1 Da Yisu ini da ribarangan, “Dzi ni nan nidzun da agam, agam fain muntida ani bungꞌ atsanga Anutu nanggan mpada tayangꞌ gan garaman naba ruta nampanggan tsiraꞌ sib raiyi, ida namus mampan.”Mt 16:28; Lk 9:27

2 Gubuꞌ 6 ifa sib da Yisu iyu Petrus, Dzems da Yowanis da iyab mamai guntiꞌ mangan i runggan angu mpada nigi. Fawaꞌa mamai igi sib da Arangan rinin iwaꞌ maran mangan i ribarangan maran. 3 Arangan ngarukui gan isu maragamp da idzadzaniang iyus; garam mangan wasangꞌ i adzuꞌa bruꞌ mangan fasapa sangꞌan u. 4 Da Eliya da Moses iwaꞌ ribarangan maran da irut Yisu ini nan. 5 Da Petrus ini da Yisu, “Rabai,*Rabai — Nan Rabai wainggan ibi ‘Kidungwaga’. bini angu i aga mpada ani, aga naraf marayawaꞌ iruꞌ da bits; u gam mangan, da Moses gan mangan da Eliya gan mangan. 6 (Arangan wasruꞌ i nan idzuwai arangan nidan igi u, i ribarangan irat tsiraꞌ.) 7 Da sung angu da maraum mangan iwaꞌ da ibuafir ribarangan, da nifun mangan iwaꞌ imingꞌ maraum ibiani, “Nigi dzi Narunggangꞌ dzi marangꞌ aridagin yusan. Waringant i Arangan nanggan!”Mt 17:5; Lk 9:34-35; 2Pe 1:17

8 Da ringanta i nifun igi sib da sung angu ribarangan itaningꞌ taningꞌ da watsanga garam mangan u; Yisu runtaꞌ angu rurut ribarangan.

9 Da ribarangan rungꞌ yunga mamai ruꞌa badan da Yisu ini nan babampaf da ribarangan i anungꞌ nida nan mangan da rib fain i nam ribarangan tsangandan nasangꞌ Garam Narunggan natip namunti marataꞌ namingꞌ garam mampan gin. 10 Ribarangan igif nan igi imingꞌ uwayantan da igut i ruan ibiani, “Nan Arangan nida bida ‘muntida marataꞌ mingꞌa garam mampan gin’ igi wainggan ibianungꞌ?”

11 Da ribarangan igut i Arangan, “Wain idzuwai da garam gudzupuꞌ i nan faidagin ini biani, ‘Eliya namungꞌ ba’?”

12 Da Yisu ini ribarangan nanggan mungaꞌ ibiani, “Nan igi nan nidzun, Eliya imungꞌ ba i tipa nam santan tipa waꞌa bini. Da wain ibianungꞌ i nan kakaran ugu nida bida Garam Narunggan bungꞌ ayu tsakia da garam bungꞌ atsanga Arangan nabi nam utaꞌ angu? 13 Da bitsintaꞌ dzi ni da agam, Eliya iba sib, da ribarangan inang nam santan mingꞌa ribarangan wangunggan rutin, isangꞌ nan kakara mungꞌ i arangan.”

14 Gubuꞌ Yisu da riban iruꞌ da bits igi yunga bawaꞌan da riban atsungꞌa gin fain, da itsanga garam gudzupuꞌ i nan faidagin ruas ruta Arangan riban fain igi udzungꞌa i nan da ruan, da ampi tsiraꞌ tsuafiꞌa ribarangan sib. 15 Da garam santan irunt fafun da itsauꞌ i tsanganda Yisu badan da santan irunt ifan i isa yaring i Arangan.

16 Da Yisu igut i ribarangan, “Agam irut ribaga udzungꞌ i nan da ruam i nam idzuwai?”

17 Da garam mangan mingꞌa ampi tsiraꞌ igi wasaꞌ ini, “Kidungwaga, marapayam maisan nanga rib nifun putidan iyantsang dzi narunggangꞌ marub da dzi yu arangan iba da agu. 18 Da gubuꞌ marapayam maisan igi yantsanga arangan, da itapu arangan iruꞌ intap. Arangan nifu fufuat iyus da igara gris gris da rinin santan irururung. Da dzi gut i u ribam atsungꞌa i agu i siata marapayam maisan igi rai da inang itsiri.”

