1 Da gubuꞌ Yisu tanginda Ungar Mararam ntiangꞌ gan rai da waꞌan, da garaman atsungꞌa gin mangan ini da Arangan, “Kidungwaga tsiraꞌ, watsanga tauf tsiraꞌ tsiraꞌ rima ungar aga gin da ungar bini bini aga!”

2 Da Yisu ini nan mungaꞌ ibiani, “U tsanga ungar tsiraꞌ tsiraꞌ igi? Garam ipiap wasangꞌ i gantsida tauf mangan rumingꞌa ragun i mangan u. Bungꞌ agruꞌ tauf santan igi da natataratin.”

3 Da Yisu fa mpada mamai Oliv marafain gan raraba Ungar Mararam fadan, da Petrus, Dzems, Yowanis da Andru angu irut Arangan impai da igutin ini binaꞌ, 4 “Wani da agai, nam igi bungꞌ awaꞌ da gubuꞌ idzuwai? Da nam idzuwai bungꞌ awaꞌ nasu miamun i santingꞌa bida nan U nidan igi isu uts i suda nidzun?”

5 Da Yisu ini da ribarangan ibiani, “Watsanga sib i mangan anungꞌ iyuꞌa agam u. 6 Garam ampi bingan bungꞌ aba i dzi binganggangꞌ da nafaringꞌ runggan nabi, ‘Dzi Kristus, Garam Anutu Ragadan ugu ani,’ da bungꞌ aiyuꞌ rib ampi bingan. 7 Da gubuꞌ agam ringanta i sisingꞌ i nam isa ruan waꞌan ma nan manis angu i nam isa ruan nanga i waꞌa intap fain aga, da anungꞌ runta fafun gin da ratan u. Nam santan igi nawaꞌ, da bitsintaꞌ anungꞌ gubuꞌ buntun arigi u; bungꞌ amus badan. 8 Utup intap mangan bungꞌ auriꞌ da nais utup intap mangan, da king mangan garaman bungꞌ auriꞌ da nais king mangan garaman. Tufuringꞌ bungꞌ awaꞌ namingꞌ gamp fain da nam mangits nabinigi. Da nam santan igi bungꞌ awaꞌ nabi tsakia miamun sagat udan da gubuꞌ nanga i apingꞌan.

9 “Watsanga runggam sib i rib fain bungꞌ ampung agam nafan da garam Yuda utupan nan tipan mpada mingꞌa gamp gamp da naripi agam namingꞌ ungar mpruꞌa ruan gin mingꞌa gamp gamp. Da agam bungꞌ amunti kiap tsiraꞌ da king ruas maranggan i nida dzi wasi, i wain, agam yatsungꞌ dzi. 10 Da dzi ribangꞌ atsungꞌa i dzi nafis i sisingꞌ bini da garam utup intap da intap sib angu mungꞌ raiyi. 11 Da gubuꞌ mpunga agam da uda agam fada i rarudan, da anungꞌ ratan da maram fura nan yusan i nan idzuwai agam bungꞌ ani. Wani nan idzuwai waꞌa agam nifunggam, i anungꞌ agam runggam bungꞌ ani nan igi u; imaꞌ, Marapayam Mararam bungꞌ ani.

12 “Da gubuꞌ aru nigi da rain bungꞌ arim rain nafa garam ipiap banginggan i isa funub, da raman bungꞌ anang nabinigi i narun. Da narun ruas wasangꞌ i atangꞌa warangꞌ i raman da rinan u; imaꞌ, bungꞌ asu ufuai rutin da nani da garam i isa funub. 13 Garam santan bungꞌ abugin agam, i wain, agam iyu dzi binganggangꞌ. Da bitsintaꞌ rib muntida babampaf nidzun i nam muarutsan sangꞌa i gubuꞌ buntun gan, da Anutu bungꞌ arim sib, da bungꞌ awaꞌ da nam mpada ratar ntingan.

