1 Da gubuꞌ mangan da Yisu itip ifis i nan imingꞌ mpui fuꞌ Galili ringan. Da garam ampi bingan iba sisungꞌ Arangan. Ibinigi da Arangan iyab ifampa madzung mangan rungꞌ muntida mpui wasaꞌ da garam santan impa magamangꞌ mpui fuꞌ ringan. 2 Da Yisu ifis i nan ampi bingan angu i nan raman, da ini, 3 “Waringantin! Garam mangan ifa guman i tirida nam yamun. 4 Gubuꞌ tirida nam yamun nidzun igi, da fain iruaꞌ iruꞌ sanab, da apu dzuf iruꞌ da iga sib. 5 Da fain iruaꞌ iruꞌ intap tauf mingꞌa warangꞌ gin, da nam yamun intap sung angu i intap bini pas angu imingꞌ ragun i tauf igi. 6 Da bitsintaꞌ gubuꞌ iyab da igara da imaringꞌ, i igatan anungꞌ iruꞌ warangꞌ bingan u. 7 Da fain iruaꞌ yatangꞌ gantsuats maradantang wasaꞌ. Da iyab impruꞌ da gantsuats igi, da gantsuats iyari ruan ragun gin da anungꞌ ikap nidzun u. 8 Da nam yamun igi fain iruaꞌ iruꞌ intap bini. Da iyab bini da ikap nidzun ampi bingan. Da fain ikap isangꞌ farangꞌa bek 30, da fain isangꞌ 60, da fain ikap isangꞌ farangꞌa bek 100, i bek bitsintaꞌ bitsintaꞌ aru tiridan ugu.”

9 Da Yisu ini impruꞌ, “Rib ringa bampun mingꞌan, da narim ringan i nan igi bini.”Mt 11:15; 13:9,43; Mk 4:23; 7:16; Lk 8:8; 14:35

10 Gubuꞌ ampi tsiraꞌ igi dzarangan, da Yisu riban 12 ugu impruꞌ da rib fain atsungꞌa Arangan igut i Yisu i nan raman igi wainggan. 11 Da Arangan ini da ribarangan, “Dzi dziwar i nan maradzigin iyab i Anutu nanggan mpada tayangꞌ gan garaman wasi da agam. Da bitsintaꞌ, dzi bungꞌ ani nan i nan raman angu da ampan fain aga, 12 i

13 Da Yisu ini da ribarangan ibiani, “Agam mamida i sruꞌa i nan raman ani wainggan, da agam busruꞌa i nan raman fain aga bida anungꞌ? 14 Garam tirida nam yamun isangꞌ garam fisa i Anutu nanggan. 15 Garam fain iringant i Anutu nanggan da Sadang sung angu iba da yuntap i nan igi sinungꞌ i wangunggan. Nigi isangꞌ nam yamun ruaꞌa sanab. 16 Da garam fain isangꞌ intap tauf tauf. Iringant i Anutu nanggan da iyu iyab ruta nugun tsiaꞌan sung angu, 17 da bitsintaꞌ imuaruts pas angu, i wain, igatan imaꞌ. Da gubuꞌ barabin waꞌan ma rib fain rima ipiap i ribarangan yaba i Anutu nanggan, da sung angu itiri nanggan muarutsan rai. 18 Fain isangꞌ nam yamun ruaꞌa atangꞌa gantsuats maradantang wasaꞌ. Iringant i Anutu nanggan, 19 da bitsintaꞌ maran ifur nam intap ani iyus, da uwayant ufuma nam bunump tsiraꞌ iyuꞌ ribarangan, da wangun ipipifa i uda nam ampi bingan intap ani. Ibinigi da uwayant sib angu igi anungꞌ irim wasaꞌ i nan igi da anungꞌ ikap nidzun u. 20 Da fain isangꞌ nam yamun tirida ruꞌa intap bini. Iringant i Anutu nanggan da yu iyab da ikap nidzun iyus. Fain ikap isangꞌ farangꞌa bek 30, da fain 60, da fain 100.”

21 Da Yisu ini da ribarangan, “Isangꞌ i agam taufa gur ragun i rampi ma rima ruꞌa tiriang gingꞌa gin warangꞌ? Imaꞌ! Agam yantungꞌ iyab wagungꞌ.Mt 5:15; Lk 8:16; 11:33 22 I sanab bida nigi da nam santan dziginda ruan da bungꞌ awaꞌ dzidziwan, da nam santan mingꞌa marapatiꞌ bungꞌ akupis ruan wasi da rib santan bungꞌ asruꞌ gin. 23 Bida manga ringa bampun mingꞌan, da narim ringan i nan igi bini.”Mt 11:15; 13:9,43; Mk 4:9; 7:16; Lk 8:8; 14:35

