1 Gubuꞌ 6 rumingꞌ i waꞌa gubuꞌ mararam tsiraꞌ Angira Atupa Sib da Yisu ifa gamp Betani, Ladzarus gampan, garam mampan aru Yisu isa i marataꞌ ugu. 2 Tuas arangan isu nam gadan i Yisu imingꞌ nigi. Da Ladzarus da ampi fain irut Arangan impruꞌ maran impai, da Mata irim nam gadan da ribarangan. 3 Ida Maria ifa yu madamin gaunt bini tipa i gai mangan, binganggan nard, gurun gan. Barabin gan isangꞌ 500 gram da nam ntsuman gan tsiraꞌ bingan. Da iba yats i Yisu fagan da itias i gan gudzu yafanggan. Da madamin igi gauntan bini idasangꞌ ungar wasaꞌ igi santan. 4 Da bitsintaꞌ arangan garaman bits atsungꞌa gin nida Yudas Iskariot — uts pas angu da bungꞌ arim Yisu nafa garam ipiap banginggan — ini binaꞌ, 5 “Ibi anungꞌ da imami rima nam gaunt bini aga i garam suba i nam ntsuman da agi faban da garam sauda runggan? Agi sangꞌ i uda nam ntsuman gin sangꞌa nam ntsuman garam mangan nanga gum in da udzuf bitsintaꞌ!” 6 Arangan maran wafur garam sauda runggan da ini ibinigi u, da bitsintaꞌ arangan garam wapa nam, da impa tayangꞌ ribarangan moni gan da inang da iwap.

7 Yisu ini arangan nifunggan mungaꞌ ibiani, “Watiri Maria rai! Arangan ingif madamin igi isu nam tipa ruan i dzi gubuꞌ gangꞌ mampan da rima dzi. 8 Garam sauda runggan rubungꞌ arut agam nampai nabinigi angu, da dzi wasangꞌ i rungꞌ ruta agam mpada bida nigi u, imaꞌ.”

9 Da ampi tsiraꞌ Yuda iringant i Yisu mpada nigi da iba, da anungꞌ iba i tsanganda Yisu angu u, imaꞌ. Ini tsanganda Ladzarus aru Yisu isa i marataꞌ ugu mpruꞌan. 10 Ibinigi da garam pumuꞌa Anutu wain gudzun rusan itip nan i isa Ladzarus funub mpruꞌan bida nigi, 11 i arangan nanggan mampan da Yisu isa arangan marataꞌ angu da rib Yuda ampi bingan itiri ribarangan rai da imuaruts Yisu.

12 Maiꞌ mangan igi da ampi tsiraꞌ bawaꞌa Yerusalem i gubuꞌ mararam tsiraꞌ Angira Atupa Sib igi iringant i sisingꞌ Yisu bada Yerusalem. 13 Da iyu figiamp yafan da ifa i waꞌan da Arangan. Da iti inuꞌ nifun tsiraꞌ bingan ini binaꞌ, “Aga tsarif Agu, Garam rima agai sib! Nifutsarif Anutu ifinti Arangan aru bada i Anutu binganggan!Mnt 118:26; Mt 21:9; 23:39; Mk 11:9; Lk 13:35; 19:38 Hai, Anutu ifinti Israil King gan!”

14 Yisu iyu dongki naru faꞌ mangan da impa iyab gin ibi profet nan gan kakaran nidan,

16 Gubuꞌ arigi da riban atsungꞌa gin anungꞌ isruꞌ i nam waꞌan da Yisu igi wainggan u. Da bitsintaꞌ gubuꞌ Yisu uda bingan tsiraꞌ sib da ribarangan uwayantan ipuꞌ da maran ifur nan kakaran ugu ini iyab i Yisu da isu nidzun i nam ampan nanga i Arangan.

