1 “Raingꞌ ruas da ramangꞌ ruas, agam waringantin! Dzi nang i nida nan agam dzura dzi gin ugu mungaꞌ gan.”

2 Gubuꞌ ribigi ringanta i arangan nida nan i nifu nan Hibru*nifu nan Hibru — ma nifu nan Arameik: Watsanga nan mingꞌa gudzun 21, ampap 40. da ribarangan impa frap nufan.

Da Paulus ini, 3 “Dzi garam Yuda, da dzi rinanggangꞌ yapingꞌ dzi imingꞌ gamp Tarsus mingꞌa provins Silisia, da bitsintaꞌ dzi yingꞌ isu tsiraꞌ imingꞌ gamp tsiraꞌ Yerusalem ani. Gamaliel yutus i dzi uwayantangꞌ bini angu i agi tafangꞌ rusangꞌ nanggan faidagin rururungan. Da dzi rim runggangꞌ santan i atsungꞌa Anutu sanaban isangꞌ ibi agam inang da aruani. 4 Dzi yis rib atsungꞌa Yisu Sanaban ani,Ap 9:2; 19:23 da dzi mpung garam da sagat da itangin yatangꞌ karabus da ini da yis fain fufunub. 5 Da garam pumuꞌa Anutu wain gudzunggan tsiraꞌ da garam gudzun ruas utupan nan tipan santan isangꞌ i nida wasi da agam gin. Tuasarangan irim papiar fain da dzi i riman da agi ribangꞌ mpada Damaskus, da dzi fa Damaskus i mpungan da dzura rib atsungꞌa Yisu Sanaban igi da uda bada Yerusalem i uda nam igi mungaꞌ gan.

6 “Gubuꞌ ibawaꞌ wasaꞌ da dzi fa su uts da gamp Damaskus. Sung angu da nam puatsadan tsiraꞌ bingan imingꞌ gunungun iruꞌ ba ipuatsa yari dzi. 7 Dzi ruaꞌ iruꞌ intap da dzi ringant i nifun mangan ini ibiani da dzi, ‘Sol, Sol, ibubianungꞌ da u rim ipiap i dzi?’ 8 Da dzi ni ibiani, ‘Nifutsarif, agu wai igi?’ Da Arangan ini, ‘Dzi Yisu, garam Nasaret, aru u rima ipiap in igi.’ 9 Rib ruta dzi fadan igi itsanga puatsadan igi, da bitsintaꞌ anungꞌ idzidziwan i garam ruta dzi nida nan igi wanggan u.†anungꞌ idzidziwan i garam ruta dzi nida nan igi wanggan u — Nan igi wainggan mangan ibi “anungꞌ iringant i garam ruta dzi nida nan igi wanggan u.” 10 Da dzi ni ibiani, ‘Nifutsarif, dzi bunanga nam idzuwai?’ Da Nifutsarif ini da dzi, ‘Wauriꞌ da watangꞌ Damaskus. Mingꞌa nigi da garam mangan bungꞌ ani da agu i gum santan dzi ragada agu gin i u nangan.’ 11 Rib ruta dzi fadan igi igif dzi bangingꞌ da iyu dzi atangꞌ Damaskus, i wain, puatsadan igi nanggan dzadzaniangan inang dzi marangꞌ igampam ruan.

12 “Garam mangan binganggan Ananaias iba i tsanganda dzi. Arangan garam tsarifa Anutu da atsungꞌa Moses nanggan faidagin rururungan angu. Garam Yuda santan mpadan nigi ini arangan garam bini. 13 Arangan iba munti uts da dzi da ini, ‘Raingꞌ Sol, watip watsanga nam!’ Da gubuꞌ maran arigi rururungan da dzi tip itsanga nam da dzi tsanga arangan. 14 Da arangan ini, ‘Agi tafangꞌ rusangꞌ Anutu gan iraga agu mungꞌ i sruꞌa i nam Arangan maran arida gin i waꞌan, da tsanganda Garam aru Rururungan Ntingan ugu da ringanta i nan mingꞌa Aranga nifunggan. 15 U bungꞌ asu garam nida Arangan nanggan wasi da ampan santan i nam u tsangandan da ringanta gin sib. 16 Ibinigi da u rungꞌ ifangꞌ i wai? Wauriꞌ da wayu mpui ruruban, da wanuꞌ i Arangan binganggan i adzuꞌa u nanggam maisan rai.’

