1 Garam mangan binganggan Ananaias irut fininggan Safaira irants intapan mangan i suba moni gin. 2 Da arangan igif moni igi mungaꞌ ragun da iyu mungaꞌ angu ifan da irim da aposel ruas, da arangan ini ibi moni igi gudzun gan arangan igi. Da fininggan Safaira isruꞌ i nam santan gabunggan nangan igi.

3 Da Petrus ini biani, “Ananaias, ibubianungꞌ da Sadang ifungꞌ i agu wangunggam, da u ni nan umpur da Marapayam Mararam? Agu sub gam intapam i moni, da bitsintaꞌ u rungꞌ igif moni igi marafain ragun. 4 Da intap igi da isu u gam. U maram fura i rantsan ma mingꞌa bida nigi da bungꞌ atsungꞌ u maranggam furan. Da gubuꞌ u suba moni gin sib da moni igi isu u nanggam, da u sangꞌ i nanga sangꞌa u maranggam furan. Da ibubianungꞌ da u yu uwayant maisan bida nigi i u wangunggam? U anungꞌ ini nan umpur da agai angu, da bitsintaꞌ Anutu impruꞌ ibinigi!”

5 Da gubuꞌ Ananaias ringanta i nan igi, da arangan iruaꞌ iruꞌ da imamp. Rib santan aru ringanta i nam waꞌan igi irat nidzun angu. 6 Da mamaꞌ rinifaꞌ fain yatangꞌ ba ungar igi wasaꞌ gan da ipatꞌ Ananaias riniuriatsan igi i bruꞌ da iyu iwaꞌ ifa manaꞌ da idzufungꞌ.

7 Gubuꞌ maran ibi 3 awa ifa sib da Ananaias fininggan yatangꞌ iba ungar igi. Da arangan anungꞌ isruꞌ i nam idzuwai igi iwaꞌ da aranga gabunggan u. 8 Petrus igut i sagat igi, “Agam intapam aga ugu moni gan aranga arani?”

Da sagat ini, “Hai, aranga arigi.”

9 Da Petrus ini, “Ibubianungꞌ da agam iruꞌ igi yudzu nan i intsaꞌa Nifutsarif Marapayaman Mararam? Waringant i tringantring aga! Garam dzufungꞌa u gabunggam iyung iba muantsi, da ribarangan bungꞌ abuaringꞌ agu nafan nabinigi.”

10 Sung angu da sagat igi iruaꞌ iruꞌ Petrus fagan da imamp. Gubuꞌ mamaꞌ rinifaꞌ igi atangꞌa ba ungar igi da itsanga sagat igi mampa sib, da ibuaringꞌ arangan iwaꞌ ifan da idzufungꞌ isarimp da gan gabunggan. 11 Da nam ratan tsiraꞌ angu yu ampan muarutsan santan impruꞌ da rib santan ringanta i nan igi.

12 Da aposel ruas igi nang nam maran mangan ampi bingan da isantingꞌ Nifutsarif nampanggan wasaꞌ i ampan igi. Da ampan muarutsan igi maiꞌ maiꞌ da impruꞌ ruan imingꞌ mumai faringꞌa bida Solomon tsaparangꞌ gan imingꞌ Ungar Mararam igi ntiangꞌ gan wasaꞌ.Ywn 10:23; Ap 3:11 13 Da rib mamida i muarutsan itsarif rib muarutsan igi ibi garam bini bini, da bitsintaꞌ irat i ruta ribarangan mpruꞌa ruan. 14 Da bitsintaꞌ rib faꞌ faꞌ ampi bingan, garam da sagat, imuaruts Nifutsarif da inang rib muarutsan gudzunggan iyingꞌ isu ampi bingan. 15 Gubuꞌ ampan tsanganda nam maran mangan aposel ruas nangan igi, da iyu garam gingꞌa rinin iwaꞌ sanampun da isintungꞌ i tsitsuꞌ da rabiꞌ, i wain, ribarangan imuaruts ibi gubuꞌ Petrus yunga fadan da bungꞌ arim bangin ragun i ribarangan, ma bida maꞌan, da maratsinutsan angu bungꞌ amingꞌ ragun gin da ribarangan rininggan gingꞌan bungꞌ adaum. 16 Da ampi tsiraꞌ bingan inang da iba imingꞌ gamp gamp mingꞌa uts uts da Yerusalem da iyu garam gingꞌa rinin da fain marapayam maisan wayadan iba, da santan angu rininggan gingꞌan iwaꞌ bini.

