1 Yisu ini nan raman i santingꞌa riban atsungꞌa gin i udagin maiꞌ maiꞌ, da bida sauda nidzun da anungꞌ raraiꞌa gin u. 2 Da ini ibiani, “Mingꞌa gamp mangan da garam raruda garam mangan impai, da anungꞌ irat i Anutu ma itsarif garam gar u. 3 Da sagat yaruf mangan impai gamp igi mpruꞌ, da iti fa rutin maiꞌ maiꞌ i nida wangu barabin gan bida ani, ‘Warim nan rima dzi sib i gangꞌ garam ipiapangꞌ aga.’ 4 I gubuꞌ fain da garam igi bugin rima sagat igi sib, da raiyi ini i wangunggan, ‘Dzi anungꞌ irat i Anutu ma itsarif garam gar u, 5 da bitsintaꞌ sagat yaruf ani iti ba da dzi maiꞌ maiꞌ da dzi raraiꞌ. Dzi bungꞌ arim sib i barabin gan, i maba maiꞌ maiꞌ da dzi da dzi awangꞌ amaꞌ i.’ ”

6 Da Nifutsarif ini, “Watsanga garam maisan raruda garam igi nan gan nidan. 7 Da ibianungꞌ? Anutu wasangꞌ rima garaman piriangꞌan sib aru udagin rutin gubuꞌ da idziang sib angu, ma? Ma Arangan bungꞌ arim barun rutin? Imaꞌ! 8 Dzi nani da agam, Arangan bungꞌ arim ribarangan sib sung angu. Da bitsintaꞌ, dzi gut i agam, gubuꞌ Garam Narunggan tipa badan, da Arangan bungꞌ awaꞌ da garam muarutsan mingꞌa intap ani ma imaꞌ?”

9 Yisu ini nan raman mangan ani da garam fain tsarifa runggan bini yusan da rasuda rib fain, 10 “Garam iruꞌ iyab Ungar Mararam i udagin da Anutu, manga Farisai da manga garam uda takis. 11 Da garam Farisai imunti iyab da iyugin i runggan ibiani, ‘Anutu, dzi rim dangki da agu, i dzi anungꞌ ibi garam fain aga u — wapa nam, da nanga maisan, da araraꞌan ma bida garam uda takis araga. 12 Da gubuꞌ iruꞌ mingꞌa wasaꞌ i suntaꞌ santan da dzi paꞌ ruangꞌ i nam gadan, da dzi brang nanggangꞌ ufuman isangꞌ 10 da dzi rim i gan bits ibiaꞌ da agu.’

13 “Da bitsintaꞌ garam uda takis imunti ruguntiꞌ. Da arangan anungꞌ idantang iyab gunungun, da bitsintaꞌ itsiats nugun i santingꞌa wangun barabin gan da ini, ‘Anutu, wagaib dzi garam maisan ani.’

14 “Dzi nani da agam, garam aruani iwaꞌ rururungan i Anutu maranggan sib da itip iruꞌ gan ungaran, da garam Farisai imaꞌ. I rib santan tsarifa runggan da Anutu bungꞌ arasu, da rib rasuda runggan da Anutu bungꞌ atsarif.”

15 Rib fain iyu mamaꞌ narun narun ibinigi iba i Yisu rima bangin ragun gin. Da gubuꞌ riban atsungꞌa gin tsanganda bida nigi da impiꞌ ribarangan. 16 Da bitsintaꞌ Yisu inuꞌ i mamaꞌ narun narun bada rutin, da ini da riban atsungꞌa gin ibiani, “Watangin narun narun igi naba da dzi da anungꞌ muntida sib in, i Anutu nanggan mpada tayangꞌ gan garaman bungꞌ awaꞌ da garam sanaban bida narun narun ani.Mt 19:14; Mk 10:14 17 Dzi nani nan nidzun bingan da agam, manga mamida muarutsa Anutu i mpada tayangꞌ arangan bida mamaꞌ narun da wasangꞌ i mpada wasaꞌ i Anutu nanggan mpada tayangꞌ gan garaman.”Mt 18:3; Mk 10:15; Ywn 3:3,5,7; 1Pe 1:3,23

18 Da garam gudzun mangan igut i Yisu ibiani, “Kidungwaga tsiraꞌ bini, dzi bunanga bida anungꞌ i waꞌan da nam mpada ratar ntingan?”Mt 19:16; Mk 10:17; Lk 10:25

19 Da Yisu ini, “Ibianungꞌ da u faringꞌ dzi bini? Garam manga anungꞌ bini u. Imaꞌ. Anutu runtaꞌ angu.Mt 19:17; Mk 10:18 20 U sruꞌ i nan faidagin sib ibiani, ‘U ma araraꞌ maꞌ. U mais garam funub maꞌ. U mawap nam maꞌ. U madzur garam maꞌ. Watsarif ramanggam da rinanggam.’ ”Kis 20:12-16; Lo 5:16-20; Mt 5:21,27; 15:4; 19:18-19; Mk 7:10; 10:19; Ro 13:9; Ef 6:2-3; Dzm 2:11

21 Da arangan ini, “Dzi yatsungꞌ sanab igi santan da dzi mamaꞌ isiꞌ angu.”

22 Gubuꞌ Yisu ringantagin da ini rutin, “Da bitsintaꞌ u wanang sanab bitsintaꞌ aruani u. Wafan da wasub moni i nam bunumpam santan da warim moni da garam sauda runggan da u bungꞌ awaꞌ da nam bini namingꞌ Gunungun. Da waba atsungꞌ i dzi.” 23 Da gubuꞌ garam arigi ringanta i nan igi, da arangan wangun ibarabin gin, i arangan garam nam bunump tsiraꞌ.