19 Da Yisu ini nan mungaꞌ ibiani, “Agam yangin gubuꞌ aruani, agam garam mamida i muarutsan! Dzi rut agam impai gubuꞌ guntiꞌ bingan, da gubuꞌ idzuwai da agam muarutsan? Wayu mamaꞌ igi naba da dzi.”

20 Ibinigi da ribarangan iyu arangan ifan. Da marapayam maisan tsanganda Yisu, da sung angu da yuntsiang i mamaꞌ igi da ibrup iruꞌ intap, nifu fufuat iwaꞌ da irimpingꞌ i ruan iyung.

21 Da Yisu igut i mamaꞌ igi ramanggan, “Gubuꞌ idzuwai da nam ani waꞌ da arangan isu miamun?”

Da ramanggan ini, “Gubuꞌ arangan mamaꞌ narun angu. 22 Gubuꞌ ampi bingan da marapayam maisan igi itapu arangan iyab dzaf da iruꞌ mpui i isa arangan funub. Da bitsintaꞌ bida agu sangꞌan, da maram wantuꞌ agai ani da warim aga sib.”

23 Da Yisu ini, “Ibianungꞌ da u ni, ‘Bida agu sangꞌan’? Anutu isangꞌ i nanga nam santan da mangan bida muarutsan.”

24 Da sung angu da mamaꞌ igi ramanggan inuꞌ ibiani, “Dzi muaruts, da warim dzi nanggangꞌ mamida i muarutsa babampafan ani sib.”

25 Da Yisu tsanganda ampi tsiraꞌ runta badan, da Arangan impiꞌ marapayam maisan igi, “Agu marapayam nanga garam nifun da ringan putidan, Dzi nani da agu, wawaꞌ ba sinungꞌ arangan da anungꞌ tipa atangꞌa i arangan u.”

26 Da marapayam maisan iyaiꞌ tsiraꞌ da yuntsiang i mamaꞌ igi tsiraꞌ bingan da iwaꞌ sinungꞌ arangan. Da mamaꞌ igi iwaꞌ ibi garam mampan, ibinigi da garam ampi bingan ini, “Arangan imamp.” 27 Da bitsintaꞌ Yisu igif arangan bangin da iraꞌ gin iyab da arangan imunti.

28 Da gubuꞌ Yisu ruta riban atsungꞌa gin angu atangꞌa ungar wasaꞌ sib, da ribarangan igut i Arangan, “Wain idzuwai da aga wasangꞌ i daruda marapayam maisan igi rai u?”

29 Da Yisu ini ribarangan nanggan mungaꞌ ibiani, “Nan udagin angu da isangꞌ i daruda marapayam maisan bida nigi rai.”

30 Ribarangan itangin gamp igi rai da iyung intap Galili ifan. Yisu ibugin i rib fain sruꞌa i ribarangan gan mpada gin, 31 i wain, Arangan yutus i riban atsungꞌa gin angu i nan fain. Da ini da ribarangan, “Bungꞌ atangin Garam Narunggan nafa garam ipiap banginggan. Da ribarangan bungꞌ ais Arangan funub, da mampa sib, da gubuꞌ iruꞌ da bits da bungꞌ atip namunti marataꞌ.” 32 Da bitsintaꞌ Yisu riban atsungꞌa gin igi wasruꞌ i nan Arangan nidan igi wainggan u, da irat i guta i Arangan gin.

33 Yisu da riban atsungꞌa gin ibawaꞌ gamp Kapenaum. Da gubuꞌ atangꞌa ungar wasaꞌ da Arangan igut i ribarangan, “Agam ini nan idzuwai da ruam imingꞌ sanab iba?” 34 Da bitsintaꞌ ribarangan impa untras angu, i wain, ribarangan yudzungꞌ i nan da ruan imingꞌ sanab iba i mangan nigi suda tsiraꞌ yusan.Mt 18:1; Lk 9:46; 22:24

35 Yisu impa iruꞌ da inuꞌ aposel rusan 12 igi iba da ini, “Bida mangan nida suda miamun da arangan nasu garam bampan bingan, da nasu mamaꞌ gum i santan.”Mt 20:26-27; Mk 10:43-44; Lk 22:26