17 Da garam pumuꞌa Anutu wain gudzunggan tsiraꞌ ruta gan garam gudzunggan fain aru bada mingꞌa utup Sadusi ugu wangun imais nidzun i aposel ruas igi. 18 Da impung aposel ruas da itangin yatangꞌ karabus. 19 Da bitsintaꞌ Nifutsarif angira gan iba da idziang, da itus muantsi karabus, da iyu ribarangan iwaꞌ da ini da ribarangan, 20 “Wafamunti namingꞌ Ungar Mararam ntiangꞌ gan wasaꞌ da wani nan santan igi da ampan i nam mpada maran taꞌan ntingan.” 21 Da aposel ruas iringant i nan angira nidan igi sib, da gubuꞌ pisan da yatangꞌ ifa Ungar Mararam ntiangꞌ gan wasaꞌ igi, da ifis i nan da ampan.

Gubuꞌ garam pumuꞌa Anutu wain gudzunggan tsiraꞌ ruta gan garam gudzun rusan igi bawaꞌa mingꞌa mumai tipa nan gin, da inuꞌ garam Israil gudzun gudzunggan santan impruꞌ ruan ibi utup tipa nan, faringꞌa bida Sanhidrin gin.Mt 26:59; Mk 14:55; 15:1,43; Lk 22:66; 23:50; Ywn 11:47; Ap 4:5,15; 5:27,34,41; 6:12,15; 22:30; 23:1,6,15,20,28; 24:20 Da itangin garam singaari fain ifa karabus i uda aposel ruas igi badan. 22 Da bitsintaꞌ gubuꞌ garam singaari igi fawaꞌa ungar karabus, da isau aposel ruas ugu wasi. Da ribarangan itip iba da ini da rib gudzun gudzun santan igi ibiani, 23 “Aga tsanga ibi garam itsungin ungar karabus igi muantsi gan sib, da garam singaari imunti tayangꞌ muantsi igi, da bitsintaꞌ gubuꞌ aga tusa muantsi, da aga tsanga ibi manga ruwampa mumang wasaꞌ aga u.” 24 Da gubuꞌ garam singaari mpada tayangꞌ i Ungar Mararam igi garam gudzunggan da garam pumuꞌa Anutu wain gudzun rusan igi ringanta i nan igi, da ribarangan iyu uwayant iyus da maran ifur nam ampi bingan i nam idzuwai bungꞌ awaꞌ bampan i nam waꞌan igi.

25 Da garam mangan ibawaꞌ da ini ibiani, “Waringantin! Garam agam tangindan i karabus ugu, arani da rungꞌ imunti Ungar Mararam ntiangꞌ gan wasaꞌ da rungꞌ ifis i nan da ampan!” 26 Da garam singaari ruas irut gan garam gudzunggan ifan da iyu aposel ruas iba, da bitsintaꞌ anungꞌ inang nam mangan i wayada ribarangan u, i wain, ribarangan irat i ampan bungꞌ atapu ribarangan i tauf.

27 Da iyu aposel ruas igi iba munti utup tipa nan igi maranggan, da garam pumuꞌa Anutu wain gudzunggan tsiraꞌ ini da ribarangan ibiani, 28 “Aga ni nan radzungꞌan da agam sib mungꞌ ugu i anungꞌ rungꞌ fisa i garam igi binganggan u. Da bitsintaꞌ agam ifis i nan igi imingꞌ gamp tsiraꞌ Yerusalem ani santan, da agam inang i rima garam igi barabin gan mampan igi yaba i agai.”

