7
Garam Singaari Rom Gudzunggan Nanggan Muarutsan
1 Gubuꞌ Yisu fisa i nan igi da garam ringantagin sib da Arangan ifa Kapenaum. 2 Da mingꞌa gamp igi garam singaari Rom gudzunggan mangan impai, da garam guman mangan arangan maran arida gin yusan igingꞌ rinin da inang i mampan. 3 Da gubuꞌ arangan ringanta i Yisu sisingꞌ gan, da arangan itangin garam gudzun Yuda fain ifa i guta i Yisu i batipa i garam guman rininggan. 4 Gubuꞌ rib Yuda igi fawaꞌan da Yisu da ribarangan igampun ruan iyus da Arangan i rima sib, da ini, “Garam aga garam bini i u rima sib, 5 i arangan maran yari i agi utup Yuda da iraf aga ungarangꞌ mpruꞌa ruan gin.” 6 Ibinigi da Yisu irut ribarangan ifan.
Da gubuꞌ ribarangan basuda uts, da garam singaari gudzunggan igi itangin rinun rusan fain ifan da isu i nifunggan da ini da Yisu, “Nifutsarif, agu anungꞌ rima barabin da runggam i dzi nan gangꞌ. Dzi anungꞌ garam bini i u bada dzi ungarangꞌ u. 7 Nan wain aru nigi da dzi runggangꞌ anungꞌ iba i tsanganda agu u. Da bitsintaꞌ wani nan angu da dzi mamaꞌ gumangꞌ rinin nadaum. 8 I dzi ibinigi, dzi garam mpada warangꞌ i garam gudzun fain nampanggan, da dzi mpa tayangꞌ garam singaari fain. Bida dzi nidan da mangan, ‘Wafan,’ da ifan, ma ‘Waba,’ da iba. Da dzi mamaꞌ gumangꞌ ibinigi, dzi nidan, ‘Wanang wabiani,’ da inang ibi dzi nidan.”
9 Gubuꞌ Yisu ringantagin da Arangan irunt fafun gin, da iparim i ruan da ini da ampi santan atsungꞌa Arangan igi ibiani, “Dzi nani da agam, dzi anungꞌ itsanga nam muarutsan tsiraꞌ bida ani mingꞌa wasaꞌ i garam Israil santan u.” 10 Da rib aru fa nida nan da Yisu ugu itip ifawaꞌ ungar, da itsanga mamaꞌ gum rinin iwaꞌ bini sib.
Yisu Iraꞌ i Sagat Yaruf Mangan Narunggan
11 Maiꞌ mangan da Yisu ifa gamp mangan binganggan Nain, da gan riban atsungꞌa gin da ampi tsiraꞌ irut Arangan impruꞌ ruan ifan. 12 Gubuꞌ Arangan fasuda uts da muantsi nifun atangꞌa fada gamp igi, da rib ibuaringꞌ garam mampan iwaꞌ ba. Sagat yaruf mangan narunggan bitsintaꞌ arangan igi. Da ampi tsiraꞌ gamp igi irut sagat igi iba impruꞌ. 13 Gubuꞌ Nifutsarif tsanganda sagat igi da igaib arangan da ini rutin, “Anungꞌ rangan u.” 14 Ida Yisu iyung ifa rim bangin i tiriang badzab gingꞌa gin igi, da rib buaringꞌan imunti untras angu. Da Arangan ini, “Mamaꞌ rini faꞌ, dzi nani da agu, wauriꞌ wayab.” 15 Da garam mampan igi itip impai iyab da itip ini nan, da Yisu iyu arangan itip ifa da rinanggan. 16 Da ribarangan irat da nugun isantan ruan da itsarif Anutu. Da ribarangan ini, “Profet tsiraꞌ mangan iwaꞌ wasaꞌ i agi. Anutu iba i rima ampan gan sib.” 17 Yisu sisingꞌ gan raꞌa i garam igi ipuꞌ idzarang isangꞌ garam Yuda intapan santan da intap fain mingꞌa manaꞌ impruꞌ ibinigi.
