1 Gubuꞌ Festus bawaꞌa provins Yudia da arangan impai igi gubuꞌ iruꞌ da bits ifa sib da arangan itangin gamp Kaisaria rai da iyab Yerusalem. 2 Mingꞌan nigi da garam pumuꞌa Anutu wain gudzun rusan da garam Yuda gudzun rusan imunti Festus maran da ini nan dzura Paulus gin igi. Da ribarangan igaib ruan da arangan 3 da igut i arangan i nanga ribarangan nugun tsiaꞌan da tanginda Paulus fada Yerusalem, i wain, tuasarangan irants nan sib i kupan da isa arangan funub da gubuꞌ arangan mingꞌa sanab fadan. 4 Da Festus ini, “Paulus impa karabus imingꞌ Kaisaria da uts pas angu da dzi runggangꞌ bungꞌ atip afa Kaisaria. 5 Ibinigi da agam garam gudzunggam faingꞌ naba rut dzi da bida garam igi nanga asub da ribarangan isangꞌ i nida asub igi wasi.”

6 Festus impa Yerusalem igi isangꞌ gubuꞌ 8 ma 10 angu da arangan iruꞌ Kaisaria. Da pisa fada maiꞌ da arangan impai bintip raruda nan gin da ini nifun i uda Paulus ba muntida arangan maran. 7 Da gubuꞌ Paulus bamuntida sib, da rib Yuda mingꞌa Yerusalem ruꞌa ba igi imunti itsuafi arangan. Da idzur arangan i nanga asub tsiraꞌ tsiraꞌ ampi bingan, da bitsintaꞌ ribarangan wasangꞌ i santingꞌa nan dzuran igi wainggan mangan wasi da Festus u. 8 Da Paulus ini ribarangan nifunggan mungaꞌ ibiani, “Dzi anungꞌ inang asub mangan i rib Yuda nanggan faidagin ma Ungar Mararam ma Kaisar u.”

9 Da bitsintaꞌ Festus ini nanga rib Yuda nugun tsiaꞌan, ibinigi da arangan ini da Paulus ibiani, “U sangꞌ i yaba Yerusalem i muntida nan rarudan mingꞌa dzi marangꞌ yaba i nan dzuran tuasarani?”

10 Da Paulus ini, “Aruani da dzi munti Kaisar nanggan rarudan, da u sangꞌ i raruda dzi mingꞌa mumai aruani angu. Dzi anungꞌ inang asub mangan i rib Yuda ibi u runggam isruꞌ gin sib. 11 Bida dzi nanga asub mangan sangꞌa i dzi mampan, da dzi anungꞌ ibugin i mampan u. Da bitsintaꞌ bida nan garam Yuda dzura dzi gin ani bida nan umpur, da garam mangan anungꞌ isangꞌ i tanginda dzi fada ribarangan banginggan u. Kaisar runggan nararu dzi!”

12 Festus ruta garaman rima uwayant rutin igi nida nan sib, da arangan ini ibiani, “U ni Kaisar raruda agu. Ibinigi da u bungꞌ afan da Kaisar!”

13 Gubuꞌ fain fada sib da King Agripa*King Agripa — King Agripa igi da King Herot Agripa 2, da ramanggan King Herot Agripa 1, aru isa aposel Dzems, Yowanis rainggan, funub ugu (Ap 12:2). Herot Agripa 1 igi rumpunggan da King Herot Tsiraꞌ, aru isa mamaꞌ narun narun mingꞌa gamp Betlehem fufunub ugu (Mt 2:16). King Herot Agripa 2 impa tayangꞌ provins Abilini, Ituria, da Trakonitis da provins Galili marafain gan mingꞌa udzuf 53 A.D. sangꞌa arangan mampan. Da Kaisar irim nampang da arangan i ragada garam pumuꞌa Anutu wain gudzunggan tsiraꞌ. da nafunggan Bernaisi ibawaꞌ Kaisaria i tsanganda Festus da isa yaring gin i arangan uda guman faꞌ igi. 14 Gubuꞌ ribarangan mpada gubuꞌ ampi bingan mingꞌa nigi da Festus iragi Paulus nanggan igi da King Agripa ibiani, “Garam mangan impai ani; mungꞌ da Feliks itangin arangan i karabus da arangan rungꞌ impai. 15 Gubuꞌ dzi fada Yerusalem, da garam pumuꞌa Anutu wain gudzun rusan da garam Yuda gudzun rusan idzur nan da arangan da igut i dzi i nida nan wasi bida arangan isu asub. 16 Da dzi ni da ribarangan ibi garam Rom sanaban raruda garam anungꞌ ibinigi i tanginda garam mangan utaꞌ angu fada rib dzura nan gin banginggan. Arangan namunti ribarangan maran da nani ribigi nanggan dzuran igi mungaꞌ gan mungꞌ raiyi.

