa nam da uwayant umpur i tsarifa runggam. Da watangin uwayant uda wangun maisan i garam mangan yaba i gan nam bunumpan ma binganggan tsiraꞌ da nan barun sib angu nabinigi. 2 Ibi mamaꞌ mitan inang da maran yari i sisun tutan, da agam nabinigi maram wari nayus i uda Anutu nanggan. Nigi sisu gurun nidzun bada mingꞌa Anutu gin da rima agam ganunggam sib i agam yingꞌa suda tsiraꞌ da uda riniurun i nanggam muarutsan sangꞌa agam waꞌan da Anutu nanggan rima agam sib aga. 3 I agam yintsaꞌ uwayant Nifutsarif nangan da agi, da agam isruꞌ gin sib i Nifutsarif igi bini funub.

4 Nifutsarif igi ibi tauf maran taꞌan da garam da sagat ibugin da itapu rai, da bitsintaꞌ Anutu iraga Arangan sib da itsanga Arangan bini funub. Gubuꞌ agam bada rutin, 5 da agam ibinigi ibi tauf maran taꞌan da Anutu inang da rutip agam isu ungar mararam aru garam gar mamida i tsangandan, i agam waꞌa bida garam utup mararam pumuꞌa Anutu wain* i rima nanggam mpadan suda dangki fadan da Anutu. Da Arangan maran yari i nam tsaradan igi iyab i nam Yisus Kristus nangan. 6 I Anutu nanggan kakaran mungꞌ ugu ini ibiani,

“Waringantin! Dzi rim tauf mangan imingꞌ gamp Saion.

Nigi tauf bini aru dzi ragadan ugu

i suda tauf miamun i antungꞌa ungar yaba gin.

Garam muarutsa Arangan, da rinin wasangꞌ i miaꞌan u.”

7 Ibinigi da mingꞌa agam garam muarutsa Arangan maranggam da tauf igi isu tauf bini funub. Da bitsintaꞌ mingꞌa garam mamida i muarutsan maranggan, da

“Tauf aru garam tipa ungar tapuda rai ugu

isu tauf bini iyus tauf santan i antungꞌa ungar yaba gin,”

8 da

“Arangan iwaꞌ ibi tauf mingꞌa rib sanaban

da ampi bingan bungꞌ autu fagan da naruaꞌ.”

Ribarangan inang da wasu ringa mafrip da Anutu u, ibinigi da ribarangan yutu fagan da ituꞌ, i Anutu iraga da ini sib mungꞌ i ribarangan bungꞌ anang nabinigi. 9 Da bitsintaꞌ Anutu iraga agam sib i suda Arangan utupan, da suda garam utup Anutu wain pumuꞌa agi King gangꞌ, da suda garam utup mararam tsiraꞌ, da Anutu garaman da sagatan runggan ragadan i suda i nanggan rururungan, i agam bungꞌ ani uwayant bini bini santan Arangan nanga yaba i agam wasi. I Arangan inuꞌ agam sinungꞌ nam mimindan agam mpada gin ugu da iyu agam yatangꞌ ba gan puatsadan gan bini yusan. 10 Mungꞌ da agam anungꞌ impa ibi garam utup bitsintaꞌ, da bitsintaꞌ aruani da agam impa ibi Anutu ampanggan. Mungꞌ da agam anungꞌ iyu Anutu nanggan maran ntuꞌan u, da bitsintaꞌ aruani da agam iyu Arangan nanggan maran ntuꞌan sib.

Agi Nayung Rururungan Wasaꞌ i Rib Faingꞌ Aga

11 Dzi rinungꞌ ruas, agam impa intap ani ibi garam gamp mangan da garam marawampua. Ibinigi da dzi gaib runggangꞌ da agam ibiani, agam warim barum da nam maisan santan wangun ratar gan, i uwayant tuasarunigi inang da irut agam ganunggam yis ruan. 12 Agam wayung rururungan angu wasaꞌ i garam marautu. I gubuꞌ ribarangan dzura nan umpur i agam bida agam nanga asub, da ribarangan bungꞌ atsanga agam gumam bini nangan da narim bingan tsiraꞌ da Anutu da gubuꞌ gan tipa badan aga i raruda garam gar.

