1 Gubuꞌ Petrus da Yowanis rungꞌ nida nan da ampan igi, da garam pumuꞌa Anutu wain igi fain irut garam singaari mpada tayangꞌ Ungar Mararam igi gudzunggan da garam Sadusi fain ibawaꞌ da ribarangan. 2 Ribarangan nugun iruaꞌ i nan Petrus da Yowanis fisa gin ibi Yisu itip imunti marataꞌ sib sinungꞌ nam mampan da garam mampan bungꞌ atip amunti marataꞌ nabinigi. 3 Ibinigi da ribarangan impung Petrus da Yowanis ifa i rarudan, da bitsintaꞌ gubuꞌ maran intsup sib, da itangin yatangꞌ karabus da impai isangꞌ pisa fada maiꞌ. 4 Da bitsintaꞌ rib ampi bingan ringanta i Petrus nanggan fisa gin sib ugu imuaruts Yisu, da rib muarutsan igi mpruꞌa santan sib da iwaꞌ ibi garam 5,000.

5 Da pisa maiꞌ da garam pumuꞌa Anutu wain gudzun rusan irut garam gudzupuꞌ i Nan Faidagin da garam gudzun ruas fain impruꞌ ruan ibi utup tipa nan*utup tipa nan — Utup tipa nan igi da ifaringꞌ ibi Sanhidrin gin. Da nigi sangꞌ ibi nan ‘utup nan tipan’ mingꞌa ampap 7 da 15. imingꞌ Yerusalem.Mt 26:59; Mk 14:55; 15:1,43; Lk 22:66; 23:50; Ywn 11:47; Ap 4:15; 5:21,27,34,41; 6:12,15; 22:30; 23:1,6,15,20,28; 24:20 6 Da garam pumuꞌa Anutu wain gudzunggan tsiraꞌ Anas impai igi impruꞌ da Kaiafas da Yowanis da Aleksander da garam fain mingꞌa garam pumuꞌa Anutu wain gudzunggan igi utupan. 7 Da garam gudzun Yuda utupan nan tipan igi inang da Petrus da Yowanis imunti ribarangan maran. Da ribarangan igut i tuasarangan da ini, “Agam inang nam igi i manga binganggan da nampanggan?”

8 Da Petrus, fungꞌa i Marapayam Mararam, ini da ribarangan, “Agam garam tsiraꞌ tsiraꞌ suda gudzun i ampan Yuda santan, 9 aruani da aga munti agam maram, da agam mani raruda agai i nam bini aga nanga yaba i garam fagan agadan da sanab aranga waꞌa bini gin aga, ma? 10 Bida nigi da agam da ampan Israil santan nasruꞌ gin nabiani: arangan fagan iwaꞌ bini da isangꞌ i muntida bini i agam maranggam da aruani i Yisu Kristus, garam Nasaret, binganggan. Nigi garam aru agam ruguda Arangan yaba gai mpara i ruan ugu, da bitsintaꞌ Anutu iraꞌ i Arangan sinungꞌ nam mampan. 11 Da Arangan isu

12 “Da garam manga wasangꞌ i uda agi sinungꞌ nam maisan u; imaꞌ, Yisu angu. I Anutu anungꞌ irim bingan mangan da garam intap da intap i rima agi sib u; iraga Arangan runtaꞌ angu.”

13 Da garam Yuda gudzun rusan igi itsanga Petrus da Yowanis anungꞌ irat i ribarangan u, da isruꞌ gin ibi rib iruꞌ igi anungꞌ yatangꞌ Anutu ungaran papiar mangan u. Ibinigi da irunt fafun i Petrus da Yowanis i nan ribarangan nidan igi. Da ribarangan isruꞌ gin ibi rib iruꞌ igi irut Yisu iyung udzuf fain. 14 Da ribaranga tsanga garam aru fagan agadan da waꞌa bini ugu imunti impruꞌ da ribarangan. Ibinigi da nan imaꞌ i ribarangan tipa nidan. 15 Da garam gudzun ruas igi ini da ribarangan i waꞌa fada sinungꞌ utup nan tipan mumai gan mpruꞌa ruan gin igi.Mt 26:59; Mk 14:55; 15:1,43; Lk 22:66; 23:50; Ywn 11:47; Ap 4:5; 5:21,27,34,41; 6:12,15; 22:30; 23:1,6,15,20,28; 24:20 Da ribarangan impruꞌ ruan da ini nan da irants sanampun i nam idzuwai igi ribarangan bungꞌ anang. 16 Da ini, “Agi bungꞌ anangꞌ nabianungꞌ i garam iruꞌ aga? Rib santan mpada Yerusalem ani isruꞌ i nam maran mangan rib iruꞌ igi nanga yaba i garam igi. Ibinigi da agi anungꞌ isangꞌ i nida bida ribarangan anungꞌ inang nam igi u. 17 Da bitsintaꞌ agi natsungin nan igi i anungꞌ utusa i ruan da rib santan u. Ibinigi da agi nani nan babampafan da garam iruꞌ igi nabiani, ‘Anungꞌ rungꞌ nida nan da rib fain i bingan arigi u.’ ” 18 Da ribarangan itip inuꞌ Petrus da Yowanis i tipa atangꞌa ba ungar wasaꞌ igi. Da ini da ribarangan i anungꞌ rungꞌ fisa i nan ma utusa i garam i Yisu binganggan u.