17 “Gubuꞌ ribarangan bampruꞌa ruan ani, da dzi anungꞌ inang ribarangan ifangꞌ i dzi i raruda nan igi u, da bitsintaꞌ pisa maiꞌ da dzi mpa mumai raruda nan gin da dzi ni da garam singaari i uda arangan badan. 18 Da gubuꞌ rib dzura nan da arangan igi uriꞌan i nida nan, da dzi marangꞌ ifur ibi ribarangan bungꞌ asantingꞌ asub maisan tsiraꞌ bingan arangan nangan, da bitsintaꞌ imaꞌ. 19 Ribarangan isu ufuai da arangan iyab i sanaban muarutsan da pumuꞌa anutu gan gin da garam mampan mangan binganggan Yisu aru Paulus nida rungꞌ mpada marataꞌ. 20 Dzi marangꞌ ifur i waꞌan da nan igi wainggan, da bitsintaꞌ dzi anungꞌ isangꞌ; ibinigi da dzi gut i arangan i bida arangan isangꞌ i fada Yerusalem da muntida nan rarudan mingꞌa nigi yaba i nan dzuran igi. 21 Da bitsintaꞌ Paulus ini rungꞌ mpada karabus da Kaisar runggan raruda arangan, ibinigi da dzi ni da garam singaari i mpada tayangꞌ arangan sangꞌa gubuꞌ dzi tanginda arangan fadan da Kaisar.”

22 Da Agripa ini da Festus ibiani, “Dzi marangꞌ yari i runggangꞌ ringanta i garam arigi nanggan.”

Da Festus ini nan mungaꞌ ibiani, “Tataꞌ da u bungꞌ aringant i arangan nanggan.”

23 Pisa tataꞌ da Agripa da Bernaisi yatangꞌ ifa mumai mpruꞌa ruan gin mingꞌa ungar wasaꞌ ruta rini gira gan tsiraꞌ da sanab santingꞌa bingan tsiraꞌ. Ribigi iba impruꞌ da garam singaari gudzun rusan tsiraꞌ tsiraꞌ da garam tsiraꞌ tsiraꞌ faingꞌ mpada gamp igi. Da Festus ini da iyu Paulus yatangꞌ ifa mumai igi wasaꞌ. 24 Da Festus ini ibiani, “King Agripa da agam garam santan ruta aga mpada aruani, agam itsanga garam aruani! Garam Yuda santan iba munti imingꞌ dzi marangꞌ imingꞌ Yerusalem da Kaisaria ani da igaib ruan da dzi i dzi nida garam ani suda asub, da iyaiꞌ ibi arangan anungꞌ rungꞌ mpada marataꞌ. 25 Da bitsintaꞌ, dzi anungꞌ itsanga asub mangan isangꞌ i isa arangan funub gin u. Da bitsintaꞌ arangan ini Kaisar runggan raruda arangan; ibinigi da dzi uwayant iwaꞌ i tanginda arangan fada Kaisar. 26 Da bitsintaꞌ dzi anungꞌ isruꞌ i nan idzuwai rururungan da dzi bungꞌ akakar nafan da agi garamangꞌ tsiraꞌ nayab i arangan, i arangan sruꞌa i nan rarudan ani wainggan. Ibinigi da dzi yu arangan iba agu King Agripa maranggam da agam santan maranggam ibinigi, i agi ringanta i arangan nanggan i bida nigi da dzi bungꞌ asangꞌ i sruꞌa i nan kakara fadan. 27 I wain, dzi marangꞌ ifur ibi bida dzi tanginda garam mpada karabus manga fada Rom da dzi mamida i santingꞌa nan dzura arangan gin igi wasi da nigi bungꞌ abi uwayant brabruꞌan.”