13 Agam nanggam mpadan narim bingan tsiraꞌ da Nifutsarif. Ibinigi da watangꞌ warangꞌ i gabman gudzun rusan santan, king tsiraꞌ suda miamun i garam santan 14 da kiap ruas aru king tangindan i rima nam maisan mungaꞌ gan da rib atsungꞌa uwayant maisan da tsarifa rib atsungꞌa uwayant bini binganggan. 15 Anutu maran yari i agam atsungꞌa uwayant bini, da sanab bini bida nigi natsungin garam brabruꞌan nifun da gubuꞌ nida nan ruta uwayant maꞌan. 16 Agam wanang da wayung wabi rib mamida i mpada bida nam maisan mamaꞌ guman. Da bitsintaꞌ agam anungꞌ bunida binaꞌ, “Aruani da aga mpa utaꞌ,” da agam fadan da nanga asub mara maran. Imaꞌ, wayung abi Anutu mamaꞌ gum rusan. 17 Agam watsarif garam sib angu, da maram wari i raim rusam da nafum rusam santan mingꞌa Anutu utupan. Warat i Anutu da watangꞌ warangꞌ i Arangan, da warim bingan tsiraꞌ da king.

18 Agam mamaꞌ gum utaꞌ, agam watangꞌ warangꞌ i garam gudzun mpada tayangꞌ agam, da watsungꞌ ribarangan nanggan bini. Dzi anungꞌ ini garam gudzun bini mantsingꞌa nan da agam angu u, imaꞌ. Watangꞌ warangꞌ i garam gudzun nanga maisan i agam nabinigi. 19 I bida rib rima tsakia da garam mangan utaꞌ angu, da aranga buaringꞌa barabin arigi, i wain, aranga maran fura Anutu, da Anutu maran yari i uwayant bida nigi. 20 Bida agam nanga uwayant maisan da rib isa agam, da agam buaringꞌa tsakia arigi, da manga butsarifa agam in? Da bitsintaꞌ bida agam nanga uwayant bini da uda tsakia gin, da agam buaringꞌa barabin arigi, da Anutu maran yari i uwayant bida nigi. 21 I Anutu inuꞌ agam sib i buaringꞌa barabin da gubuꞌ agam nanga uwayant bini, i wain, Kristus ibinigi iyu tsakia i rima agam sib. Da Arangan isantingꞌ agam sib i uwayantan igi i agam atsungꞌa Arangan faga mpiampan.

22 Arangan anungꞌ inang asub mangan

ma ini nan umpur mangan u.

23 Rib ini nan maisan i rasuda Arangan, da bitsintaꞌ Arangan anungꞌ itip ini ribigi nanggan maisan mungaꞌ. Arangan iyu tsakia, da bitsintaꞌ anungꞌ ini ngaungꞌa rib rima tsakia rutin igi, imaꞌ. Arangan irim runggan i Anutu aru raruda garam santan i sanab rururungan igi banginggan. 24 Kristus itupriꞌ gai mpara i ruan da ibuaringꞌ agi maisan gaꞌ i gan riniubitan. Arangan inang ibinigi i agi sangꞌ i waꞌa bida garam mampan i anungꞌ runanga uwayant maisan, da bitsintaꞌ agi mpada marataꞌ i atsungꞌa uwayant rururungan. Rib yis Arangan bini angu, da yaba i riniubit tsitsiara i ruan aru Aranga udan da Arangan inang agam itip iwaꞌ bini. 25 Mungꞌ ugu da agam impa ibi dumpa yunga utaꞌ utaꞌ da atupa puatsi. Da bitsintaꞌ aruani da agam itip iba sib da Garam Mpada Tayangꞌ Dumpa da Sifa Ngants i agam ganunggam.

2:3: Mnt 34:8

*2:5: garam utup mararam pumuꞌa Anutu wain — Nan “garam pumuꞌa Anutu wain” igi wainggan ibi ‘pris’, garam nangan da tsarada nam da Anutu. Da ribigi iba imingꞌ Aron utupan. Da nan “garam utup mararam pumuꞌa Anutu wain” igi wainggan ibi ‘holipela lain pris’ (nan Inglis: ‘holy priesthood’).

2:6: Ais 28:16; 19:13; Dzb 38:6; Ef 2:20

2:7: Mnt 118:22; Mt 21:42; Mk 12:10; Lk 20:17; Ap 4:11; Ef 2:20; Dzb 38:6; Ais 19:13

2:8: Ais 8:14

2:9: Kis 19:5-6; Ais 43:20

2:10: Hos 2:23

2:22: Ais 53:9

2:24: Ais 53:4

2:24: Ais 53:5

2:25: Ais 53:6