17 Garam ampi bingan ruta Yisu da tsanganda Arangan nuꞌa Ladzarus sinungꞌ tauf bampun i isa arangan marataꞌ ugu, ifisin wasi da ampan. 18 I wain igi da garam ampi bingan iyung ifa i tsanganda Yisu i nam maran mangan ribarangan ringanta gin igi. 19 Ibinigi da garam Farisai ini da ruan, “Aitsangan! Agi gumangꞌ nangan bini gan mangan wawaꞌ u. Garam intap santan ifa sib da yatsung arangan!”

20 Garam Grik fain ifa impruꞌ i tsanganda gubuꞌ mararam tsiraꞌ Angira Atupa Sib da pumuꞌa Anutu mingꞌa Yerusalem. 21 Ribarangan iba da Filip, aru gampan Betsaida mingꞌa Galili ugu, da igutin ini binaꞌ, “Garam tsiraꞌ, aga ni tsanganda Yisu.” 22 Ibinigi da Filip ifani da Andru da iruꞌ igi impruꞌ ruan ifani da Yisu.

23 Yisu ini ribarangan nifunggan mungaꞌ ibiani, “Gubuꞌ maran ibawaꞌ sib wa da aruani i Garam Narunggan uda bingan tsiraꞌ. 24 Dzi nani nan nidzun bingan da agam, bida dzangkum nidzun mangan mamida i ruaꞌa intap da mampan, da rubungꞌ amingꞌ nidzun bitsintaꞌ angu. Da bitsintaꞌ bida mampan da bungꞌ akap nidzun ampi bingan. 25 Garam maran arida i nanggan mpada marataꞌ yusan, da bungꞌ arim ganunggan rai. Da garam nida mais i nanggan mpada marataꞌ mingꞌa intap ani, da bungꞌ ayu nam mpada maran taꞌan ntingan angu.Mt 10:39; 16:25; Mk 8:35; Lk 9:24; 17:33 26 Manga nanga gum i dzi da natsungꞌ dzi, da gamp dzi mpada gin da arangan bungꞌ ampa gin nabinigi. Da Ramangꞌ bungꞌ arim bingan tsiraꞌ da garam nanga dzi gumangꞌ. 27 Gubuꞌ aruani da dzi wangungꞌ ibarabin nidzun angu. Da dzi nabuni nan nabi anungꞌ? Mani dzi nida, ‘Ramangꞌ, warim dzi sib sinungꞌ gubuꞌ barabin nida waꞌan ani’? Imaꞌ. Dzi nabuaringꞌ barabin igi, i wain arigi angu da dzi ba.Mt 26:39; Mk 14:35-36; Lk 22:41-42 28 Ramangꞌ, warim bingan tsiraꞌ da runggam!”

Da nifun mangan iwaꞌ imingꞌ gunungun iba ini binaꞌ, “Dzi nang binganggangꞌ isu tsiraꞌ sib da dzi rubungꞌ anang nabinigi.”

29 Garam ampi tsiraꞌ muntida nigi iringant i nifun waꞌan igi da fain ini binaꞌ, “Tsuarip ingkung iririring.”

Da bitsintaꞌ fain ini binaꞌ, “Angira mangan ini nan da arangan.”

30 Yisu ini da ampan tsiraꞌ igi ibiani, “Nifun waꞌan ani anungꞌ iwaꞌ i rima dzi sib u, imaꞌ. Iwaꞌ i rima agam sib. 31 Aruani da Anutu gubuꞌ gan raruda garam intap inang i waꞌan, da bungꞌ asiat Sadang, garam suda wain i intap ani, nafa manaꞌ. 32 Da gubuꞌ garam raꞌa i dzi sinungꞌ intap da dzi bungꞌ auntap i garam santan naba da runggangꞌ.” 33 Arangan ini nan igi i santingꞌa Arangan bungꞌ amamp nabi anungꞌ.

34 Da garam utup tsiraꞌ igi ini Yisu nifun mungaꞌ ibiani, “Aga ringant i nan mingꞌa Anutu Nan Gan Faidagin nida Garam Anutu Ragadan bungꞌ ampa ratar nanting, da ibi anungꞌ da agu ni naraꞌ i Garam Narunggan? Da u ni Garam Narunggan idzuwai igi? Garam Anutu Ragadan, ma?”

