1 Gubuꞌ arigi da faingꞌ rungꞌ mpadan irim sisingꞌ da Yisu i garam Galili faingꞌ aru Pilatus isa funub da gubuꞌ ribarangan tsarada apu da Anutu mingꞌa Ungar Mararam. 2 Da Yisu ini i nan gan mungaꞌ, “Da agam maram ifur i rib Galili tuas aru nigi nanggan maisan mayus rib Galili faingꞌ aga, ibiani da tuas aranga iwaꞌ ibinigi? 3 Dzi nani da agam, imaꞌ! Da bitsintaꞌ bida agam mamida parima i ruam da agam santan bungꞌ arim ganunggam rai nabinigi. 4 Da agam maram ifur ibianungꞌ i rib 18 aru ungar guntiꞌ Siloam ruaꞌa ragun gin da mampan ugu? Ribarangan nanggan maisan mayus rib faingꞌ mpada Yerusalem? 5 Dzi nani da agam, imaꞌ! Da bitsintaꞌ bida agam mamida parima i ruam da agam santan bungꞌ arim ganunggam rai nabinigi.”

6 Ida Arangan ini nan raman ani: “Garam mangan intang gai fik wasaꞌ i gum wain gan, da arangan ifa i uda i nidzunggan, da bitsintaꞌ anungꞌ iwaꞌ rut u. 7 Ibinigi da arangan ini da garam mpada tayangꞌ gum wain igi ibiani, ‘Aruani da udzuf iruꞌ da bits da dzi ba i uda gai fik ani nidzunggan da dzi anungꞌ iwaꞌ rutin u. Ibinigi da warab rai! Wain idzuwai da intsup intap nagaran gan utaꞌ angu?’

8 Da garam mpada tayangꞌ gum ini, ‘Tsiraꞌ, wagantsi da udzuf bits, da dzi bungꞌ antang intap nawafiꞌ da narim apu ragin i wainggan. 9 Da bida kapa nidzun da udzuf mangan aga, bini! Da bida maꞌan, da narab rai.’ ”

10 Gubuꞌ Sabat mangan da Yisu ifis i nan imingꞌ ungar mpruꞌa ruan gin mangan. 11 Da sagat mangan impai nigi; marapayam maisan rima rinin gingꞌan iyantsang arangan isangꞌ udzuf 18, da inang arangan baru urun inguangꞌ da wasangꞌ muntida rururungan u. 12 Da gubuꞌ Yisu tsanganda sagat igi da inuꞌ arangan ba da ini, “Sagat, dzi kiraꞌ rinin gingꞌan dzura agu ugu sib.” 13 Ida Arangan irim bangin ragun i sagat igi, da sung angu barun idaum da imunti rururungan iyab da itsarif Anutu.

14 Da garam gudzun mpada tayangꞌ ungar mpruꞌa ruan gin itsangan da nugun iruaꞌ i Yisu tipa rinin gingꞌan dauman da gubuꞌ Sabat. Da ini da ribigi ibiani, “Gubuꞌ 6 igi gubuꞌ gum nangan. Ibinigi da agam waba da gubuꞌ arigi angu i nanga rininggam dauman, da anungꞌ nangan da Sabat u.”

15 Da Nifutsarif ini da arangan, “Agam garam umpur nifun nida nan angu! Agam santan inang da ikiraꞌ makau ma dongki gam i mumai gada nam in i mungꞌa gin fada i numa mpui da gubuꞌ Sabat! 16 Da sagat ani Abraham narunggan aru Sadang udzudan sangꞌa udzuf 18, da nam idzuwai bumais i dzi kiraꞌa arangan rininggan da gubuꞌ Sabat?” 17 Gubuꞌ Yisu nida nan igi da gan garam ipiapan santan rinin imiaꞌ, da bitsintaꞌ rib santan nugun itsiaꞌ i nam ngarubini santan aru Arangan nangan igi.

18 Ida Yisu igutin, “Dzi naram Anutu nanggan mpada tayangꞌ gan garaman nayab i nam idzuwai? 19 Nigi sangꞌ gai nidzun isiꞌ angu garam mangan udan da ntanga ruꞌa gan guman*gai nidzun isiꞌ angu garam mangan udan da ntanga ruꞌa gan guman — Gai nidzun igi binganggan ‘mastet’. Rib Yuda inang da intang, da gai nidzun isiꞌ igi iyingꞌ isu tsiraꞌ ibi 3 mita. Da rib Yuda inang da ini nan rima uwayant iyab i gai nidzun isiꞌ arigi.. Da iyingꞌ isu gai tsiraꞌ da apu dzuf irim git i bangin.” 20 Da Arangan itip igutin, “Dzi nabutip naram Anutu nanggan mpada tayangꞌ gan garaman nayab i nam idzuwai? 21 Isangꞌ yist sagat mangan udan da yatsa mpruꞌan da parawaꞌ tsiraꞌ bingan. Raiyi da iyantsang isangꞌ parawaꞌ santan fupan.”

