1 Da Paulus intrung maran funub angu i utup nan tipan faringꞌa Sanhidrin gin igi da ini, “Raingꞌ ruas, dzi nang Anutu guman ruta uwayant bini da dzi anungꞌ itsanga asub mangan wasaꞌ i nanggaꞌ mpadan iba isangꞌ gubuꞌ aruani.” 2 Ananaias, garam pumuꞌa Anutu wain gudzunggan tsiraꞌ, iringant i nan igi da ini da rib muntida uts da Paulus igi i isa arangan nifun. 3 Da Paulus ini da arangan, “Anutu bungꞌ ais agu, i wain, u waꞌ ibi ntiangꞌ bubumpuadan garam rima pent sap gin i dziginda nam bubumpuadan igi.*ntiangꞌ bubumpuadan garam rima pent sap gin i dziginda nam bubumpuadan igi — Nan raman yaba i ntiangꞌ ani wainggan ibi garam umpur nida nan i atsungꞌa sanab rururungan da bitsintaꞌ runggan atsungꞌa sanab maisan. U mpa igi i raruda dzi yaba i nan faidagin, da bitsintaꞌ u ni da ribigi i isa dzi, da nigi yis nan faidagin igi udziꞌ!”

4 Da rib muntida uts da Paulus igi ini, “Ibianungꞌ da u ni nan maisan i Anutu garaman pumuꞌan gudzunggan tsiraꞌ?”

5 Da Paulus ini, “Raingꞌ ruas, dzi anungꞌ isruꞌ gin ibi arangan garam pumuꞌa Anutu wain gudzunggan tsiraꞌ u. Dzi nang asub, i wain, Anutu nanggan akaran mangan ini ibiani, ‘Agam anungꞌ nida nan maisan i garam gudzunggam mangan u.’ ”Kis 22:28

6 Da Paulus isruꞌ gin ibi utup nan tipan igi fain Sadusi da fain Farisai. Ibinigi da arangan iyaiꞌ ibiani, “Raingꞌ ruas, dzi garam Farisai da dzi ba imingꞌ yangin Farisai. Dzi munti nan rarudan wasaꞌ, i wain, dzi muaruts ibi garam mampan bungꞌ atip namunti marataꞌ da dzi rim marangꞌ gin.”

7 Gubuꞌ Paulus nida nan arigi da rib Farisai da Sadusi yis ruan i nan, da utup nan tipan igi uwayantan ibrang ruan isu iruꞌrun. 8 I wain, rib Sadusi anungꞌ imuaruts ibi garam mampan isangꞌ i tipa muntida marataꞌ u, da ini angira da marapayam imaꞌ, da bitsintaꞌ rib Farisai imuaruts nam santan igi. 9 Da gagara tsiraꞌ iwaꞌ, da garam gudzupuꞌ i nan faidagin faingꞌ mingꞌa utup Farisai imunti da ini nan babampaf ibiani, “Aga sau asub mangan i garam aruani. Mabi marapayam ma angira mani nan da arangan?” 10 Da ufuai ifa su tsiraꞌ da garam singaari gudzunggan tsiraꞌ irat i garam Yuda branga Paulus riniuriatsan. Ibinigi da arangan ini da garam singaari ruas i mpunga Paulus da dzunga gin sinungꞌ rib Yuda igi banginggan da uda arangan atangꞌa ribarangan ungaran igi.

11 Idziang arigi da Nifutsarif imunti uts da Paulus da ini ibiani, “Wamunti babampaf da anungꞌ ratan u! U ni dzi nanggangꞌ wasi imingꞌ Yerusalem, da u bungꞌ ani dzi wasi namingꞌ Rom nabinigi angu i.”

12 Pisa tataꞌ da garam Yuda fain impruꞌ ruan da yudzu nan maradzigin angu i isa Paulus funub, da itaga ruan da ini nan babampaf i anungꞌ gada nam ma numa mpui sangꞌa i isa arangan funub. Da bida gada nam ma numa mpui da mamida i isa Paulus funub, da ini Anutu nawaya ribarangan. 13 Garam udzuda nan igi gudzunggan iyus 40. 14 Da ribarangan ifan da garam pumuꞌa Anutu wain gudzun rusan da garam gudzun ruas da ini ibiani, “Aga taga ruangꞌ ruta nan pupuarapan da runggangꞌ i aga anungꞌ isangꞌ i gada nam mangan ma numa nam mangan nasangꞌ aga nais Paulus funub. 15 Ibinigi da agam warut garam Yuda utupan nan tipan da wagut i garam singaari gudzunggan tsiraꞌ i uda Paulus badan da agam. Agam wayiyuꞌ arangan nabi agam inang i raruda Paulus da sruꞌa i uwayant faingꞌ yaba i arangan. Da aga tip runggangꞌ sib i isa arangan funub da gubuꞌ arangan yunga sanab badan.”

