1 Gubuꞌ tsiraꞌ garam Yuda gada bret yist maꞌa gin*Gubuꞌ tsiraꞌ garam Yuda gada bret yist maꞌa gin - Anutu ini da garam Yuda i gada bret yist maꞌa gin da tipa runggan i tanginda intap Idzip rai sung angu. Wafaris Kisim Bek gudzun 12. faringꞌa bida Angira Atupa Sib gubuꞌ gan isu uts i waꞌan. 2 Da garam pumuꞌa Anutu wain gudzun rusan da garam gudzupuꞌ i nan faidagin isau sanab maradzigin i isa Yisu funub, i ribarangan irat i ampan bungꞌ ais ribarangan. 3 Da Yudas Iskariot, rib 12 ugu gan mangan, Sadang yatangꞌ gin, 4 da ifan da garam pumuꞌa Anutu wain da garam singaari mpada tayangꞌ Ungar Mararam gudzun rusan. Da irut itip nan i sanab idzuwai rima Yisu fada ribarangan banginggan. 5 Da ribarangan nugun inuf da itaga ruan i rima moni da arangan. 6 Da Yudas yis yaring gin da ifangꞌ i gubuꞌ bini mangan ampi tsiraꞌ mamida i waꞌan da rima Yisu da ribarangan.

7 Gubuꞌ miamun nam gadan tsiraꞌ bret yist maꞌa gin iwaꞌ. Da gubuꞌ arigi da bungꞌ ais dumpa narun i tsarada suda dangki i maran fura gubuꞌ Angira Atupa Garam Israil Sib. 8 Da Yisu itangin Petrus da Yowanis da ini, “Wafan da watip nam gadan maran fura Angira Atupa Sib i agi mpruꞌa ruangꞌ gadan.”

9 Da rib iruꞌ igi igutin, “U ni aga tipa mingꞌa anungꞌ?”

10 Da Yisu ini, “Gubuꞌ agam atangꞌa Yerusalem igi da agam bungꞌ awaꞌ da garam manga buaringꞌa gur mpui gan, da agam watsungꞌ arangan nafa ungar aranga fa atangꞌa gin. 11 Da wani da ungar rinunggan igi nabiani, ‘Kidungwaga tsiraꞌ igutin: Mumai wasaꞌ ampi gan mangan imingꞌ anungꞌ i dzi ruta ribangꞌ atsungꞌa i dzi gada nam maran fura Angira Atupa Sib in?’ 12 Da arangan bungꞌ asantingꞌ agam i mumai tsiraꞌ mangan imingꞌ ungar wagungꞌ tipa sib, da agam watip nam gadan namingꞌ igi.” 13 Ribarangan ifa gamp igi da itsangan nam ibi Yisu nidan, ibinigi da ribarangan itip nam gadan Atupa Sib.

14 Gubuꞌ maran ibawaꞌ da Yisu irut aposelan impa i gada nam. 15 Da Arangan ini da ribarangan ibiani, “Dzi marangꞌ yari iyus i ruta agam mpruꞌa ruangꞌ gada nam Angira Atupa Sib ani raiyi da dzi musa uda barabin. 16 I dzi nani da agam, dzi wasangꞌ tipa gada nam Angira Atupa Sib ani u, nasangꞌ wainggan waꞌa suda nidzun mingꞌa Anutu nanggan mpada tayangꞌ gan garaman.”

17 Da iyu kap wain gurun da irim dangki gin sib da ini, “Wayu wabiaꞌ da wanum wasangꞌ ruam. 18 I dzi nani da agam, aruani da fadan dzi wasangꞌ tipa numa wain gurun nafan nasangꞌ Anutu nanggan mpada tayangꞌ gan garaman naba.”

19 Da Arangan iyu bret da irim dangki gin da ibrang da irim da ribarangan da ini, “Nani dzi nidzunggangꞌ dzi rima i agam; agam watsungꞌ sanab bida ani i maram fura dzi.” 20 Iga nam sib raiyi da Arangan itip iyu kap wain da ini, “Kap wain aruani nan utusa i ruan gin faꞌ Anutu nanga yaba i dzi biꞌ gangꞌ, aru yata rai i agam.Mt 26:26-30; Mk 14:22-26; 1Ko 11:23-25

21 “Da bitsintaꞌ waringantin! Garam rima dzi fadan da garam ipiap banginggan irut dzi iga nam da aruani. 22 Da Garam Narunggan bungꞌ amamp natsungꞌ nan ragada sib yaba i Arangan, da bitsintaꞌ garam rima Arangan fada garam ipiap banginggan natsauꞌ i runggan!” 23 Da ribarangan igut i ruan ifa iba i ribarangan gan idzuwai bungꞌ anang nabinigi.

