1 Gubuꞌ 5 fada sib da garam pumuꞌa Anutu wain gudzunggan tsiraꞌ binganggan Ananaias irut garam gudzun fain da Tertulus, garam gudzupuꞌ i Rom nanggan faidagin, iruꞌ ifa Kaisaria da ini nan wain dzura Paulus gin igi da kiap tsiraꞌ. 2 Gubuꞌ nuꞌa Paulus atangꞌa ba, da Tertulus ini nan dzura arangan gin igi ifan da Feliks ibiani, “Garam tsiraꞌ, u mpa tayangꞌ aga ruta nam mpada bini angu gubuꞌ guntiꞌ bingan da barabin da ufuai imaꞌ i agai. Da u nang nam faꞌ faꞌ mara maran i gam uwayantam bini i rima utup Yuda ani sib i rasuda barabin. 3 Gubuꞌ santan da mingꞌa gamp sib angu da aga santan itsanga nam u nangan igi da aga nugungꞌ itsiaꞌ da aga rim dangki tsiraꞌ da agu, garam tsiraꞌ bini Feliks. 4 Da bitsintaꞌ dzi mangif agu gubuꞌ maran guntiꞌ i. Ibinigi da dzi ni guta i agu i u sangꞌ santingꞌa maraampi gam da ringanta i aga nanggaꞌ uts pas ani.

5 “Aga tsanga garam aruani ibi garam nanga barabin da garam raꞌa i garam Yuda mpada intap santan wangun i nanga ufuai tsiraꞌ waꞌan. Arangan isu gudzun i utup fisa i nan umpur aru faringꞌa rib Nasaret gin ugu. 6 Da arangan inang i nanga Ungar Mararam bubumpuadan i Anutu maranggan; ibinigi da aga mpung arangan. 7 *Mingꞌa papiar ratar fain mingꞌa nifu nan Grik da nan ani imingꞌ: “Da aga marangꞌ ifur i raruda arangan atsungꞌa aga rugangꞌ nanggangꞌ faidagin. Da bitsintaꞌ, garam singaari gudzunggan tsiraꞌ Lisias irut garaman singaari iba da ragiyab da idzungꞌ i arangan sinungꞌ aga bangingꞌ. Da Lisias ini i rib dzura nan da arangan nawaꞌ namunti u maranggam i nan rarudan.” 8 Bida u guta i arangan, da u runggam bungꞌ asangꞌ i sruꞌa i nan nidzun santan aga dzura i arangan igi.”

9 Da rib Yuda igi irim Tertulus sib da ini, “Nan santan igi nan nidzun.”

10 Da gubuꞌ kiap tsiraꞌ igi raꞌa i bangin i Paulus nida nan, da arangan ini ibiani, “Dzi sruꞌ gin ibi udzuf ampi bingan da u mpai ibi ampan garaman raruda nan mingꞌa intap aruani, ibinigi da dzi nugungꞌ itsiaꞌ i nida nan mungaꞌ biaꞌ da agu. 11 Bida u guta rib, da u bungꞌ asruꞌ gin nabi gubuꞌ 12 angu fada sib da dzi yab Yerusalem i tsarifa Anutu. 12 Da rib aru dzura nan da dzi igi anungꞌ itsanga dzi ruta garam manga udzungꞌa i nan da ruangꞌ ma raꞌa i garam wangun mingꞌa Ungar Mararam ntiangꞌ gan wasaꞌ ma ungar mpruꞌa ruan gin ma gamp wasaꞌ u. 13 Da ribarangan anungꞌ isangꞌ i santingꞌa nan dzura dzi gin igi nidzunggan mangan da agu u. Imaꞌ. Ribarangan ini nan umpur.

14 “Da bitsintaꞌ, dzi ni runggangꞌ wasi i dzi pumuꞌ agi tafangꞌ rusangꞌ Anutu gan i Yisu Sanaban aru ribigi faringꞌa bida utup nida nan umpur gin ugu. Dzi muaruts nan santan mingꞌa nan faidagin Anutu riman da Moses da nan profet ruas akaran ugu. 15 Dzi muaruts ibi Anutu bungꞌ araꞌ i garam rururungan da garam maisan aru mampa sib ugu, da dzi rim marangꞌ gin. Da garam Yuda tuasarani runggan imuaruts da irim maran gin impruꞌ ibinigi. 16 Ibinigi da gubuꞌ sib angu da dzi nang gum babampaf i uwayantangꞌ mingꞌa bini i Anutu da garam gar maranggan.