24 Da Yisu ini da ribarangan, “Nan agam ringanta gin da maram wafur bini angu. Sanab agam atsungꞌa gin i nangan da rib fain, da agam bungꞌ ayu i mungaꞌ gan i sanab bida arigi angu,*Sanab agam atsungꞌa gin i nangan da rib fain, da agam bungꞌ ayu i mungaꞌ gan i sanab bida arigi angu — Rib Yuda inang da ini nan ani ibi nam rima uwayant. Da garam mararuru ampi bingan maran ifur ibi Yisu ini nan ani i santingꞌa uwayant bida ani: Bida garam mangan ringanta i Yisu nanggan da atsungꞌa gin bini da Anutu bungꞌ autus i uwayantan i sruꞌa i nan igi wainggan. da agam bungꞌ ayu nam ampi bingan ragun gin.Mt 7:2; Lk 6:38 25 I garam uda nan ruꞌa wangunggan da Anutu rubungꞌ asinga, da garam mamida uda nan igi da uwayant isiꞌ pas aru arangan uda sib ugu da bungꞌ ayu sinungꞌ arangan.”Mt 13:12; 25:29; Lk 8:18; 19:26

26 Da Yisu ini, “Anutu nanggan mpada tayangꞌ gan garaman ibi garam tirida nam yamun i gan guman. 27 Idziang sib angu da igingꞌ da tataꞌ sib angu da yuriꞌ, da nam yamun igi intap isu tsiraꞌ, da arangan itungꞌ maran i nam igi iyab ibianungꞌ. 28 Intap runggan inang da nam yamun igi ikap nidzun. Iyab irim fagawain, ida maraburuab, ida nidzun isu tsiraꞌ wasaꞌ i maraburuab. 29 Gubuꞌ nam nidzun igi dzuban da sung angu garam arangan bungꞌ asaf, i wain, gubuꞌ igi gubuꞌ yunga nam gadan igi.”

30 Da Yisu ini, “Dzi santingꞌa agam i Anutu nanggan mpada tayangꞌ gan garaman bida anungꞌ? Nan raman idzuwai da dzi nani i dzi dzuwara gin da agam? 31 Anutu nanggan mpada tayangꞌ gan garaman isangꞌ gai yamun nidzun isiꞌ aru mangan angu yusa gai yamun nidzun santan garam ntanga ruꞌa intap†gai yamun nidzun isiꞌ aru mangan angu yusa gai yamun nidzun santan garam ntanga ruꞌa intap — Gai nidzun igi binganggan “mastet.” Rib Yuda inang da intang, da gai nidzun isiꞌ igi iyingꞌ isu tsiraꞌ ibi 3 mita. Da rib Yuda inang da ini nan rima uwayant iyab i gai nidzun isiꞌ arigi.. 32 Da bitsintaꞌ gubuꞌ garam ntanga sib da iyab isu tsiraꞌ iyus nam santan mingꞌa gum wasaꞌ. Irim bangin tsiraꞌ tsiraꞌ da apu dzuf isangꞌ i rima gingitin da mpada yaung gin.”

33 Yisu iragi nan da ribarangan i nan raman ampi bingan sangꞌa ruan isangꞌ i ribarangan uwayantan waꞌa gin. 34 Arangan iragi nan i nan raman angu, da bitsintaꞌ bida ruta riban atsungꞌa gin angu mpadan da iragi nan santan wasi da ribarangan.

35 Gubuꞌ inang i ruꞌan da nam nufan arigi da Yisu ini da riban atsungꞌa gin, “Ariꞌ, agi nais mpui fuꞌ ani udziꞌ nafa marafain aga.” 36 Arangan da riban itangin ampan santan igi rai da yu madzung Yisu rumpada gin igi da ifan. Madzung fain irut ribarangan. 37 Pas angu da fifingꞌ tsiraꞌ irunt impruꞌ da iyamiyam tsiraꞌ, mpui yatsu ruan iruꞌ madzung, da madzung inang i buaruma ruan. 38 Da Yisu yis gudzun i unub da igingꞌ marampruꞌ imingꞌ madzung bampan. Da riban ifa is Arangan marataꞌ da ini, “Kidungwaga, agi bungꞌ amamp! Nigi nam utaꞌ i u maranggam, ma?”

39 Da Yisu yuriꞌ iyab da impiꞌ manis da iyamiyam da ini, “Wantsup! Wantung!” Da manis da iyamiyam intung.

40 Da Yisu ini da riban atsungꞌa gin, “Agam irat i wai? Agam ruwamuaruts u?”

41 Da gan riban atsungꞌa gin igi irat funub da igut i ruan. “Garam idzuwai aruani? Manis da iyamiyam iringant i arangan nanggan!”