29 Da bitsintaꞌ Petrus da aposel ruas fain igi ini arangan nifunggan mungaꞌ ibiani, “Aga bungꞌ atangꞌ warangꞌ i Anutu runtaꞌ angu nanggan da anungꞌ garam intap ani nanggan u. 30 Agam runggam yis Yisu iyab gai mpara i ruan da Aranga mamp, da bitsintaꞌ agi rumpungꞌ rusangꞌ Anutu gan iraꞌ i Arangan sinungꞌ nam mampan. 31 Da Anutu itsarif Arangan i mpada i gan bangi bini gan, mingꞌa mumai uda bingan tsiraꞌ gin,Mt 26:64; Mk 14:62; 16:19; Lk 22:69; Ap 2:33; 7:55,56 ibi Garam Suda Wain i nam santan da Garam Rima Ampan Sib. Aranga nang ibinigi i ampan Israil itama i ruan da Aranga siata i nanggan maisan rai. 32 Aga tsanga nam igi i mara nidzunggangꞌ da aga ni wasi. Da Marapayam Mararam, aru Anutu riman da rib atangꞌa warangꞌ i Arangan, ini nan wasi i nam igi impruꞌ ibinigi.”

33 Gubuꞌ ribarangan ringanta i nan igi, da iyu nugu sasus da ini isa aposel ruas igi funub. 34 Da bitsintaꞌ garam Farisai manga binganggan Gamaliel imunti iyab imingꞌ utup tipa nan igi. Arangan garam gudzupuꞌ utusa rib i Nan Faidagin, da ampan santan inang da itsarif arangan. Arangan ini da garam singaari iyu aposel ruas igi iwaꞌ ifa sinungꞌ ungar igi da imunti manaꞌ uts pas angu raiyi. 35 Ida arangan ini da garam gudzun ruas fain igi, “Ampan Israil, agam watip i nan agam antungꞌan i nanga i garam aga! 36 Udzuf fain ifa sib da garam mangan binganggan Teudas yuriꞌ da inang runggan ibi garam tsiraꞌ. Da garam bida 400 yatsungꞌ i arangan, da bitsintaꞌ gabman yis arangan funub, da gan garaman atsungꞌa gin idzarang fagan wasi i ruan. Da ribarangan nanggan yungan igi nidzunggan imaꞌ. 37 Bampan i arangan, da waꞌa gubuꞌ aru gabman uda rib sib angu binganggan ugu, da Yudas, garam Galili, yuriꞌ da iyu garam fain i atsungꞌa i arangan ruta gabman isa ruan. Da bitsintaꞌ gabman yis arangan funub, ibinigi da riban atsungꞌa i arangan igi idzarang ifa bits bits i ruan. 38 Ibinigi da dzi ni agam paꞌa runggam sinungꞌ ribigi. Da watangin ribarangan da ribarangan runggan nafan. I bida gum ribarangan antungꞌa i nangan igi waꞌa i garam gar uwayantan angu, da bungꞌ aruaꞌ da nantsup. 39 Da bitsintaꞌ bida bada mingꞌa Anutu gin, da agam anungꞌ isangꞌ i muntida sib i ribarangan u. I bida nigi da agam bungꞌ arut Anutu nais ruam!”

Da ribarangan yis yaring i nan igi. 40 Da itip inuꞌ aposel ruas igi itip yatangꞌ ba. Da ini da garam fain iripi ribarangan da ini da ribarangan i anungꞌ rungꞌ fisa i Yisu binganggan u. Da itangin ribarangan ifan. 41 Da aposel ruas itangin utup tipa nan igi rai da ifa ruta nugun nufan, i wain, Anutu itsanga ribarangan isangꞌ nidzun i uda miaꞌ i Yisu binganggan. 42 Da maiꞌ maiꞌ santan da ribarangan inang da ifa Ungar Mararam da ungar bits bits ibinigi. Da ribarangan anungꞌ itangin gum igi rai u; ribarangan rungꞌ yutus garam da ifis i sisingꞌ bini ibi Yisu igi Kristus, Garam Anutu Ragadan.