17
Asub da Nam Muarutsan Sanaban
(Matiu 18:6-9; Markus 9:42-50)
1 Yisu ini da gan riban atsungꞌa gin ibiani, “Nam mara maran intsaꞌa garam i ruaꞌa i asub bungꞌ aba. Da bitsintaꞌ mangan santingꞌa nam intsaꞌan bida nigi natsauꞌ i runggan. 2 I bida nangan da isiꞌ isiꞌ tuas arani mangan ruaꞌa i asub, da bungꞌ awaꞌ da barabin nayus aru dzura i tauf tsiraꞌ i wan da tapuda ruꞌa uruts wasaꞌ. 3 Watsanga runggam sib.
“Bida u rainggam mangan nanga asub yaba i agu, wararu arangan, da bida parima i ruan da wasiat i gan asuban rai. 4 Da bida gubuꞌ bitsintaꞌ arangan nanga asub sangꞌa 7 da agu, da parima i ruan da tipa badan da agu sangꞌa 7 da gampunda ruan, da wasiat i nanggan maisan rai.”
5 Da aposel ruas ini da Nifutsarif, “Wanang aga nanggangꞌ muarutsan nasu tsiraꞌ.”
6 Da Nifutsarif ini nan mungaꞌ, “Bida agam nanggam muarutsan isiꞌ angu sangꞌa miriamp nidzun da agam isangꞌ i nidan da gai igi bida ani, ‘Wabriꞌ ruam da wantangꞌ runggam waruꞌ uruts wasaꞌ,’ da bungꞌ atsungꞌ nan agam nidan!Mt 17:20; Mk 11:22-23
7 “Ma bida agam mangan garam guman raba intap ma mpada tayangꞌ dumpa tanginda gum rai da bungꞌ bawaꞌan, da garam tsiraꞌ gan anungꞌ isangꞌ i nidan da ba mpada ruꞌan da gada nam u, imaꞌ. 8 Da bungꞌ ani da garam guman, ‘Watsuf ngarukui gam faꞌ da watip dzi nanggangꞌ gadan da wayu waba da dzi nagan da nanum mungꞌ, raiyi da wamus gada gam.’ 9 Da isangꞌ i garam tsiraꞌ rima dangki da arangan i guman nangan ibi arangan nidan? Imaꞌ. 10 Da agam ibinigi, gubuꞌ agam nanga nam santan nidan da agam bida arigi, wani wabiani, ‘Agai mamaꞌ gum utaꞌ angu; aga atsungꞌ gumangꞌ nangan.’ ”
Rib Rini Digiting 10
11 Yisu iyung ifa i waꞌa Yerusalem da Arangan iyung yatsungꞌ ampap mingꞌa wasaꞌ i intap Galili da Samaria. 12 Da gubuꞌ Arangan atangꞌa gamp mangan da garam 10 diginting tirida gin iwaꞌ rutin da imunti ruguntiꞌ gin*garam 10 diginting tirida gin...imunti ruguntiꞌ gin: Mingꞌa garam Yuda sanaban da rib diginting tirida gin wasangꞌ fada uts ma mpada mpruꞌa rib rinin dauman. I wain ribarangan ibubumpua i Anutu maranggan. Ribarangan wasangꞌ i atangꞌa Ungar Mararam ma rima dangki da Anutu nasangꞌ rininggan waꞌa bini da garam pumuꞌa Anutu tsangandan da nida wasi bida ribarangan iwaꞌ bini sib. Watsanga ampap 14 da Wok Pris 14:1-32. 13 da inuꞌ ifan, “Yisu, Tsiraꞌ, wagaib agai ani!”
14 Da gubuꞌ Yisu tsanganda ribarangan da ini, “Agam wafa santingꞌ runggam da garam pumuꞌa Anutu.” Da gubuꞌ ribarangan rungꞌ yunga fadan da rininggan iwaꞌ bini.
15 Da gubuꞌ ribarangan gan mangan tsanganda rininggan waꞌa bini, da iparim i ruan da itip iba, da iyaiꞌ tsiraꞌ bingan itsarif Anutu. 16 Da arangan iba tatapuangꞌ maran iruꞌ Yisu fagan da irim dangki da Arangan. Garam aru nigi garam Samaria. 17 Da Yisu igutin, “Dzi buni garam 10 rinin dauman. Da 9 ugu ifa anungꞌ? 18 Ibi anungꞌ da garam mingꞌa manaꞌ i utup Yuda ani angu itip iba i tsarifa Anutu da fain ugu imaꞌ?” 19 Da Yisu ini da arangan, “Wauriꞌ da wafan; u nanggam muarutsan inang u rininggam idaum.”
Anutu Nanggan Mpada Tayangꞌ Gan Garaman
20 Gubuꞌ mangan da garam Farisai igut i Yisu ibiani, “Gubuꞌ bungꞌ abianungꞌ da Anutu nanggan mpada tayangꞌ gan garaman bungꞌ aba?”
