1 Gubuꞌ ribarangan yunga bawaꞌa uts da Yerusalem, da ibawaꞌ Betfage da Betani mingꞌa mamai Oliv, da Yisu itangin garaman atsungꞌa gin iruꞌrun imungꞌ 2 da ini rutin, “Agam wamungꞌ gamp aga. Da gubuꞌ agam atangꞌa fadan, da agam bungꞌ atsanga dongki naru faꞌ mangan garam mamida i mpada gin mungꞌ da idzur i nigi. Wakiraꞌ bruꞌ gin da wauntapin waba ani. 3 Da bida rib fain guta i agam, ‘Wain idzuwai da agam inang igi?’ da wani rutin, ‘Nifutsarif ini nanga gum in da bungꞌ atip natangin naba sung angu.’ ”

4 Rib iruꞌ igi ifan da iwaꞌ da dongki naru faꞌ muntida sanab, rib fain idzur ifan da ungar mangan muantsi gan. Da ribarangan ikiraꞌ. 5 Da garam fain muntidan nigi igutin, “Agam ikiraꞌ dongki narun igi i mantuda gin?” 6 Da rib iruꞌ igi ini nan mungaꞌ ibi Yisu nidan da ribarangan ugu, da ribigi itus maran angu i ribarangan da iyu ifan. 7 Da ribarangan untapa i dongki narun igi bawaꞌan da Yisu da yafus gan ngarukui gan guntiꞌ mingꞌa manaꞌ ntuaꞌ iyabin da Arangan impa gin. 8 Garam ampi bingan yafus ngarukui gan iruꞌ sanab, da fain yafus sai da gai yafan raba mingꞌa gum wasaꞌ. 9 Da garam santan yunga mungꞌan i Yisu da yunga atsungꞌan inuꞌ da ini,

11 Da Yisu yatangꞌ Yerusalem da ifa Ungar Mararam. Da Arangan iyung da itsanga nam santan, da bitsintaꞌ nam inuf sib da itip irut riban 12 iwaꞌ ifa Betani.

12 Da gubuꞌ pisan fada maiꞌ da ribarangan tanginda Betani rai, da Yisu mangits irut. 13 Da itsangan gai fik mangan yafan yusan muntida ruguntiꞌ, da Arangan ifa i tsanganda gai igi ikap nidzun, ma imaꞌ. Da fawaꞌan da gai igi, da itsangan yafan runggan angu da isau nidzun, i wain, anungꞌ iwaꞌ i gubuꞌ gan kapa nidzun u. 14 Da Yisu ini da gai igi, “Garam mangan anungꞌ tipa gada nidzun mangan mingꞌa agu gin ntingan u.” Da riban atsungꞌa gin iringant i Arangan nanggan nidan igi.

15 Fawaꞌa Yerusalem, da Yisu yatangꞌ Ungar Mararam ntiangꞌ gan wasaꞌ da idaru garam suba nam da rantsa nam. Arangan yitam i garam suba moni tiriang gan da yitam i bintip garam mpada gin i rantsa ngasabusir in. 16 Da Arangan ipaꞌ garam i anungꞌ buaringꞌa nam fada badan mingꞌa Ungar Mararam ntiangꞌ gan wasaꞌ igi u. 17 Da Arangan ifis i nan da ribarangan da ini, “Nan mingꞌa Anutu nanggan akaran ratar ibiani, ‘Bungꞌ afaringꞌ Dzi ungarangꞌ nabi garam intap santan ungaran udagin.’Ais 56:7 Da bitsintaꞌ agam inang ungar ani ibi garam wapa nam mumai gan kupa gin!”Dzr 7:11

18 Da garam pumuꞌa Anutu wain gudzun rusan da garam gudzupuꞌ i nan faidagin ruas ringanta gin da isau sanab i isa Arangan funub. I ribarangan irat i Arangan, i wain, itsangan ampan santan irunt fafun da itsauꞌ i Arangan nanggan fisagin.

19 Da nam nanga idziangan da ribarangan itangin gamp tsiraꞌ rai da iwaꞌ ifan.

20 Da ribarangan tipa yungan fadan da tataꞌ da itsangan gai fik igi imayangꞌ gin imingꞌ igat da iyab ifa sangꞌ buntun. 21 Da Petrus maran itip ifur da ini, “Rabai,†Rabai — Nan Rabai wainggan ibi ‘Kidungwaga’. watsangan! Gai fik u pupuarapa rutin ugu imayangꞌ gin wa.”

22 Da Yisu ini da ribarangan, “Wamuaruts Anutu nidzun. 23 Dzi nani nan nidzun da agam, bida manga nidan da mamai ani, ‘Wafan da watapu runggam waruꞌ uruts aga,’ da bida arangan muarutsa bida nan arangan nidan igi bungꞌ awaꞌ nasu nidzun da wangun mamida i suda iruꞌrun, da Anutu bungꞌ anang nasu nidzun da arangan.Mt 17:20; Lk 17:6 24 Ibinigi da dzi nani da agam, nam santan agam guta i Anutu gin, da wamuaruts nidzun nabi agam iyu sib, da Anutu bungꞌ anang nasu nidzun da agam.

25 Da bida agam muntida i udagin, da bida agam gifa garam mangan ragun i wangum, da wasiat rai mungꞌ, ida agam Ramanggam mpada gunungun bungꞌ asiat agam nanggam maisan rai. 26 ‡Mingꞌa papiar Grik ratar fain da yakar nan mingꞌa ampap 26 ibiani: “Da bitsintaꞌ, bida agam mamida i siata rai, da agam Ramanggam mpada gunungun wasangꞌ i siata agam nanggam maisan rai bida nigi u.” Da bitsintaꞌ, mingꞌa papiar Grik ratar nidzun fain da nan igi anungꞌ imingꞌ gin.

27 Ribarangan batipa waꞌa Yerusalem, da gubuꞌ Yisu ruyunga Ungar Mararam ntiangꞌ gan wasaꞌ igi, da garam pumuꞌa Anutu wain gudzun rusan, da garam gudzupuꞌ i nan faidagin ruas, da garam gudzun ruas mingꞌa wasaꞌ i ampan iba da Arangan. 28 Da igutin, “U nang nam santan igi i manga binganggan da nampanggan? Da manga taga ruan da agu i nanga nam bida nigi?”

29 Da Yisu ini ribarangan nanggan mungaꞌ ibiani, “Dzi bungꞌ agut i agam i nan guta gin mangan. Da bida agam nida nan mungaꞌ da dzi, da dzi bungꞌ ani da agam i dzi nang nam santan igi i manga binganggan da nampanggan. 30 Agam wani da dzi! Nampangꞌ Yowanis ruruba garam in iba imingꞌ Anutu gin ma iba imingꞌ garam gar gin?”

31 Da ribarangan ini nan da ruan ibiani, “Bida agi nida bida ani, ‘Iba imingꞌ Anutu gin,’ da arangan bungꞌ ani, ‘Ibianungꞌ da agam imami muarutsa arangan?’ 32 Da bitsintaꞌ, bida agi nida bida ani, ‘Iba imingꞌ garam gar gin,’ da anungꞌ isangꞌ.” (I ribarangan irat i ampan, i wain, rib santan imuaruts ibi Yowanis igi profet mangan.)

33 Da ribarangan ini Yisu nanggan mungaꞌ ibiani, “Aga anungꞌ isruꞌ gin u.”

Da Yisu ini, “Dzi binigi, dzi wasangꞌ i nidan da agam i dzi nang nam santan igi i manga binganggan da nampanggan.”