1 Da Agripa ini da Paulus ibiani, “Aruani da u sangꞌ i nida nanggam.”

Ibinigi da Paulus iraꞌ i bangin da ini nan i muntida sib i runggan ibiani, 2 “King Agripa, dzi marangꞌ ifur ibi bini funub i dzi muntida u maranggam da dzi nida nan dzuran santan rib Yuda nida i dzi igi mungaꞌ gan mingꞌa u maranggam. 3 Nigi ngarubini funub, i wain, u sruꞌ bini i aga garam Yuda sanabangꞌ da nam santan aga nangan da udzungꞌa i nan da ruangꞌ gin. Ibinigi da dzi gampun runggangꞌ da agu i u rima gubuꞌ maran uts pas i ringanta i dzi nanggangꞌ.

4 “Garam Yuda santan isruꞌ gin bini i dzi nanggangꞌ mpadan mingꞌa gubuꞌ dzi mamaꞌ narun da badan, mingꞌa wasaꞌ i dzi ampanggangꞌ Yuda da mingꞌa Yerusalem. 5 Udzuf ampi bingan da ribarangan isruꞌ i dzi. Da bida ribarangan maran furan, da ribarangan isangꞌ i nida dzi wasi bida dzi mpai ibi utup Farisai garaman mangan da dzi yatsungꞌ i sanaban. Da mingꞌa wasaꞌ i garam Yuda sanaban pumuꞌa Anutu da utup Farisai igi iyus utup santan i sanaban atsungꞌa nan faidagin rururungan angu. 6 Dzi muaruts da dzi rim marangꞌ i Anutu nanga nam bida Arangan ragada mungꞌ da aga tafangꞌ rusangꞌ ugu i nangan; wain arigi angu da ribarangan iraru dzi aruani. 7 Aga garam Israil utupangꞌ 12 ugu irim rungan santan i pumuꞌa Anutu gubuꞌ da idziang sib angu, da irim maran i nam Anutu ragada i nangan ugu. Da King Agripa, dzi rim marangꞌ i nam arigi impruꞌ ibinigi, i wain arigi angu da rib Yuda idzur nan da dzi. 8 Ibianungꞌ da agam anungꞌ isangꞌ i muarutsa bida Anutu itip iraꞌ i garam mampa sib?

9 “Dzi binigi, mungꞌ da dzi marangꞌ ifur ibi dzi nanang nam ampi bingan i rima ipiap i rib atsungꞌa Yisu garam Nasaret ugu da rasuda Arangan binganggan. 10 Da dzi nang nam tuasarunigi imingꞌ Yerusalem. Dzi yu nampang imingꞌ garam pumuꞌa Anutu wain gudzun rusan gin da dzi tangin ampan mararam ampi bingan i karabus, da gubuꞌ garam gudzun ruas intsida bangin i isa ribarangan funub, da dzi ni nifungꞌ impruꞌ ibinigi i ribarangan mampan. 11 Da gubuꞌ ampi bingan da dzi yatangꞌ rib Yuda ungaran mpruꞌa ruan gin ampi bingan i mpunga ribigi da rima tsakia rutin. Dzi ntsaꞌ i nanga ribigi rima barun da Yisu da nida nan maisan gin. Dzi nugungꞌ iruaꞌ nidzun angu i ribarangan, da dzi fan da isau ribarangan i gamp fain mingꞌa manaꞌ i intap Israil i rima barabin da ribarangan.

12 “Wasaꞌ i sanab tuasaru dzi yunga gin igi da garam pumuꞌa Anutu wain gudzun rusan ini nifun da itangin dzi ifa Damaskus ruta nampang. 13 Da King, gubuꞌ maran fawaꞌa bida gubuꞌ wasaꞌ da dzi yunga sanab fadan, da dzi tsanga puatsadan manga mingꞌa gunungun ruꞌa ba, da puatsadan igi iyus gubuꞌ nanggan puatsadan da yari i dzi impruꞌ da rib ruta dzi fadan igi. 14 Aga santan iruaꞌ iruꞌ intap, da dzi ringant i nifun mangan nida nan Hibru*nan Hibru — ma nan Arameik: Watsanga nan mingꞌa gudzun 21, ampap 40. da dzi bida ani, ‘Sol, Sol, ibubianungꞌ da u rim ipiap i dzi? Gubuꞌ u nanga bida nigi, da u rim tsakia da runggam ibi makau faida gai bararangꞌ rinunggan gifan.’ 15 Da dzi gutin, ‘Nifutsarif, agu wai igi?’ Da Nifutsarif ini ibiani, ‘Dzi Yisu, aru u rima ipiap in igi. 16 Wauriꞌ da wamunti. Dzi santingꞌ runggaꞌ da agu i ragada agu bida dzi garamangꞌ pumuꞌan mangan da garam nida nan wasi yaba i nam u tsangandan da aruani da nam dzi bungꞌ asantingꞌ agu gin da gubuꞌ dzi waꞌan da agu da bampan aga. 17 Dzi bungꞌ arim agu sib, da u utupam Israil da garam utup fain wasangꞌ i isa agu funub u. Dzi bungꞌ atangin agu nafan da ribarangan 18 i nanga ribarangan maran taꞌan i ribarangan rima barun da nam mimindan da parima i ruan fadan da nam puatsadan, da rima barun da Sadang nampanggan da badan da Anutu. Bida nigi da Anutu isangꞌ i siata ribarangan nanggan maisan rai da ribarangan isangꞌ i uda mumai gan wasaꞌ i utup Anutu nanga suda i ampanggan mararam rururungan yaba i ribarangan nanggan muarutsa Dzi.’