19 Da Petrus da Yowanis itip ini ribarangan nanggan mungaꞌ ibiani, “Agam maram ifur i sanab idzuwai irururung i Anutu maranggan? Aga atangꞌa warangꞌ i agam, ma aga atangꞌa warangꞌ i Anutu? Agam runggam wararu! 20 Da bitsintaꞌ, mingꞌa agai da aga wasangꞌ tirida nan ani rai u. Imaꞌ. Aga rubungꞌ ani da ampan i nam aga runggangꞌ tsangandan da ringanta gin igi.”

21 Da rib Yuda garam gudzun rusan iradzungꞌ iruꞌ arangan da itiri ribarangan rai da ifan. I ampan santan igi irim bingan tsiraꞌ da Anutu i nam maran mangan waꞌan igi. Ibinigi da garam gudzun ruas igi anungꞌ iwaꞌ da sanab manga rururungan i rima tsakia ma barabin rutin. 22 I garam fagan agadan igi udzufan iyus 40 sib da nam maran mangan iwaꞌ da arangan da inang arangan iwaꞌ bini.

23 Gubuꞌ rib Yuda gudzun rusan tanginda Petrus da Yowanis waꞌa fadan, da rib iruꞌ igi itip ifan da riban muarutsan igi. Da ini nan idzuwai garam pumuꞌa Anutu wain gudzun rusan da garam gudzun fain igi nidan. 24 Gubuꞌ rib muarutsan igi ringanta i nan igi sib, da ribarangan irim wangun isu bitsintaꞌ da iyugin da Anutu ibiani, “Nifutsarif suda wain i nam santan, U tip gunungun da intap da uruts, impruꞌ da nam santan mingꞌa wasaꞌ gin. 25 Mungꞌ ugu da Agu Marapayamam Mararam irim nan iwaꞌ U garam gumam Tafit, aga tafanggangꞌ, nifunggan ibiani,

27 “Da nan ugu ibasu nidzun, i Herot Antipas da Pontius Pilatus impruꞌ ruan imingꞌ gamp tsiraꞌ Yerusalem ani da irut garam utup fain da rib Israil da yudzu nan umpur i rasuda U garam gumam mararam Yisu, aru U ragadan ugu. 28 Da nam idzuwai ribigi nangan da inang yatsungꞌ Agu nampanggam da maram furan gam aru U nida mungꞌ ugu i waꞌa bida nigi. 29 Nifutsarif, U maram wafur rib Yuda gudzun rusan nanggan radzungꞌa agai i nanga aga ratan. Da warim U garam gumam agai ani sib i anungꞌ ratan u. Da warim riniurun i aga fisa i Agu sisingꞌ bini gam igi wasi da ampan. 30 Mingꞌa U garam gumam mararam Yisu binganggan, da watatu banginggam ruta gam nampanggam i nanga rib rinin gingꞌan dauman da nanga nam maran mangan i santingꞌa U nampanggam.”

31 Da ampan muarutsan igi yugin sib, da mumai aru ribarangan mpruꞌa ruan gin igi yudza i ruan. Da Marapayam Mararam ifungꞌ isisungꞌ ribarangan. Da ribarangan ifis i Anutu nanggan igi dzidziwandan da ampan ruta nam ratan maꞌan.

32 Da rib muarutsan santan angu impruꞌ wangun da uwayant isu bitsintaꞌ. Da mangan anungꞌ itsanga nanggan ibi arangan runtaꞌ nanggan angu u. Imaꞌ. Ribarangan bits bits inang da irim nanggan i rima rain rusan muarutsan igi sib, da nanggan igi iwaꞌ ibi rib santan nanggan. 33 Da aposel ruas igi ifungꞌ i riniurun tsiraꞌ da inang da ini Nifutsarif Yisu nanggan tipa muntida marataꞌ wasi. Da Anutu iyats maraampi gan tsiraꞌ bingan iyab ragun i rib muarutsan santan. 34 Ibinigi da ribarangan gan mangan anungꞌ isau runggan i nam mangan u. I wain, gubuꞌ fain da rib suda wain i ungar ma intap irants i suba moni gin da iyu moni igi ifan 35 da irim da aposel ruas, da aposel ruas irim da rib sauda runggan i nam fain.

36 Da garam muarutsan mangan binganggan Yosef. Arangan garam utup Liwai da iba imingꞌ intap manga mingꞌa uruts wasaꞌ binganggan Saiprus. Da Yisu aposel rusan irim i binganggan mangan Barnabas, i bingan igi wainggan ibi ‘garam rima wangun nufan da riniurun da ampan’. 37 Da arangan irants intapan mungaꞌ i suba moni gin da iyu moni igi iba da irim da aposel ruas.