16
Nan Raman i Garam Nan Umpur Mpada Tayangꞌ Garam Nanggan
1 Yisu ini da riban atsungꞌa gin, “Garam ruta nam bunump mangan impai, da rib fain ini da arangan i gan garaman mpada tayangꞌ i nanggan itapu arangan nam bunumpan igi ararai. 2 Ibinigi da garam nam bunump inuꞌ garam gum igi da igut i arangan, ‘Nan dzi ringantagin yaba i agu ani ibianungꞌ? Wakakar da wasantingꞌ dzi i u nanggam mpada tayangꞌ gin wainggan, i u wasangꞌ rung mpada tayangꞌ gin u.’
3 “Da garam mpada tayangꞌ igi ini angu i runggan, ‘Dzi nanang nabianungꞌ da aruani? I dzi garam gudzunggaꞌ ani bungꞌ asiat dzi rai i gangꞌ gumangꞌ ani. Dzi anungꞌ isu rini urun i suda mamaꞌ gum rafa intap, da dzi riningꞌ imiaꞌ i yaiꞌa ruangꞌ da garam. 4 A! Dzi sruꞌ i nam idzuwai dzi nangan i bida gubuꞌ garam gudzun siata dzi rai i gangꞌ gumangꞌ da garam bungꞌ ais yaring i dzi fada rutin i gan ungaran.’
5 “Ibinigi da arangan inuꞌ garam uda nam ntsuman i gan garam gudzun gan igi bitsintaꞌ bitsintaꞌ iba rutin. Da arangan igut i miamun, ‘U yu nam ntsuman wayawai i dzi garam gudzunggaꞌ?’
6 “Da arangan ini binaꞌ, ‘Dzi yu madamin oliv dram isiꞌ isiꞌ 100.’
“Da arangan ini da garam uda nam ntsuman igi, ‘Wampai waruꞌ sung da wayu papiaram nam ntsuman ani, wagari rai, da wakar 50 angu.’
7 “Da arangan itip igut i garam suda iruꞌ, ‘U nam ntsuman gam wayawai?’
“Da arangan ini nan mungaꞌ ibiani, ‘Dzi yu 1,000 bek wit.’
“Da garam mpada tayangꞌ ini, ‘Wayu papiaram nam ntsuman ani, wagari rai, da wakar 800 angu.’
8 “Ibinigi da garam nam bunump itsarif garam nan umpur mpada tayangꞌ i nanggan igi, ibiani arangan inang gum ibi garam mararuru tsiraꞌ. I sanab bida nigi garam intap isu mararuru iyus garam mararam i sanab tsanganda runggan bini mingꞌa wasaꞌ i garam intap ani. 9 Ibinigi da dzi nani da agam, warim rib fain sib i nam bunump intap ani gan i suda agam rinum rusam. Da gubuꞌ nam bunump igi ntsupa sib da ribigi bungꞌ ais yaring i agam i ungar mingꞌa gamp mpada ratar ntingan.
10 “Manga bida mpada tayangꞌ nam isiꞌ angu bini, da arangan bungꞌ ampa tayangꞌ nam tsiraꞌ bini nabinigi. Da mangan bida wayada nam isiꞌ angu da bungꞌ awaya nam tsiraꞌ nabinigi. 11 Bida agam mamida mpada tayangꞌ nam bunump intap ani gan bini, da Anutu isangꞌ i rima nam bunump nidzun mingꞌa gunungun i agam mpada tayangꞌ gin? 12 Da bida agam mamida mpada tayangꞌ garam mangan nam bunumpan bini, da mangan bungꞌ arim agam nam bunumpam da agam?
13 “Garam gum bitsintaꞌ anungꞌ isangꞌ i nanga gum i garam gudzun iruꞌ u, i maran bungꞌ ari i mangan da nabugin mangan, ma bungꞌ ani mais i mangan da narim runggan santan nafa da mangan. Agam wasangꞌ i pumuꞌa Anutu mpruꞌan da nam bunump intap ani.”