14 Da Yisu ini, “ ‘Nam maisan aru nanga Ungar Mararam bubumpuadan da garam tirida rai ugu’Dan 9:27; 11:31; 12:11; Mt 24:15 bungꞌ amunti mumai aru nan faidagin paꞌa arangan gin ugu. (Da garam farisa nan ani nadzidziwan gin.) Gubuꞌ agam tsangandan, da rib aru mpada Yudia narunt sib nayab mamai. 15 Da garam mpada ungar gudzun wagungꞌ*garam mpada ungar gudzun wagungꞌ — Garam Israil ungar gudzunggan itangaf ruan angu da itip mumai mpada gin imingꞌ ungar gudzun wagungꞌ. Da garam inang da iyab impruꞌ maran gin da nam nufan. anungꞌ tipa atangꞌa gan ungaran i ntsungꞌa nam bunumpan u. 16 Da manga mpada gum wasaꞌ anungꞌ tipa fadan i uda gan ngarukui gan guntiꞌ u. 17 Da gubuꞌ arigi da sagat wangundan da sagat rima sisun da narun natsauꞌ i ruan! 18 Waugin i nam bida nigi anungꞌ waꞌan da gubuꞌ rangarang tsiraꞌ u. 19 I waꞌa gubuꞌ aru nigi da barabin tsiraꞌ bungꞌ awaꞌ nayus barabin santan waꞌa mingꞌa gubuꞌ Anutu tanginda nam santan ugu da bawaꞌan da aruani, da wasangꞌ i tipa waꞌan da bampan aga u. 20 Da bida Anutu damami safa gubuꞌ igi, da garam gar santan madarim runggan rai. Da bitsintaꞌ iruꞌ i gan garaman runggan piriangꞌan da Arangan isaf gubuꞌ igi.

21 “Waꞌa gubuꞌ arigi da bida garam fain nidan da agam bida ani, ‘Watsangan, Kristus, Garam Anutu Ragadan ugu ani!’ ma ‘Watsangan, arangan naga!’ da agam anungꞌ muarutsan u. 22 Kristus umpur da profet umpur bungꞌ awaꞌ da nanang nam maran mangan santingꞌa nampang i iyuꞌa garam Anutu runggan piriangꞌan, bida ribarangan sangꞌa i iyuꞌan. 23 Ibinigi da wampa tayangꞌ runggam! Aruani da dzi ni nan santan igi mungꞌ da agam.

24 “Da bitsintaꞌ waꞌa gubuꞌ tuasaru atsungꞌa barabin tsiraꞌ igi,

26 “Da gubuꞌ arigi da garam intap bungꞌ atsanga Garam Narunggan mingꞌa maranguntung wasaꞌ ruta nampang da puatsadan tsiraꞌ badan.Dan 7:13; Mt 24:30; 26:64; Mk 14:62; Lk 21:27 27 Da Arangan bungꞌ atangin angira gan da nantsungꞌ i gan garaman piriangꞌa sib ugu namingꞌ intap da intap sib angu, namingꞌ gubuꞌ yaban nafan nasangꞌ gubuꞌ ruꞌa gin.

28 “Aruani da agam wau uwayant i gai fik nabiani, gubuꞌ agam tsanganda bangin santan puꞌa gin da marasiringa waꞌan da rima yafan, da agam isruꞌ gin ibi isu uts i gubuꞌ fus waꞌan. 29 Da bida agam tsanganda nam santan dzi nidan da agam igi bawaꞌan, da wasruꞌ gin nabi ibasu uts sib, aru muantsi nifun. 30 Dzi ni nan nidzun da agam, yangin gubuꞌ aruani fain rubungꞌ ampai nasangꞌ nam santan igi waꞌan. 31 Gunungun da intap bungꞌ antsup sib, da bitsintaꞌ dzi nanggangꞌ bungꞌ amingꞌ ratar nanting angu.

32 “Da bitsintaꞌ manga wasruꞌ i gubuꞌ da gubuꞌ maran idzuwai rururungan da Garam Narunggan bungꞌ aba. Angira Gunungun anungꞌ isruꞌ gin, da Narun anungꞌ isruꞌ gin ibinigi, da bitsintaꞌ Raman runtaꞌ angu. 33 Wadamangꞌ ruam da anungꞌ gingꞌan! I agam anungꞌ isruꞌ i nam igi gubuꞌ gan waꞌan u. 34 Gubuꞌ igi ibi garam mangan tanginda ungaran rai da fada i yunga rinimbur. Arangan irim gum da gan mamaꞌ guman igi bits bits i mpada tayangꞌ ungar igi, da irim sanab da garam mpada tayangꞌ muantsi i damangꞌa ruan da anungꞌ gingꞌan.

35 “Ibinigi da wadamangꞌ ruam da anungꞌ gingꞌan u! I agam anungꞌ isruꞌ i ungar rinunggan gubuꞌ maranggan tipa badan — naba da nam nufan, ma pas wasaꞌ, ma tatariꞌ isan, ma gubuꞌ pisa wasi. 36 Bida arangan furunguda agam da arangan anungꞌ tsanganda agam gingꞌan u. 37 Nan dzi nidan da agam ani, da dzi ni da garam santan impruꞌ ibinigi: Wadamangꞌ ruam da anungꞌ gingꞌan u!”