36 Da Arangan iyu mamaꞌ narun mangan iba imunti wasaꞌ i ribarangan. Da yarimp mamaꞌ narun igi da ini da ribarangan, 37 “Bida manga isa yaring i mamaꞌ narun mangan bida ani i dzi binganggangꞌ, da yis yaring i dzi; da manga isa yaring i dzi anungꞌ yis yaring i dzi angu u, da bitsintaꞌ yis yaring i aru tanginda dzi badan ugu impruꞌ ibinigi.”Mt 10:40; 18:5; Lk 9:48; 10:16; Ywn 13:20

38 Da Yowanis ini da Arangan, “Kidungwaga, aga tsanga garam mangan siata marapayam maisan i u binganggam. Da aga ni da arangan i tanginda rai, i wain, arangan anungꞌ yatsungꞌ i agi.”

39 Da Yisu ini, “Anungꞌ muntida sib i arangan u, i manga bida nanga nam maran mangan i dzi binganggangꞌ da wasangꞌ nida nan maisan i dzi sung angu u, 40 i manga mamida i rima ipiap i agi isu agi gangꞌ mangan. 41 Dzi nani nan nidzun da agam, manga rima kap mpui mangan da agam, i wain, agam iyu Kristus binganggan, da garam igi bungꞌ ayu nam igi mungaꞌ gan.

42 “Da bitsintaꞌ bida manga nanga mamaꞌ narun narun tuas aru muarutsa dzi ani manga ruaꞌa i asub, da bungꞌ awaꞌ da barabin nayus barabin bida dzura i tauf tsiraꞌ i arangan wan da tapuda ruꞌa uruts wasaꞌ. 43-44 Da bida u bangim mangan nanga agu waꞌan da asub da warab utap. Anungꞌ idaum i bangim iruꞌrun rumingꞌan da u fada dzaf gada ratar ntingan angu.†Mingꞌa papiar ratar fain mingꞌa nifu nan Grik da nan bida ani imingꞌ ampap ani: “mingꞌa mumai ‘turup gada ribarangan mamida i mampan, da dzaf mamida i mampan.’ ” Watsanga ampap 48. Bungꞌ adaum nayus i u waꞌan da nam mpada ratar ntingan ruta bangim bits tutupan. 45-46 Da bida u fagam mangan nanga agu waꞌan da asub da warab utap. Anungꞌ idaum i Anutu tapuda agu ruꞌa dzaf gada ratar ruta fagam iruꞌrun.‡Mingꞌa papiar ratar fain mingꞌa nifu nan Grik da nan bida ani imingꞌ ampap ani: mingꞌa mumai ‘turup gada ribarangan mamida i mampan, da dzaf mamida i mampan.’ ” Watsanga ampap 48. Bungꞌ adaum nayus i u waꞌan da nam mpada ratar ntingan ruta fagam bits tutupan. 47 Da bida u mara nidzun mangan nanga agu waꞌan da asub da waruaꞌ rai. Bida u atangꞌa Anutu nanggan mpada tayangꞌ gan garaman ruta mara nidzun bitsintaꞌ angu, da nan imaꞌ. Da bitsintaꞌ anungꞌ idaum i u mara nidzun iruꞌrun rumingꞌan da Anutu tapuda agu ruꞌa dzaf gada ratar, 48 mingꞌa mumai ‘turup gada ribarangan mamida i mampan, da dzaf mamida i mampan.’‘turup gada ribarangan mamida i mampan, da dzaf mamida i mampan’ — Ais 66:24

49 “Anutu bungꞌ atiri dzaf nayab i garam santan nabi garam nangan da tirida iriꞌ i nam tsaradan santan suda dangki fadan da Arangan. 50 Iriꞌ igi nam ngarubini bingan. Da bitsintaꞌ bida gamiꞌ adzuꞌan da giriripan gan maꞌan, da wasangꞌ tipa nanga nam manga i iriꞌ igi i tipa giriripan u. Imaꞌ. Agam nawaꞌ abi iriꞌ bini nanga nam mpadan waꞌa bini da wampa wampruꞌ ruam ruta nan nufan.”Mt 5:13; Lk 14:34-35