1 Gubuꞌ igi mangan da garam ampi bingan itip impruꞌ ruan da nam gadan imaꞌ gin. Da Yisu inuꞌ riban atsungꞌa gin iba rutin da ini, 2 “Dzi gaib ribani i irut dzi mpa gubuꞌ iruꞌ da bits sib da nanggan gadan mangan ruwamingꞌ i gadan u. 3 Da bida dzi wata ribarangan tipa fada gampan ruta mangits, da maran bungꞌ adidirunt da naruaꞌ namingꞌ sanab, i fain imingꞌ gamp guntiꞌ iba.”

4 Da Yisu riban atsungꞌa gin igi ini i nifunggan mungaꞌ, “Agi buwaꞌa da nam gadan bida anungꞌ mingꞌa nam manaꞌ dadauntan bingan ani i riman da garam santan ani i gada sufan?”

5 Da Arangan igut i ribarangan, “Bret wayawai rumingꞌ da agam?”

Da ribarangan ini, “Bret 7.”

6 Arangan ini da ampi tsiraꞌ igi impai iruꞌ intap. Da Arangan iyu bret 7 igi da irim dangki gin, da ibrang, irim da riban atsungꞌa gin igi da ifab isangꞌ garam santan igi. 7 Da yafas narun narun iruꞌ rumingꞌ ibinigi. Arangan irim dangki gin da ini da riban atsungꞌa gin i faba mpruꞌa bida nigi. 8 Ampan santan igan da isuf sib da ribarangan intsungꞌ nam gadan pupumuts da ifarangꞌ i tsitsuꞌ firan tsiraꞌ tsiraꞌ 7 da ifungꞌ. 9 Da garam ibi 4,000 impai. Da Arangan iwat ampan santan igi ifa gamp gampan. 10 Sung angu da irut riban atsungꞌa gin iyab i madzung da yis mpui fuꞌ udziꞌ ifa intap Dalmanuta.

11 Da garam Farisai iwaꞌ da yudzungꞌ i nan da Yisu. Ini intsaꞌa Arangan da ini rutin, “Wanang nam maran mangan i santingꞌa bida u nampanggam iba imingꞌ Anutu gin.”

12 Da Yisu ringantagin da iyafi asap tsiraꞌ i nugun ibarabin da ini, “Ibianungꞌ da yangin gubuꞌ aruani igutin i tsanganda nam maran mangan? Dzi nani nan nidzun da agam i yangin gubuꞌ aruani anungꞌ isangꞌ i tsanganda nam maran mangan bida nigi u.” 13 Da Arangan itangin ribigi rai, da itip iyab i madzung da yis mpui fuꞌ udziꞌ ifa marafain.

14 Da Arangan riban atsungꞌa gin iyu bret bitsintaꞌ angu imingꞌ madzung da maran isamu i uda nam gadan fain mpruꞌan. 15 Da Yisu ifai nan i ribarangan, “Watsanga runggam sib i garam Farisai da Herot yist gan.”

16 Da ribarangan maran ifur da ini nan da ruan i Arangan nanggan nidan igi wainggan ibi ribarangan anungꞌ iyu bret fain impruꞌ u.

17 Yisu isruꞌ i ribarangan nanggan nidan igi da ini, “Wain ibianungꞌ da agam ini nan nam gadan maꞌan? Agam watsanga nam ratar ma wasruꞌ i nan u, a? Wain ibianungꞌ da agam wangum ibabampaf wasi? 18 Agam maram rumingꞌ, da agam madatsanga nam? Agam ringam rumingꞌ, da agam madaringant i nan? Da agam maram masamu ruam, ma? 19 Gubuꞌ dzi branga bret 5 da riman da garam 5,000 ugu, da agam intsungꞌ pupumuts da ifarangꞌ i tsitsuꞌ fir wayawai?”

Da ribarangan ini Arangan nifunggan mungaꞌ ibiani, “Tsitsuꞌ firan 12.”

20 Da Yisu itip ini, “Da gubuꞌ dzi branga bret 7 da riman da garam 4,000 ugu, da agam intsungꞌ pupumuts da ifarangꞌ i tsitsuꞌ firan tsiraꞌ tsiraꞌ wayawai?”

Da ribarangan ini, “Tsitsuꞌ firan tsiraꞌ tsiraꞌ 7.”

