1 Yisu da gan riban atsungꞌa gin rungꞌ irunt i madzung igi imingꞌ mpui fuꞌ Galili igi ifa marafain da ifawaꞌ garam Gerasa intapan. 2 Da Arangan ruꞌa sinungꞌ madzung igi, da garam mangan ruta marapayam maisan bubumpuadan imingꞌ gamp rima garam badzabin iba i waꞌa da Yisu. 3 Garam igi isu gampan imingꞌ gamp rima garam badzabin. Da mangan wasangꞌ i dzura arangan, ma dzura i tsen u. 4 I gubuꞌ ampi bingan da garam idzur arangan bangin da fagan i tsen, da arangan intap tsen da yidzaꞌ ain mingꞌa arangan fagan. Da manga riniurunggan wasangꞌ i mpunga arangan. 5 Isangꞌ idziang da gubuꞌ, arangan impa imingꞌ gamp badzab da mamai da iyaiꞌ nifun tsiraꞌ da isaf runggan i tauf bararangꞌ.

6 Arangan tsanganda Yisu mingꞌa ruguntiꞌ badan, da arangan irunt ifa yidzaꞌ fagan da itatapuangꞌ iruꞌ Yisu fagan. 7 Arangan iyaiꞌ nifun tsiraꞌ da ini, “Yisu, Anutu Mpada Wagungꞌ Narunggan, U buni mantuda i dzi? Dzi gaib runggangꞌ da Agu i Anutu binganggan i anungꞌ rima tsakia da dzi u!” 8 I Yisu ini da marapayam maisan mungꞌ ibiani, “Marapayam bubumpuadan, wawaꞌ sinungꞌ arangan!”

9 Ida Yisu igut i arangan, “U binganggam wai?”

Da marapayam maisan ini, “Dzi binganggangꞌ Ampi Bingan, i aga yus angu.” 10 Ida marapayam maisan igi igampun ruan iyus da Yisu i anungꞌ wata ribarangan rai waꞌa manaꞌ sinungꞌ intap igi u.

11 Da ifab utup tsiraꞌ bingan rumunti iga nam imingꞌ mamai isiꞌ mangan mingꞌa uts. 12 Da marapayam maisan iyaiꞌ ruan da Yisu da ini, “Wawat agai nafa da ifab utup tsiraꞌ aga, da aga nafa atangꞌ gin.” 13 Yisu ini nifun da marapayam bubumpuadan igi iwaꞌ sinungꞌ garam igi da ifa atangꞌ i ifab utup tsiraꞌ igi, da ifab santan irunt mamai igi iruꞌ ifa mpui fuꞌ da inum mpui isuf da imamp sib. Ifab utup tsiraꞌ igi gudzunggan isangꞌ ibi 2000.

14 Da garam mpada tayangꞌ ifab igi irunt ifan da irim sisingꞌ da rib mpada gamp tsiraꞌ da gamp isiꞌ fain mingꞌa manaꞌ. Ringanta gin da ampan igi runggan iba i tsanganda nam idzuwai waꞌan igi i maranggan. 15 Da waꞌa da Yisu da itsangan garam marapayam maisan ampi bingan yantsangan ugu rumpadan da atsufa ngarukui da uwayantan tipa waꞌa bini, da iratin. 16 Da garam tsangandan nam Yisu nangan yaba i garam marapayam maisan yantsangan mpruꞌa da ifab utup tsiraꞌ ugu ifis i nan igi da ampan santan. 17 Da ampan gamp igi igampun runggan da Yisu i tanginda intap igi rai da fada gan arun.

18 Da Yisu yaba fada madzung da garam aru marapayam maisan yantsangan ugu igaib runggan da Yisu i ruta Arangan fadan. 19 Da Yisu wataga ruan i ruta Arangan fadan u, da iwat da ini binaꞌ, “Wafa gampam da gam utupam da wafis i nam tsiraꞌ Nifutsarif gaiba agu da nangan da agu igi.” 20 Ibinigi da arangan ifa gan arun da ifis i nan imingꞌ intap Dekapolis*Dekapolis — Bingan Dekapolis wainggan ibi ‘Gamp 10’ da garam Grik impa imingꞌ gamp 10 igi. Ibinigi da impa tayangꞌ ifab. Da bitsintaꞌ rib Yuda anungꞌ isangꞌ i mpada tayangꞌ ifab igi, i Anutu nanggan faidagin ini apu igi ibubumpua i maranggan. i nam tsiraꞌ Yisu nanga yaba i arangan igi. Da garam santan irunt fafun da itsauꞌ gin.