17 “Dzi mpa manaꞌ sinungꞌ Yerusalem isangꞌ udzuf fain ifa sib, da dzi tip iba Yerusalem i rima moni da rib sauda runggan mingꞌa wasaꞌ i dzi ampanggangꞌ Yuda da tsarada nam suda dangki fadan da Anutu mpruꞌa bida nigi. 18 Dzi yatsungꞌ sanab nanga runggangꞌ suda mararam i Anutu maranggan sib raiyi da dzi fa Ungar Mararam. Da gubuꞌ ribigi tsanganda dzi mpada Ungar Mararam ntiangꞌ gan wasaꞌ, da dzi su mararam sib. Ampi tsiraꞌ warut dzi mpai u, da dzi anungꞌ impa wasaꞌ i ufuai da gagara u. 19 Da bitsintaꞌ rib Yuda fain bada mingꞌa provins Esia impung dzi, da bida tuasarangan tsanganda asub i dzi, da tuasarangan runggan naba munti u maranggam da nani dzi asubangꞌ igi wasi. 20 Bida maꞌan, da rib mpada aruani runggan nani asub idzuwai ribarangan tsanganda wasaꞌ i dzi da gubuꞌ dzi muntida utup nan tipan maranggan da fisa i nan wasi. 21 Mabi ribarangan mabugin nan bitsintaꞌ angu dzi yaiꞌa gin da gubuꞌ dzi muntida ribarangan maran. Nan igi ibiani, ‘Dzi muaruts ibi garam mampa sib bungꞌ amunti marataꞌ; wain arigi angu da dzi munti agam nanggam rarudan wasaꞌ da aruani.’ ”

22 Feliks isruꞌ bini i rib atsungꞌa Yisu Sanaban igi nanggan muarutsan da sanaban, da arangan ini da rib Yuda ibiani, “Dzi wasangꞌ nida nan rarudan mangan da aruani u. Agam watip wafan. Da gubuꞌ Lisias, garam singaari gudzunggan tsiraꞌ badan, da dzi bungꞌ araru agam nanggam dzura yaba i Paulus.” 23 Da arangan ini da garam singaari gudzunggan mpada tayangꞌ garam 100 i tanginda Paulus atangꞌa karabus da bitsintaꞌ rima wasaꞌ i arangan da anungꞌ paꞌa i rinun rusan i tsanganda arangan da rima arangan sib u.

24 Gubuꞌ fain ifa sib da Feliks irut fininggan Drusila, sagat Yuda igi, iba. Da arangan itangin garam guman mangan ifan da iyu Paulus imingꞌ ungar karabus iba da arangan. Da arangan iringant i nan fain Paulus fisa gin yaba i sanab muarutsa Yisus Kristus. 25 Da Paulus ifis i nan iyab i sanab rururungan, da sanab garam mpada tayangꞌ runggan, da Anutu nanggan raruda garam da gubuꞌ buntun aga. Da Feliks iringant i nan igi da irat da ini, “U ni nan isangꞌ da aruani! Wafan. Dzi natsanga wasaꞌ manga sangꞌan da bampan aga da dzi bungꞌ atip nanuꞌ agu.” 26 Feliks ini ibinigi, i wain, arangan maran yari i Paulus rima moni faingꞌ da arangan bida nam ntsuman maradzigin i tanginda arangan fada sinungꞌ karabus. Ibinigi da gubuꞌ ampi bingan da inuꞌ Paulus iba i ruta arangan nida nan. 27 Udzuf iruꞌrun ifa sib da Porsius Festus iyu Feliks mumai gan, da Feliks ini nanga rib Yuda nugun tsiaꞌa i arangan; ibinigi da rungꞌ itangin Paulus impa karabus.