22 Da Yisu iyung da ifis i nan imingꞌ gamp isiꞌ da tsiraꞌ ifa i waꞌa Yerusalem. 23 Da garam mangan igut i Arangan, “Nifutsarif, Anutu bungꞌ atus maran i rib iruꞌ angu i runta sinungꞌ Arangan nugu tsakia gan da atangꞌa gan nanggan mpada tayangꞌ gan garaman?”

Da Arangan ini da ribarangan, 24 “Warim runggam santan i atangꞌa muantsi nifufiring igi, i dzi nani da agam, ampi bingan bungꞌ aintsaꞌ i atangꞌan da anungꞌ isangꞌ u. 25 Da gubuꞌ ungar rinunggan tsunginda muantsi sib, da agam bungꞌ amunti manaꞌ da nadiditing muantsi da nanuꞌ, ‘Nifutsarif, watus muantsi i agai.’

“Da bitsintaꞌ Arangan bungꞌ ani nan mungaꞌ, ‘Dzi anungꞌ isruꞌ i agam ma agam imingꞌ anungꞌ iba.’

26 “Ida agam bungꞌ ani, ‘Amaꞌ. Aga rut agu iga nam da inum impruꞌ ruangꞌ da u fis i nan da agai imingꞌ aga gampangꞌ ugu.’

27 “Da bitsintaꞌ Arangan bungꞌ ani nan mungaꞌ, ‘Dzi anungꞌ isruꞌ i agam ma agam imingꞌ anungꞌ iba. Agam garam nanga maisan wafa manaꞌ i dzi!’ 28 Da gubuꞌ siata agam rai da agam tsanganda Abraham, Isak, da Yakop, da profet ruas santan mpruꞌa ruan mingꞌa Anutu nanggan mpada tayangꞌ gan garaman, da bitsintaꞌ agam mpada manaꞌ, da agam bungꞌ arang tsiraꞌ da agam nifu urungun bungꞌ agara gris gris. 29 Da garam mingꞌa manaꞌ i utup Yuda bungꞌ aba namingꞌ gubuꞌ yaban da gubuꞌ ruꞌan, manis dzraꞌ da fiꞌ, da bungꞌ ampai naga nam namingꞌ Anutu nanggan mpada tayangꞌ gan garaman. 30 Watsangan sib i rib fain tsanganda bida utaꞌ utaꞌ ugu bungꞌ asu miamun, da rib nidzun nidzun ugu bungꞌ asu garam bampan.”Mt 19:30; Mk 10:31

31 Da gubuꞌ aru nigi angu da rib Farisai faingꞌ iba da Yisu da ini da Arangan, “Watangin gamp arani rai da wafan, i Herot Antipas ini isa agu funub.”

32 Da Arangan ini nan mungaꞌ, “Watip wafan da wani da iyam buman igi i dzi bungꞌ adaru marapayam maisan da natip rinin gingꞌan nadaum da aruani da maiꞌ aga. Da gubuꞌ suda iruꞌ da bits da dzi bungꞌ antsup sib. 33 Da bitsintaꞌ aruani da maiꞌ da maiꞌ mangan aga da dzi rubungꞌ ayung afan i waꞌa Yerusalem, i anungꞌ isangꞌ Anutu profetan mampa gamp mangan; imaꞌ, namamp namingꞌ Yerusalem angu.

34 “O Yerusalem, Yerusalem, agu gamp aru isa profet ruas funub da tapuda tuas aru tanginda bada da agu ugu funub i tauf! Gubuꞌ ampi bingan da dzi ni ufuma u narum rusam mpruꞌa bida tatariꞌ rinan singuba narun rusan ruꞌa inutan da bitsintaꞌ agam ibugin. 35 Da aruani da watsangan, agam gampam imingꞌ da agam. Dzi nani da agam, agam wasangꞌ tipa tsanganda dzi, nasangꞌ agam nidan, ‘Anutu ifinti aru badan suda Nifutsarif maran ani.’ ”