Da Yisu ini, “Anutu nanggan mpada tayangꞌ gan garaman wabi nam garam tsangandan u. 21 Garam anungꞌ isangꞌ i nidan, ‘Watsangan! Arangan ani,’ ma ‘Watsangan! Arangan aga.’ Imaꞌ. Anutu nanggan mpada tayangꞌ gan garaman imingꞌ wasaꞌ i agam sib.”†imingꞌ wasaꞌ i agam sib - ma impa wasaꞌ i agam sib.
22 Da Yisu ini da gan riban atsungꞌa gin, “Gubuꞌ maran bungꞌ aba da agam bungꞌ arim maram nidzun angu i tsanganda Garam Narunggan gubuꞌ gan bitsintaꞌ angu, da bitsintaꞌ agam wasangꞌ i tsangandan. 23 Garam bungꞌ ani da agam, ‘Watsangan! Arangan aga,’ ma ‘Watsangan! Arangan ani.’ Imaꞌ. Wampai wabi arigi; anungꞌ atsungꞌa rib igi u. 24 Mingꞌa arangan gubuꞌ gan da Garam Narunggan bungꞌ awaꞌ nabi tsuarip prikan mpara i ruan mingꞌa maranguntung wagungꞌ. 25 Da bitsintaꞌ miamun da arangan nawaꞌ da nam tsakia da barabin ampi bingan da yangin gubuꞌ aruani bungꞌ abugin arangan raiyi.
26 “Nam idzuwai waꞌan da Noa gubuꞌ gan mpadan ugu, da Garam Narunggan gubuꞌ gan bungꞌ awaꞌ nabinigi. 27 Tuas arangan iga nam da inum, da iyu finin da isu gabun isangꞌ gubuꞌ Noa atangꞌa madzung sib da mpui fur tsiraꞌ waꞌan da siata ampan santan. 28 Da isangꞌ ibinigi angu i Lot gubuꞌ gan ugu. Garam igan da inum, isub nam, irants nam, intang nam yamun da irim ungar. 29 Da bitsintaꞌ gubuꞌ Lot tanginda Sodom rai da tauf dzaf imui ibi gamiꞌ imingꞌ gunungun da is ribarangan santan funub.
30 “Garam gar santan bungꞌ ampa nabinigi angu da wasangꞌ tipa runggan da gubuꞌ Garam Narunggan kupisa ruan. 31 Waꞌa gubuꞌ arigi da garam mangan mpada ungar manaꞌ wasangꞌ i atangꞌa ungar wasaꞌ i uda nam bunumpan u. Da manga mpada gum wasaꞌ wasangꞌ i tipa fada ungaran i uda nam bunumpan u. 32 Maram wafur nam waꞌan da Lot fininggan.Mia 19:26 33 Manga intsaꞌa i rima runggan sib i nanggan mpada bini mingꞌa intap ani da bungꞌ arim ganunggan rai, da bitsintaꞌ garam rima runggan rai da bungꞌ arim ganunggan sib.Mt 10:39; 16:25; Mk 8:35; Lk 9:24; Ywn 12:25 34 Dzi nani da agam, rib iruꞌ mpruꞌa ruan gingꞌa rabiꞌ da idziang arigi, da bungꞌ ayu mangan da mangan bungꞌ ampai. 35 Sagat iruꞌ mpruꞌa ruan rusa dzangkum, da bungꞌ ayu mangan da manga bungꞌ ampai.” 36 ‡Mingꞌa papiar ratar fain da ikakar nan ibiani, Garam iruꞌ mpruꞌa ruan rafa gum, da bungꞌ ayu mangan da mangan bungꞌ ampai, da bitsintaꞌ papiar ratar miamun ugu wakar ampap 36 igi u.
37 Da ribarangan ini, “Nifutsarif, nigi bungꞌ awaꞌ amingꞌ anungꞌ?”
Da Yisu ini, “Apu mampan mangan mingꞌa anungꞌ, da ibingimp santan bungꞌ ais ampruꞌ gin.”
17:6: Mt 17:20; Mk 11:22-23
*17:12: garam 10 diginting tirida gin...imunti ruguntiꞌ gin: Mingꞌa garam Yuda sanaban da rib diginting tirida gin wasangꞌ fada uts ma mpada mpruꞌa rib rinin dauman. I wain ribarangan ibubumpua i Anutu maranggan. Ribarangan wasangꞌ i atangꞌa Ungar Mararam ma rima dangki da Anutu nasangꞌ rininggan waꞌa bini da garam pumuꞌa Anutu tsangandan da nida wasi bida ribarangan iwaꞌ bini sib. Watsanga ampap 14 da Wok Pris 14:1-32.
†17:21: imingꞌ wasaꞌ i agam sib - ma impa wasaꞌ i agam sib.
17:33: Mt 10:39; 16:25; Mk 8:35; Lk 9:24; Ywn 12:25
‡17:36: Mingꞌa papiar ratar fain da ikakar nan ibiani, Garam iruꞌ mpruꞌa ruan rafa gum, da bungꞌ ayu mangan da mangan bungꞌ ampai, da bitsintaꞌ papiar ratar miamun ugu wakar ampap 36 igi u.