24 Da ribarangan isu ufuai da ruan i nan manga suda garam tsiraꞌ i ribarangan.Mt 18:1; Mk 9:34; Lk 9:46 25 Da Yisu ini da ribarangan, “Rib mingꞌa manaꞌ i utup Yuda king rusan irasu utupan da impa tayangꞌ gin, da ini ampan gan tsarifa bida garam maraampi. 26 Da bitsintaꞌ sanab bida nigi anungꞌ waꞌan da agam. Garam tsiraꞌ mingꞌa wasaꞌ i agam narasu runggan nabi mamaꞌ rini faꞌ aga, da garam gudzun da nasu mamaꞌ gum utaꞌ angu.Mt 20:26-27; Mk 9:35; 10:43-44 27 I mangan igi su bingan tsiraꞌ, garam mpada ruꞌa i gada nam ma garam pumuꞌa garam i rima nam gadan rutin? Aru mpada i gada nam! Da bitsintaꞌ dzi mingꞌ wasaꞌ i agam ibi garam pumuꞌan. 28 Gubuꞌ nam intsaꞌan waꞌan da dzi da agam imunti impruꞌ da dzi. 29 Da ibi dzi ramanggangꞌ irim nampang da dzi i mpada tayangꞌ garam da dzi rim nampang igi da agam. 30 Da agam bungꞌ arut dzi nampruꞌ ruangꞌ gadan da numan mingꞌa dzi nanggangꞌ mpada tayangꞌ garamangꞌ. Da agam bungꞌ ampa nayab bintip king ruas gan i mpada tayangꞌ garam Israil utup 12 ugu.

31 “Saimon, Saimon, waringantin, Sadang igut i Anutu sib i untsianga i agam bida piriangꞌa rais nidzun sinungꞌ piriats. 32 Da bitsintaꞌ dzi yugin da Anutu i agu, Saimon, i agu anungꞌ tirida nanggam muarutsan rai u, da gubuꞌ u parima i ruam da warim rini urun da raim rusam.”

33 Da Petrus ini, “Nifutsarif, dzi tip ruangꞌ sib i ruta agu mpada karabus da mampan mpruꞌan da agu.”

34 Da Yisu ini arangan nan gan mungaꞌ, “Dzi nani da agu, tatariꞌ wasangꞌ kakarakan da pas wasaꞌ nasangꞌ u tungꞌa i dzi sangꞌa iruꞌ da bits sib raiyi.”

35 Da Yisu igut i ribarangan, “Gubuꞌ dzi tanginda agam fada ruta moni da tayap da faga gangkang maꞌan, da agam isau ruam i nam fain, ma imaꞌ?”

Da ribarangan ini, “Imaꞌ.”

36 Arangan ini da ribarangan, “Da aruani da bida manga moni gan da tayapan rumingꞌan, da nayu nampruꞌ. Da bida manga bainatan maꞌan da narim ngarukui gan i suba bainat mangan. 37 Nan profet akaran mungꞌ ini ibiani, ‘Ribarangan itsanga arangan ibi garam maisan.’Ais 53:12; Mk 15:28 Dzi nani da agam, nan akaran ugu bungꞌ asu nidzun nayab i dzi. Hai, nan akaran yaba i dzi mungꞌ ugu ibawaꞌ i suda nidzun.”

38 Da ribarangan ini, “Nifutsarif, watsangan bainat iruꞌ ani.”

Da Yisu ini, “Nan isangꞌ.”

39 Da Yisu ifa Mamai Oliv ibi Arangan tida fada gin ugu, da gan riban yatsungꞌ gin. 40 Gubuꞌ waꞌa mumai igi da ini da ribarangan, “Agam wayugin da Anutu i agam anungꞌ ruaꞌa i nam intsaꞌan.” 41 Da Yisu iyung pas angu ifa sinungꞌ ribarangan isangꞌ ampap garam tapuda tauf da faruwaꞌa gin da ifa idzaꞌ faga gudzun iruꞌ da iyugin, 42 “Ramangꞌ, bida u maram furan da wayu barabin dzi ntafa gin ani sinungꞌ dzi, da bitsintaꞌ anungꞌ atsungꞌa dzi marangꞌ furan gaꞌ u. Wanang wabi u maram furan.”Mt 26:39; Mk 14:35-36; Ywn 12:27 43 Da angira gunungun mangan iwaꞌ da Arangan da irim rini urun rutin. 44 Yisu imingꞌ wasaꞌ i nam tsakia tsiraꞌ da iyugin ruta wangunggan santan da uwats uwats tsiraꞌ itituꞌ iruꞌ ibi biꞌ tituꞌa ruꞌa intap. 45 Gubuꞌ Yisu udagin sib da uriꞌa fadan da riban atsungꞌa gin, da itsanga tuas arangan gingꞌa marampruꞌ sib, i ribarangan irabub i barabin da igingꞌ, 46 da Arangan ini da tuas arangan, “Ibi anungꞌ da agam igingꞌ? Wauriꞌ da wayugin da Anutu i agam anungꞌ ruaꞌa i nam intsaꞌan.”