14 Da rib Farisai maran arida i moni yusan iringant i nan igi da igagara sib i Yisu da irim umpur in. 15 Da Yisu ini da ribarangan, “Agam rib aru tsarifa runggam bida garam rururungan mingꞌa garam gar maranggan, da bitsintaꞌ Anutu isruꞌ i agam wangunggam sib. Nam idzuwai garam gar maran arida gin yusan ugu da Anutu ibugin nidzun angu. 16 Nan faidagin da profet ruas nan gan akaran isu nan mpada tayangꞌ agam nanggam mpadan isangꞌ bawaꞌa Yowanis gubuꞌ gan. Mingꞌa gubuꞌ arigi da sisingꞌ bini Anutu nanggan mpada tayangꞌ gan garaman ipipuaꞌ i ruan wasi, da ampi bingan irim ruan iyus iyus i atangꞌa gin. 17 Gunungun da intap isangꞌ i ntsupan, da bitsintaꞌ Anutu nan gan faidagin isiꞌ mangan anungꞌ isangꞌ i ntsupan. Imaꞌ. 18 Bida garam mangan siata fininggan da uda sagat mangan da arangan inang sanab araraꞌ, ma garam manga uda sagat mangan gabunggan siatan da garam igi inang sanab araraꞌ ibinigi.Mt 5:32; 19:9; Mk 10:11-12
Garam Nam Bunump da Ladzarus
19 “Garam nam bunump mangan yatsuf ngarukui grigriꞌan da fafusan bini angu. Da arangan impa bini da iga nam bini bini da nugun itsiaꞌ da gubuꞌ santan. 20 Da garam sauda runggan mangan binganggan Ladzarus, diginting tirida gin, riban isintungꞌ arangan imingꞌ garam nidzun igi muantsi nifun gan manaꞌ. 21 Da arangan maran yari iyus i gada nam pupumuts ruꞌa mingꞌa garam igi tebolan warangꞌ. Da iyam inang da iba damis arangan rini mais igi.
22 “Gubuꞌ mangan da garam sauda runggan igi imamp da angira iyu arangan ifan da itangin arangan impa uts da Abraham. Da garam nam bunump imamp ibinigi da idzufungꞌ arangan. 23 Arangan iwaꞌ da nam tsakia iyus imingꞌ garam mampan gampan, da arangan iraꞌ i maran da itsanga Abraham da Ladzarus mpada i bangin marafaingꞌ mingꞌa ruguntiꞌ bingan.
24 “Ibinigi da arangan inuꞌ, ‘Ramangꞌ Abraham, maram wagaib dzi ani. Da watangin Ladzarus i tuguda bangin tsitsin i mpui da ba rima i dzi mangꞌ rangarangan, ibiani dzi waꞌ da nam tsakia iyus imingꞌ dzaf ani.’
25 “Da bitsintaꞌ Abraham ini, ‘Narunggangꞌ, maram wafur u gubuꞌ gam mpada marataꞌ ugu da u waꞌ da nam bini bini da Ladzarus impa maisan angu, da bitsintaꞌ aruani da arangan impa ruta nugun nufan, da u waꞌ da nam tsakia. 26 Da wain bits impruꞌ ibiani, gangar tsiraꞌ imunti wasaꞌ i agu da agai, da mangan mingꞌa ani wasangꞌ i biadan da agam, ma agam mangan wasangꞌ isa udziꞌ i badan da agai u.’
27 “Da garam nam bunump ini, ‘Ramangꞌ, dzi nagaib runggangꞌ da agu nabiani. Watangin Ladzarus natip nafa dzi ramanggaꞌ gampan, 28 i dzi raingꞌ rusangꞌ 5 rumpai i. Wanang da arangan nafa fai nan i ribarangan i anungꞌ bada gamp aru nam tsakia yusan gin ani u.’
29 “Da Abraham ini, ‘Imaꞌ. Moses da profet ruas nan gan akaran rumingꞌ i ribarangan ringantida gin.’
30 “Da garam nam bunump ini, ‘Imaꞌ, ramangꞌ Abraham, bida garam mampan mangan waꞌan da ribarangan da ribarangan bungꞌ aparim i ruan sinungꞌ nanggan maisan.’
31 “Da Abraham ini da garam igi, ‘Bida ribarangan mamida muarutsa Moses da profet ruas nan gan, da ribarangan anungꞌ isangꞌ i parima i ruan bida manga muntida marataꞌ mingꞌa garam mampan gin u.’ ”