Yisu da Yowanis Ruruba Garam
18 Yowanis riban atsungꞌa gin ifis i nam santan Yisu nangan igi da arangan. Ibinigi da Yowanis inuꞌ garaman atsungꞌa gin iruꞌrun ba 19 da itangin ifa i guta i Nifutsarif bida ani, “Mani agu Garam aru Anutu ragadan i badan ugu aruani, ma aga rungꞌ rima marangꞌ i garam mangan?” 20 Gubuꞌ garam igi fawaꞌan da Yisu da ribarangan ini, “Yowanis Ruruba Garam itangin agai iba i guta i agu bida ani, ‘Mani agu Garam aru Anutu ragadan i badan ugu aruani, ma aga rungꞌ rima marangꞌ i garam mangan?’ ”
21 Da gubuꞌ arigi rururungan da Yisu itip garam rinin gingꞌan mara maran ampi bingan, da rib marapayam maisan yantsangan, da maran gampaman iwaꞌ bini. 22 Ibinigi da Arangan itip ini nan mungaꞌ da garam uda sisingꞌ igi ibiani, “Agam watip wafan da wani wasi da Yowanis i nam idzuwai santan agam tsangandan da ringantagin. Maran gampaman itip itsanga nam ratar, da ngump bigruꞌan itip iyung bini, da rib diginting tirida gin iwaꞌ bini, da ringan putidan iringant i nan, da mampan imunti marataꞌ, da garam sauda runggan iringant i Sisingꞌ Bini. 23 Da garam idzuwai uwayantan mamida suda iruꞌrun i dzi, nugun natsiaꞌ.”
24 Gubuꞌ Yowanis garam sisingꞌ gan fada sib da Yisu ifis i Yowanis nan gan da garam utup tsiraꞌ igi ibiani, “Agam ibufa nam manaꞌ dadauntan i tsanganda nam idzuwai? Agam ifa i tsanganda garam mamida muntida babampafan bida sai yafan manis isa gin da fada badan? Imaꞌ. 25 Da agam ifa i tsanganda nam idzuwai igi, garam atsufa nam fafusan griꞌgriꞌan bini? Imaꞌ. Rib atsufa nam mara kakar bini da mpada bini angu impa king ruas ungaran. 26 Da bitsintaꞌ agam ifa i tsanganda nam idzuwai? Profet mangan? Hai, dzi nani da agam, Yowanis iyus profet ruas santan. 27 I nan kakaran mungꞌ ugu intuang nan i arangan ibiani,
‘Dzi bungꞌ atangin garamangꞌ rima sisingꞌ namungꞌ i agu
i tipa sanab mungꞌ i agu.’Mal 3:1; Mt 11:10; Mk 1:2
28 Dzi nani da agam, garam santan sagat apingꞌa mingꞌa intap gan mangan wayus Yowanis u. Da bitsintaꞌ garam utaꞌ bingan maꞌan mangan mingꞌa wasaꞌ i Anutu nanggan mpada tayangꞌ gan garaman iyus Yowanis. 29 Gubuꞌ garam uda takis da garam santan ringanta i Yowanis nan gan fisa gin ugu da iyu mpui ruruban imingꞌ Yowanis banginggan da nigi isantingꞌ ibi imuaruts Anutu uwayantan igi irururung. 30 Da bitsintaꞌ garam Farisai da garam gudzupuꞌ i nan faidagin ibugin i atangꞌa warangꞌ i Anutu nan gan rantsa sib i ribarangan, da anungꞌ iyu mpui ruruban imingꞌ Yowanis banginggan. 31 Da yangin gubuꞌ aruani iwaꞌ ibianungꞌ? Ma dzi nabu ram ribarangan da nam idzuwai? 32 Ribarangan isangꞌ mamaꞌ narun narun mpruꞌa maran maket wasaꞌ da nuꞌa fada badan da nuꞌa bida ani,
‘Aga rab simpup da agam wangump u,
da aga is mint badzab da agam warang u.’