16 Da bitsintaꞌ gubuꞌ Paulus nafunggan narunggan marub ringanta i nan udzudan maradzigin igi, da yatangꞌ garam singaari ruas ungaran da ini da Paulus. 17 Da Paulus inuꞌ garam singaari gudzunggan mangan mpada tayangꞌ garam singaari 100 ba da ini rutin ibiani, “Wayu mamaꞌ rini faꞌ aruani nafan da garam gudzun tsiraꞌ, i arangan ini nida nan manga rutin.”

18 Ibinigi da arangan iyu mamaꞌ rini faꞌ igi ifan da garam singaari gudzunggan tsiraꞌ da ini ibiani, “Paulus, garam karabusan ugu, inuꞌ dzi da ini da dzi i uda mamaꞌ rini faꞌ ani badan da agu, i arangan ini nida nan mangan da agu.”

19 Da garam singaari gudzunggan tsiraꞌ igi igif mamaꞌ rini faꞌ igi bangin da iyu ifa mumai rib maꞌa gin da ini, “U buni nida nan idzuwai igi da dzi?”

20 Da mamaꞌ igi ini, “Garam Yuda faingꞌ yudzu nan sib i guta i agu i uda Paulus fadan da garam Yuda utupan nan tipan da maiꞌ aga. Bungꞌ ayiyuꞌ agu nabi ribarangan inang i raruda arangan da sruꞌa i uwayant faingꞌ yaba i arangan. 21 Da bitsintaꞌ anungꞌ ringanta i ribarangan nanggan u, i ribaranga gan faingꞌ gudzunggan yusa 40 yudzu nan da itaga ruan ruta nan pupuarapan i anungꞌ gada nam ma numa mpui nasangꞌ nais arangan funub. Ribarangan itip ruan sib da ikup da ifangꞌ i agu i u nida ‘hai’ i ribarangan nanggan.”

22 Da garam singaari gudzunggan tsiraꞌ igi ini nan babampaf da mamaꞌ rini faꞌ igi ibiani, “Anungꞌ nidan da garam mangan bida u ni nan aruani da dzi u.” Da itangin arangan ifan.

23 Da garam singaari gudzunggan tsiraꞌ igi inuꞌ garam gudzun iruꞌ mpada tayangꞌ garam 100 iba da ini rutin ibiani, “Agam wayu garam singaari 200 da garam singaari 70 mpada i kausiꞌ da garam singaari 200 ngifa singan, da agam watip runggam i fada Kaisaria da 9 kilok idziang aruani. 24 Agam wayu kausiꞌ fain ampruꞌ i Paulus mpada gin da agam wayu arangan bini angu nafan nasangꞌ waꞌan da kiap tsiraꞌ Feliks.”

25 Da garam singaari gudzunggan tsiraꞌ igi ikakar papiar mangan ibiani:

31 Da garam singaari ruas yatsungꞌ nan garam gudzunggan nidan igi da iyu Paulus da irut arangan iyung idziang arigi santan isangꞌ waꞌa gamp Antipatris. 32 Da pisa fada maiꞌ da garam singaari mpada i kausiꞌ iyu arangan ifa Kaisaria, da garam singaari ruas fain igi itip ifa ungaran mpada gin mingꞌa Yerusalem. 33 Gubuꞌ garam singaari mpada i kausiꞌ igi waꞌa Kaisaria da irim papiar igi da kiap tsiraꞌ Feliks da itangin Paulus ifan da arangan. 34 Da gubuꞌ kiap tsiraꞌ farisa papiar igi sib da igut i Paulus i arangan iba imingꞌ provins idzuwai, da arangan ini ibi arangan iba imingꞌ Silisia. 35 Da Feliks ini, “Gubuꞌ rib arida nan da agu bawaꞌa sib da dzi bungꞌ aringant i u nanggam.” Da arangan ini i Paulus karabusa mingꞌa ungar tsiraꞌ King Herot riman ugu.