35 Yisu ini da ribarangan ibiani, “Nam puatsadan bungꞌ ari agam uts pas angu. Gubuꞌ nam puatsadan rumingꞌan da agam wayung, i nam mimindan anungꞌ waꞌan da agam u. Da manga yunga nam mimindan wasaꞌ wasruꞌ i gan fada gin u. 36 Wamuaruts nam puatsadan da gubuꞌ aru rungꞌ arida i agam, da agam bungꞌ asu nam puatsadan narun rusan.” Gubuꞌ Yisu nida nan igi sib da ifa sinungꞌ rib igi da ikup.

37 Yisu inang nam maran mangan ampi bingan angu iwaꞌ imingꞌ rib igi maranggan sib, da bitsintaꞌ rib igi anungꞌ imuaruts u. 38 Nigi iwaꞌ i nanga profet Aisaia nan gan nida mungꞌ ugu suda nidzun, “Nifutsarif, mangan nigi muaruts aga nan gaꞌ fisagin?Ais 53:1; Ro 10:16 Da mangan nigi itsanga Nifutsarif nampanggan?” 39 Rib igi anungꞌ isangꞌ i muarutsan u, i wainggan imingꞌ nan mangan profet Aisaia kakaran bida ani, 40 “Anutu itsungin rib igi maran sib da inang rib igi wangun ibabampaf isu tauf. Arangan inang ibinigi i rib igi anungꞌ raraba nam ma sruꞌa gin da mamida parima i ruan badan da dzi, da dzi nanga rib igi dauman.”Ais 6:9-10; Mt 13:14-15; Mk 4:12; Lk 8:10; Ap 28:26-27 41 Aisaia irarab Yisu nampanggan da binganggan tsiraꞌ sib, ibinigi da ini nan igi iyab i Arangan. 42 Da bitsintaꞌ garam ampi bingan mingꞌa wasaꞌ i garam gudzu gudzun imuaruts Yisu, da anungꞌ ini nanggan muarutsan wasi i ribarangan irat i rib Farisai bungꞌ apaꞌ ribarangan rai nawaꞌ sinungꞌ ungar mpruꞌa ruan gin. 43 I ribarangan ini uda bingan tsiraꞌ mingꞌa garam gar gin yusa bingan tsiraꞌ bada mingꞌa Anutu gin.

44 Yisu inuꞌ nifun tsiraꞌ ini binaꞌ, “Garam mangan muarutsa dzi da anungꞌ imuaruts dzi angu u, imaꞌ. Imuaruts Aru tanginda dzi badan ugu. 45 Gubuꞌ garam mangan raraba dzi, da irarab Aru tanginda dzi badan ugu impruꞌ ibinigi. 46 Dzi su nam puatsadan iba intap i bida mangan muarutsa dzi da anungꞌ rungꞌ mpada nam mimindan wasaꞌ u. 47 Bida manga ringanta i dzi nan gangꞌ da mamida atsungꞌa gin, da dzi wasangꞌ i raruda arangan u. Dzi anungꞌ iba i raruda garam intap u; dzi ba i rima garam intap sib. 48 Garam rima barun da dzi da mamida uda dzi nan gangꞌ, da nam rarudan rumingꞌ. Nan dzi fisa gin igi bungꞌ araru arangan da gubuꞌ buntun. 49 I dzi wafis i nan i rugangꞌ uwayantangꞌ u, imaꞌ. Ramangꞌ aru tanginda dzi badan ugu ini da dzi i nan santan dzi nidan da fisa gin. 50 Dzi sruꞌ i Ramangꞌ nan gan irim nam mpada ratar ntingan. Ibinigi da nan sib angu dzi nidan, da dzi ni rururungan ibi Ramangꞌ nidan da dzi angu.”