33 I sanab bida nigi da Yowanis Ruruba Garam iba da anungꞌ iga bret da inum wain gurun u, ida agam ini marapayam maisan yantsanga arangan. 34 Da Garam Narunggan iba da igan da inum da agam itsangan da ini, ‘Garam gada nam da numa wain yusan igi, da nigi garam uda takis da garam asub rinunggan igi i.’ 35 Agam ini ibinigi, da bitsintaꞌ rib atsungꞌa Anutu nan gan isantingꞌ ibi Anutu mararuru gan igi nan rururungan.”Mt 26:6-13; Mk 14:3-9; Ywn 12:1-8
Sagat Adzuꞌa Yisu Fagan
36 Farisai mangan irim nan i Yisu i ruta gada nam; ibinigi da Yisu ifa Farisai igi ungaran da igingꞌ iruꞌ i bangin yas i gada nam yatsungꞌ ribigi sanaban. 37 Da sagat asub mangan impa gamp igi. Da gubuꞌ arangan ringanta i Yisu gada nam mingꞌa garam Farisai igi ungaran, da arangan iyu gur bini madamin gaunt bini yusan. 38 Da arangan ifa munti uts Yisu fagan, da irang da maragurun itsururuꞌ iruꞌ i Yisu fagan. Da yidzaꞌ fagan iruꞌ da itias i gudzu yafan gan da itsutsuf i fagan da iyats madamin iyab in. 39 Da Farisai aru rima nan i Yisu ugu gubuꞌ tsanganda nam sagat nangan igi da ini i unggan, “Bida garam ani profet nidzun da madasruꞌ i sagat idzuwai aru gifa arangan ani, i arangan sagat asub.”
40 Da Yisu ini da garam Farisai igi, “Saimon, dzi ni nida nan mangan da agu.”
Da Saimon ini, “Kidungwaga tsiraꞌ, wani.”
41 Da Yisu ini, “Garam iruꞌ iyu nam ntsuman imingꞌ garam nam bunump manga gin. Manga yu 500 da manga yu 50. 42 Da rib iruꞌ igi moni gan imaꞌ i tipa rima nam ntsuman igi mungaꞌ gan. Ibinigi da garam igi isiat nam ntsuman rib iruꞌ igi udan rai. Da rib iruꞌ igi mangan maran bungꞌ ari i arangan nayus?”
43 Da Saimon ini, “Dzi marangꞌ ifur i garam uda nam ntsuman tsiraꞌ bingan da garam nam bunump siata rai.”
Da Yisu ini, “U ni nan rururungan.”
44 Da Yisu yitam i ruan ifan da sagat igi da ini da Saimon, “Amaꞌ, u tsanga sagat aruani? Dzi yatangꞌ ba ungaram da u anungꞌ irim mpui i dzi adzuꞌa fagangꞌ gin u. Da bitsintaꞌ arangan yadzuꞌ dzi fagangꞌ i maragurun gan, da itias i gan gudzu yafan gan. 45 Da agu anungꞌ itsutsuf dzi u, da bitsintaꞌ gubuꞌ dzi atangꞌa ba ungar da sagat aruani itsutsuf dzi fagangꞌ gubuꞌ guntiꞌ bingan. 46 Da agu anungꞌ irim madamin i dzi gudzungꞌ u, da bitsintaꞌ arangan iyats madamin gaunt bini i dzi fagangꞌ. 47 Ibinigi da dzi nani da agu, dzi tias arangan nanggan maisan ampi bingan ugu rai, ibinigi da arangan isantingꞌ nam maran aridan tsiraꞌ bingan. Da bitsintaꞌ garam nanggan maisan isiꞌ angu da gubuꞌ tiasan, da isantingꞌ nam maran aridan isiꞌ angu.” 48 Da Yisu ini da sagat, “Dzi siat u nanggam maisan rai sib wa.”
49 Da ampi fain mpada mpruꞌan igi ini nan ifa iba da runggan ibiani, “Garam aruani nam idzuwai i tiasa nam maisan rai?”
50 Da Yisu ini da sagat, “U nanggam muarutsan irim agu sib. Wafan ruta nan nufan.”