47 Gubuꞌ rungꞌ nida nan da garam utup fain iwaꞌ, da rib 12 igi gan mangan nida Yudas in imungꞌ i ribarangan. Arangan ifa su uts da Yisu i tsutsufa Arangan. 48 Da bitsintaꞌ Yisu ini da arangan, “Yudas, u ni rima Garam Narunggan fadan da rib ipiap banginggan i nam tsutsufan?”

49 Gubuꞌ rib ruta Yisu tsanganda nam nanga i waꞌan igi da ini, “Nifutsarif, aga isa ribarangan i bainat?” 50 Da ribarangan mangan itsapi garam pumuꞌa Anutu wain tsiraꞌ mamaꞌ guman mangan ringan bini rai.

51 Da bitsintaꞌ Yisu ini, “Nantsup! Anungꞌ nanga bida nigi u.” Da Arangan igif garam igi ringan da idaum. 52 Ida Yisu ini da garam pumuꞌa Anutu wain gudzun rusan da garam singaari mpada tayangꞌ Ungar Mararam gudzun rusan da garam gudzun bada i uda Arangan igi, “Mani dzi garam isa nam da wapa nam, ida agam iba inting da bainat da gai? 53 Gubuꞌ sib angu da dzi rut agam impa Ungar Mararam, da agam anungꞌ itsara bangim i dzi u. Da bitsintaꞌ agam gubuꞌ maran gam aruani da nam mimin nampanggan isu wain da aruani.”

54 Ribarangan impung Arangan, da iyu Arangan ifa garam pumuꞌa Anutu wain tsiraꞌ ungaran. Da Petrus itangin tap yatsungꞌ ribarangan. 55 Da gubuꞌ ribarangan arungꞌa dzaf mingꞌa ungar manaꞌ igi da mpada wafiꞌan, da Petrus impa impruꞌ da ribarangan. 56 Da sagat gum mangan itsanga arangan mpada dzaf bururung arida gin igi da intrung maran i arangan da ini, “Garam arigi binigi irut Yisu.”

57 Da bitsintaꞌ Petrus itungꞌ gin, da ini ibiani, “Sagat, dzi anungꞌ isruꞌ i arangan.”

58 Pas angu da garam mangan itip itsanga arangan da ini, “Agu binigi, ribarangan gan mangan agu.”

Da Petrus ini, “Garam ai, anungꞌ dzi u.”

59 Gubuꞌ maran manga yusa ruan sib da garam mangan itip ini nan rururungan, “Nan nidzun, garam aruani irut arangan, i arangan garam Galili ibinigi.”

60 Da bitsintaꞌ Petrus ini, “Garam ai, dzi anungꞌ isruꞌ i nan u nidan igi u!” Gubuꞌ arangan rung nida nan igi da tatariꞌ ikakarak. 61 Da Nifutsarif itaning da intrung maran i Petrus, da Petrus maran ifur nan Nifutsarif nidan, “Aruani da u bungꞌ atungꞌ maram i dzi nasangꞌ iruꞌ da bits, raiyi da tatariꞌ namus kakarakan.” 62 Da Petrus iwaꞌ sinungꞌ mumai igi da irang ruta wangu barabin tsiraꞌ bingan.

63 Da garam muntida tayangꞌ Yisu irim umpur i Arangan da yis Arangan maisan angu. 64 Da ribarangan ipatiꞌ Yisu maran sib da igut i Arangan, “Bida u profet, da wani, manga is agu?” 65 Da ribarangan ini nan nifun maisan ampi bingan iyab i Arangan.

66 Gubuꞌ pisan da tataꞌ, da garam gudzun ruas da garam pumuꞌa Anutu wain gudzun rusan da garam gudzupuꞌ i nan faidagin impruꞌ ruan ibi utup tipa nan, faringꞌa bida Sanhidrin gin. Da iyu Yisu iba munti ribarangan maran.Mt 26:59; Mk 14:55; 15:1,43; Lk 23:50; Ywn 11:47; Ap 4:5,15; 5:21,27,34,41; 6:12,15; 22:30; 23:1,6,15,20,28; 24:20 67 Da ribarangan ini, “Bida u Kristus, Garam Anutu ragadan, da wani da agai.”

Da bitsintaꞌ Arangan ini da ribarangan, “Bida dzi nidan da agam, da agam wasangꞌ i muarutsan, 68 da bida dzi rima nan guta gin fain biaꞌan da agam, da agam wasangꞌ nida mungaꞌ. 69 Da bitsintaꞌ aruani da fadan, da Garam Narunggan bungꞌ ampa Anutu Nampang Wain banginggan bini.”Mt 26:64; Mk 14:62; 16:19; Ap 2:33; 5:31; 7:55,56

70 Da ribarangan igutin, “Da Anutu Narunggan agu?”

Ida Arangan ini, “Agam runggam ini ibi dzi Arangan ani.”

71 Ida ribarangan ini, “Agi anungꞌ rungꞌ rima udzungꞌ i rib fain i nida nan yaba i arangan u. Agi runggangꞌ iringant i nan asub imingꞌ arangan nifunggan rururungan sib.”