24 Da Yisu itsanga arangan wangun ibarabin da ini, “Rib ruta nam bunump tsiraꞌ bungꞌ abarabin wasi i atangꞌa Anutu nanggan mpada tayangꞌ gan garaman. 25 Bida kamir nida i atangꞌa i nil marabampun da barabin gan wasangꞌ garam nam bunump barabin gan atangꞌa Anutu nanggan mpada tayangꞌ gan garaman.”Mt 19:24; Mk 10:25

26 Da rib ringanta i nan igi igutin, “Bidanigi da mangan igi bungꞌ awaꞌ da nam mpada ratar ntingan?”

27 Da Yisu rungꞌ ini, “Nam garam gar mamida i sangꞌa i nangan ugu da Anutu isangꞌ i nangan.”Mt 19:26; Mk 10:27

28 Da Petrus ini, “Waringantin, aga tangin nanggangꞌ santan rai da yatsungꞌ agu.”

29 Da Yisu ini da ribarangan, “Dzi ni nan nidzun bingan da agam, rib aru tanginda gampan, ma fininggan, ma raman da rinanggan, ma rain rusan, ma narun rusan, i mingꞌa wasaꞌ i Anutu nanggan mpada tayangꞌ gan garaman, 30 ribarangan bungꞌ ayu nam nayus nidzun angu i nanggan tanginda rai ugu da gubuꞌ mpada mingꞌa intap ani, da gubuꞌ buntun aga da ribarangan bungꞌ awaꞌ da nam mpada ratar.”Mt 19:29; Mk 10:29-30

31 Yisu iyu riban 12 igi angu da ini nan rutin, “Agi yung sanab iyab Yerusalem da nan santan profet ruas akara i Garam Narunggan ugu bungꞌ asu nidzun namingꞌ igi. 32 Bungꞌ arim Arangan nafan da garam mingꞌa manaꞌ i utup Yuda banginggan.*garam mingꞌa manaꞌ i utup Yuda banginggan — Garam Yuda gudzunggan bungꞌ arim Arangan nafa da garam Rom banginggan. Garam Rom anungꞌ garam Yuda u, da bitsintaꞌ garam Rom igi impa tayangꞌ garam Yuda intapan. Da ribarangan bungꞌ arim umpurin, da bungꞌ arim ubin, da bungꞌ atupingꞌ nifu gurun i Arangan, 33 da bungꞌ aripi Arangan, da nais funub. Da gubuꞌ suda iruꞌ da bits da bungꞌ atip amunti marataꞌ.” 34 Da bitsintaꞌ rib atsungꞌa gin igi anungꞌ isruꞌgin, i nan igi wainggan rungꞌ imingꞌ maradzigin i ribarangan. Da ribarangan anungꞌ isruꞌ i nan idzuwai Arangan nidan.

35 Aru Yisu fasuda uts da Dzeriko da garam maran gampaman impa sanab ringampa i yaiꞌa ruan da garam. 36 Da gubuꞌ ringanta i garam ampi tsiraꞌ bafadan da igutin i nam idzuwai igi iwaꞌ. 37 Da ribarangan ini da arangan, “Yisu garam Nasaret ugu iba.”

38 Da aranga nuꞌ, “Yisu, Tafit Narunggan, wagaib dzi ani!”Mt 9:27; 20:29-30; Mk 10:46-47 39 Da rib mungꞌa fada i Yisu impiꞌ arangan, da ini rutin i mpada frap nufan. Da bitsintaꞌ arangan iyaiꞌ nifun tsiraꞌ, “Tafit Narunggan, wagaib dzi ani!”

40 Yisu ifa munti da ini da garam i uda arangan bada rutin. Da gubuꞌ arangan bawaꞌa uts, da Yisu igutin ibiani, 41 “U buni dzi nanga bida anungꞌ i agu?”

Da arangan ini, “Nifutsarif, dzi ni marangꞌ dzidziwandan i tsanganda nam.”

42 Da Yisu ini da arangan, “U maranggam nawaꞌ bini i u nanggam muarutsan angu itip u maranggam.” 43 Sung angu da aranga maran intap ruan da itsanga nam manaꞌ, da yatsungꞌ Yisu da itsarif Anutu. Gubuꞌ rib santan tsangandan nam igi, da itsarif Anutu ibinigi.