21 Da Arangan ini da ribarangan, “Da agam madasruꞌ gin, amaꞌ?”

22 Gubuꞌ ribarangan fawaꞌa Betsaida, da garam fain iyu garam maran gampaman mangan iba da igaib ruan da Yisu i rima bangin i arangan maran. 23 Da Yisu igif garam igi bangin da yutsungꞌ iwaꞌ sinungꞌ gamp. Arangan itupingꞌ nifu gurun i garam igi maran nidzun da irim bangin iyab i garam igi, da igutin, “U tsanga nam fain?”

24 Da garam igi raꞌ i maran da ini, “Dzi tsanga garam fain, da bitsintaꞌ dzi tsangan ibi gai fain yungan.”

25 Da Yisu itip irim bangin iyab i garam igi maran nidzun. Da garam igi intrung maran da itip itsangan nam, da itsangan nam santan idzidziwan. 26 Da Yisu iwat arangan, “Wafa ungaram angu da anungꞌ tipa atangꞌa fada gamp u.”

27 Yisu irut riban atsungꞌa gin ifa gamp fain mingꞌa uts da Kaisaria Filipai. Mingꞌa sanab fadan da Arangan igut i ribarangan, “Amaꞌ, ampan santan ugu ini dzi mangan?”

28 Da ribarangan ini i nifunggan mungaꞌ ibiani, “Rib fain ini agu Yowanis Ruruba Garam, da fain ini agu Eliya, da fain ini profet ruas mungꞌ ugu mangan i agu.”

29 Arangan igut i ribarangan, “Da agam? Agam ibuni manga i dzi?”

Da Petrus ini Arangan nanggan mungaꞌ ibiani, “Agu Kristus, Garam Anutu Ragada mungꞌ i rima i garaman sib.”Mt 16:15-16; Lk 9:20; Ywn 6:69

30 Da Yisu ifai nan i ribarangan i anungꞌ nida Arangan wasi da rib fain u.

31 Da Arangan iragi nan da ribarangan da ini, “Garam Narunggan bungꞌ awaꞌ da barabin ampi bingan. Garam Israil gudzun rusan, da garam pumuꞌa Anutu wain gudzun rusan, da garam gudzupuꞌ i nan faidagin ruas bungꞌ abugin Arangan da bungꞌ asiat Arangan rai da bungꞌ ais funub, da gubuꞌ suda iruꞌ da bits da Arangan bungꞌ atip amunti marataꞌ.” 32 Arangan idziwar i nan santan da ribarangan, ida Petrus iyu Arangan iwaꞌ ifa sinungꞌ rib santan igi da impiꞌ Arangan i anungꞌ nida bida nigi u.

33 Da Yisu yitam i ruan da irarab riban atsungꞌa gin da impiꞌ Petrus ini binaꞌ, “Sadang, wawaꞌ manaꞌ i dzi! U maram anungꞌ ifur Anutu uwayantan u; u maram ifur garam gar uwayantan angu.”

34 Da Arangan inuꞌ ampi tsira igi impruꞌ da riban atsungꞌa gin da ini, “Bida mangan nida atsungꞌa dzi, da narim barun da wangunggan da maranggan furan, da nabuaringꞌ gai mpara i ruan gan da natsungꞌ dzi.Mt 16:24; Lk 9:23 35 I garam maran fura i rima runggan sib i nanggan mpada bini mingꞌa intap ani, da bungꞌ arim ganunggan rai, da bitsintaꞌ garam rima runggan rai i dzi da sisingꞌ bini gangꞌ, da bungꞌ arim ganunggan sib.Mt 10:39; 16:25; Lk 9:24; 17:33; Ywn 12:25 36 I bida garam ufuma nam bunump santan intap ani, da rima ganunggan rai, da nigi naburim arangan sib nabianungꞌ? 37 Da garam burima nanggan idzuwai da Anutu i tipa uda ganunggan sinungꞌ nam mampan?Mt 16:26; Lk 9:25 38 Yangin gubuꞌ aruani nam maisan gan iyus da isangꞌ sagat mangan tanginda gabun rai da waꞌa suda sagat sanab. Da bida mangan rinin miaꞌa i dzi da nanggangꞌ mingꞌa ampan igi maran, da dzi riningꞌ bungꞌ amiaꞌ gin da gubuꞌ dzi, Garam Narunggan, tipa bada ruta angira mararam da Ramangꞌ nanggan puatsadan.”Mt 10:33; Lk 9:26; Ro 1:16; 2Ti 1:8