1 Mingꞌa gubuꞌ arigi da garam Yuda atsungꞌa i Yisu gudzunggan iyingꞌ isu ampi bingan. Da garam Yuda mingꞌa intap fain badan da nida nifu nan Grik ugu ini nan pusupusan da garam Yuda mpada gamp wain Israil da nida nifu nan Hibru,*nifu nan Hibru — ma nifu nan Arameik: Gubuꞌ arigi da nifu nan Arameik isu garam Yuda nifu nan gan. Ibinigi da garam fain irim bingan Hibru gin. i wain ibi rib faba nam gadan da sagat yaruf maiꞌ maiꞌ anungꞌ irim nam da sagat yaruf tuasaru nida nifu nan Grik ugu u. 2 Da aposel ruas 12 igi nuꞌ Yisu riban atsungꞌa gin santan igi da iwaꞌ impruꞌ da ini, “Anungꞌ sanab rururungan i aga tanginda gaꞌ gumangꞌ fisa i Anutu nanggan da faba nam gadan da ampan u. 3 Ibinigi da, raingꞌ ruas, wataga garam 7 mingꞌa wasaꞌ i agam ruta bingan bini da fungꞌa i Marapayam Mararam da mararuru. Da aga bungꞌ arim ribarangan i mungꞌa i gum ani. 4 Da bitsintaꞌ aga bungꞌ arim runggangꞌ santan i udagin da fisa i Anutu nanggan.”

5 Da uwayant igi irim nugu nufan da rib santan, da itaga Stiven, arangan ifungꞌ i Marapayam Mararam da nanggan muarutsan ibabampaf. Da itaga Filip, Prokorus, Nikanor, Timon, Parmenas da Nikolas. Nikolas igi da garam Antiok, da aranga anungꞌ garam Yuda igi u; da bitsintaꞌ arangan yatsung i rib Yuda igi sanaban pumuꞌa Anutu. 6 Da ampan iyu garam 7 igi iwaꞌ ba aposel ruas maran. Da aposel ruas irim bangin ragun gin da iyugin i ribarangan da itaga ribarangan i nanga gum igi.

7 Da Anutu nanggan iwaꞌ ifan da isu tsiraꞌ. Da rib muarutsan faꞌ faꞌ mingꞌa Yerusalem igi iyingꞌ isu ampi bingan, da garam pumuꞌa Anutu wain ruas igi ampi bingan yatangꞌ warangꞌ i Anutu nanggan da imuaruts Yisu.

8 Stiven ifungꞌ i Anutu maraampi gan da nampanggan, da arangan inang nam maran mangan tsiraꞌ tsiraꞌ ampi bingan, da isantingꞌ Anutu nampanggan wasaꞌ i ampan igi. 9 Da bitsintaꞌ garam Yuda fain yuriꞌ da irut Stiven ini nan mara dampan i ruan. Da rib fain igi iba imingꞌ gamp Sairini da Aleksandria da inang da impruꞌ ruan imingꞌ utup Yuda ungaran mpruꞌa ruan gin faringꞌa bida Mamaꞌ Gum Utaꞌ Waꞌa Sinungꞌ Garam Gudzunggan. Da fain iba imingꞌ provins Silisia da Esia. 10 Da bitsintaꞌ ribarangan gan mangan anungꞌ isangꞌ i muntida mungꞌ i mararuru da nan Marapayam nida waꞌa Stiven nifunggan u.

11 Ibinigi da ribarangan yuntap i garam fain i nida nan umpur bida ani, “Aga ringant i Stiven ini nan asub i Moses da Anutu.” 12 I uwayant bida nigi da ribarangan iraꞌ i ampan da garam gudzun ruas da garam gudzupuꞌ i nan faidagin wangun ibinigi. Da ribarangan ifa mpung Stiven da iyu ifan da garam Yuda gudzun rusan utupan nan tipan faringꞌa bida Sanhidrin gin. 13 Da iyu rib fain i nida nan umpur wasi yaba i arangan bida ani, “Gubuꞌ santan da garam arigi nang da ini nan asub i Anutu Ungaran Mararam ani impruꞌ da nan faidagin Anutu riman da Moses ugu. 14 Da aga ringantin i arangan ini ibi Yisu, garam Nasaret ugu, bungꞌ awaya Ungar Mararam ani da bungꞌ asiat agi tafangꞌ rusangꞌ sanaban Moses rima rutin da ruꞌa ba da agi ugu da nani da agi i atsungꞌa sanab faꞌ.”

15 Da rib santan mpada wasaꞌ i utup nan tipan igi intrung maran babampaf i Stiven da itsanga arangan maran ibi angira maran.