21 Da gubuꞌ Yisu tipa isa mpui fuꞌan udziꞌ i madzung fada marafain sib, da ampan utup tsiraꞌ iba munti iwafiꞌ Arangan imingꞌ mpui fuꞌan ringan. 22 Da garam mangan mpada tayangꞌ ungar mpruꞌa ruan gin, binganggan Dzairus, iba nigi. Da gubuꞌ tsanganda Yisu da itatapuangꞌ iruꞌ Arangan fagan 23 da igaib runggan nidzun da Arangan da ini, “Dzi narunggangꞌ finam isiꞌ isu uts i mampan. Waba da warim bangim ragun i arangan da rinin nadaum da nampa bini.” 24 Ibinigi da Yisu irut arangan ifan.

Garam ampi bingan yatsungꞌ da isirus rinin i Arangan. 25 Da sagat mangan biꞌ arida ratar in sangꞌa udzuf 12 iyung impruꞌ ibinigi. 26 Arangan iyu tsakia tsiraꞌ i dudaꞌ ampi bingan banginggan da itapu nam bunumpan santan ararai i rima runggan sib, da bitsintaꞌ dudaꞌ mangan anungꞌ irim arangan sib u, da nam rinin igi isu tsiraꞌ. 27 Da arangan ringanta i nam maran mangan Yisu nangan igi da idziri wasaꞌ i ampi santan imingꞌ Yisu barun ba da yamus Arangan ngarukui gan, 28 i arangan maran ifur ibiani, “Bida dzi amusa Arangan ngarukui gan da dzi bungꞌ adaum.” 29 Sung angu da biꞌ intap ruan da irabub i tsakia mingꞌa arangan rininggan tanginda arangan rai.

30 Da Yisu sung angu isruꞌ i nampang iwaꞌ sinungꞌ imingꞌ Arangan gin da yitam i ruan wasaꞌ i ampan santan da igutin, “Manga ani yamus dzi ngarukui gangꞌ?”

31 Da garaman atsungꞌa gin ini rutin, “U tsanga ampi santan sirusa rinin i Agu da U bugutin, ‘Manga amus dzi?’ ”

32 Da bitsintaꞌ Yisu rutaningꞌ isau i tsanganda manga amus Arangan. 33 Da sagat arangan sruꞌa i nam idzuwai waꞌan da arangan iba tatapuangꞌ iruꞌ Yisu fagan, irat da iratarat da ifis i nanggan santan wasi da Yisu. 34 Da Yisu ini da sagat arangan, “Narungꞌ, u nanggam muarutsan inang agu iwaꞌ bini. Wafa ruta nan nufan da wampa bini angu.”

35 Yisu rungꞌ nida nan da sagat igi da garam fain imingꞌ Dzairus ungaran iba da ini, “U narunggam finam ugu imamp sib wa. Da anungꞌ rungꞌ rima barabin da kidungwaga u.”

36 Yisu iringantin angu da ini da Dzairus, “Anungꞌ ratan u; wamuaruts angu.” 37 Arangan ipaꞌ nan i santan da yu Petrus, Dzems, da Dzems rainggan Yowanis angu i atsungꞌa gin. 38 Tuasarangan bawaꞌa garam mpada tayangꞌ ungar mpruꞌa ruan gin igi ungaran, da Yisu iringant i nam rangan da singisiang da nam yaiꞌan tsiraꞌ. 39 Arangan yatangꞌ ifan da ini da ribarangan, “Ibianungꞌ da agam irang da agam iyaiꞌ tsiraꞌ bingan? Mamaꞌ narun igi anungꞌ imamp u; igingꞌ marampruꞌ angu.” 40 Da bitsintaꞌ ampan igi irubungꞌ Arangan.

Da Arangan iwat rib santan igi iwaꞌ manaꞌ da yu mamaꞌ igi ramanggan da rinanggan da gan riban iruꞌ da bits ruta Arangan yatangꞌ ifa mamaꞌ narun igi gan gingꞌa gin. 41 Igif mamaꞌ narun igi bangin da ini, “Talita kum!” (wainggan ibi ‘Mamaꞌ finam, dzi ni da agu, wauriꞌ!’). 42 Da sung angu da mamaꞌ finam igi yuriꞌ imunti da iyung, i arangan udzufan 12. Da rib ruta Arangan irunt fafun tsiraꞌ bingan. 43 Da Yisu ini nan babampaf i ribigi anungꞌ nida nan igi wasi da rib fain u. Da ini da ribarangan i rima nam gadan da mamaꞌ finam igi.