17 “Gubuꞌ dzi tipa fada Yerusalem da udagin mingꞌa Ungar Mararam ntiangꞌ gan wasaꞌ, da dzi tsanga nam ibi nam puafuban mangan, 18 da dzi tsanga Nifutsarif ini da dzi ibiani, ‘Wauriꞌ sung angu da watangin Yerusalem da wafan, i wain, bida u nida Dzi nanggaꞌ wasi mingꞌa nani da ribani anungꞌ isangꞌ i ringanta gin u.’ 19 Da dzi ni ibiani, ‘Nifutsarif, ribarangan isruꞌ gin sib ibi dzi fa rib Yuda ungaran mpruꞌa ruan gin santan i mpunga rib muarutsa Agu da isan da tanginda i karabus. 20 Da gubuꞌ ribarangan isa Stiven, garam aru nida U nanggam wasi ugu, funub da dzi munti uts da dzi tsangan ibi iwaꞌ bini i dzi maranggaꞌ, da dzi munti tayangꞌ ribarangan ngarukui gan guntiꞌ.’ 21 Da bitsintaꞌ Nifutsarif ini da dzi ibiani, ‘Wafan! I dzi bungꞌ awat agu nafan da garam utup fain mpada gamp guntiꞌ.’ ”

22 Da ampan tsiraꞌ igi iringant i Paulus nanggan ifa isangꞌ Paulus nida nan yaba i garam utup fain arigi da nugun iruaꞌ. Da santan iyaiꞌ nifun tsiraꞌ da ini, “Wais arangan funub! Garam bida nigi anungꞌ isangꞌ rumpada marataꞌ intap ani u!” 23 Da gubuꞌ ribarangan yaiꞌan da gruꞌa ngarukui gan guntiꞌ da tapuda ngaruntsuaf yaban, 24 da garam singaari gudzunggan ini da garaman i tanginda Paulus atangꞌa ribarangan ungaran mpada gin da nanga gum in igi wasaꞌ. Da ini da ribarangan i ripida Paulus da guta i arangan i nan fain i aranga sruꞌa i wain idzuwai da ribigi iyaiꞌ iyab i arangan. 25 Da gubuꞌ dzura arangan i ripidan, da Paulus ini da garam singaari gudzunggan mangan mpada tayangꞌ garam 100 muntida uts rutin igi ibiani, “Mabi garam Rom nanggan faidagin ini ibi agam isangꞌ i ripida garam Rom mangan mamida i muntida nan rarudan wasaꞌ da tsanganda asub in?”

26 Da gubuꞌ garam singaari gudzunggan mangan igi ringanta i nan igi, da arangan ifan da gan gudzunggan tsiraꞌ igi da igutin ini binaꞌ, “U bungꞌ anang nam idzuwai? I garam araga garam Rom aga i.”

27 Da garam singaari gudzunggan tsiraꞌ igi ifa gut i Paulus ini binaꞌ, “Wani da dzi, u garam Rom, ma?”

Da Paulus ini, “Hai, dzi garam Rom.”

28 Da garam singaari gudzunggan tsiraꞌ igi ini ibiani, “Dzi tai moni gaꞌ tsiraꞌ i suda garam Rom.”

Da Paulus ini, “Da bitsintaꞌ dzi da imaꞌ. Rinangꞌ yapingꞌ dzi ibi garam Rom.”

29 Da garam singaari ruas nanga i ripida arangan igi iringant i nan igi da sung angu itangin arangan rai. Da gubuꞌ garam singaari gudzunggan tsiraꞌ igi sruꞌa gin bida Paulus igi garam Rom, da irat, i wain, arangan ini da garam singaari ruas idzur Paulus i tsen.

30 Da garam singaari gudzunggan tsiraꞌ igi ini sruꞌa gin i rib Yuda ini Paulus ibunang asub idzuwai rururungan. Ibinigi da pisa maiꞌ da arangan itangin Paulus iwaꞌ da irim nan ifan da garam pumuꞌa Anutu wain gudzun rusan da utup nan tipan faringꞌa Sanhidrin gin santan i waꞌa mpruꞌa ruan. Da arangan iyu Paulus iba da imunti ribarangan maran.