19 “Ibinigi da King Agripa, gubuꞌ dzi tsanganda nam bida nam puafuban mingꞌa gunungun igi da dzi anungꞌ isu ringa dadantang rutin u. 20 Dzi fis i nan imingꞌ Damaskus isu miamun, da raiyi da dzi fis i nan da ampan Yerusalem, da intap Yudia santan, da garam utup fain. Dzi fis i nan i tuasaranga rima barun da nanggan maisan da parima i ruan fadan da Anutu da santingꞌa nanggan parima i ruan igi yaba i gan nanggan nangan. 21 Wain arigi angu da garam Yuda fain impung dzi i Ungar Mararam ntiangꞌ gan wasaꞌ da inang i isa dzi funub. 22 Da bitsintaꞌ, Anutu irim dzi sib iba isangꞌ aruani. Ibinigi da dzi munti ani da dzi ni nan wasi da garam ruta bingan tsiraꞌ da garam utaꞌ impruꞌ ibinigi. Dzi anungꞌ ini nan iyus nan aru Moses da profet ruas nida mungꞌ i waꞌan ugu. 23 Ribarangan ini ibi Kristus, Garam Anutu ragadan ugu, bungꞌ ayu tsakia da namamp da bungꞌ asu garam miamun i tipa muntida marataꞌ i mpada ratar ntingan, ibinigi da Arangan bungꞌ afis i Anutu sisingꞌ bini gan nabi nam puatsadan da ampan Israil da garam utup fain nampruꞌ nabinigi.”

24 Paulus rungꞌ ifis i nan muntida sib i runggan da Festus iyaiꞌ nifun tsiraꞌ da ini ibiani, “Paulus, u buburiꞌ! U atangꞌ udzuf ampi bingan da u uwayantam tsiraꞌ igi inang agu buburiꞌ.”

25 Da Paulus ini, “Garam tsiraꞌ bini Festus, dzi anungꞌ ibuburiꞌ u. Dzi ni nan nidzun ruta wain. 26 King Agripa isruꞌ i nam santan dzi nida nan gin igi; ibinigi da dzi anungꞌ irat i nida nan rururungan da arangan. Dzi sruꞌ gin ibi nam santan igi anungꞌ ikup i aranga maranggan u, i wain, nam santan igi anungꞌ iwaꞌ imingꞌ mumai maradzigin u. 27 King Agripa, u muaruts profet ruas nanggan, ma? Dzi sruꞌ gin ibi u muaruts.”

28 Da Agripa igut i Paulus ini binaꞌ, “U maram ifur ibi u bungꞌ araꞌ dzi wangungꞌ i suda garam muarutsa Yisu igi da gubuꞌ uts aruani angu?”

29 Da Paulus ini nan mungaꞌ ibiani, “Gubuꞌ uts ma gubuꞌ guntiꞌ da bitsintaꞌ dzi yugin da Anutu i agu da rib santan aru ringanta dzi ani waꞌa bida dzi, da bitsintaꞌ dzi marangꞌ anungꞌ yari i rib tanginda agam i karabus da dzura agam i tsen u.”

30 Da king imunti iyab, ida kiap tsiraꞌ Festus da Bernaisi da rib ruta mpadan igi yuriꞌ impruꞌ ibinigi. 31 Da gubuꞌ ribarangan tanginda mumai mpruꞌa ruan gin igi sib, da ini nan da ruan ibiani, “Garam aruani anungꞌ inang nam mangan isangꞌ i mampan ma karabusan u.”

32 Da Agripa ini da Festus, “U sangꞌ i tanginda garam aruani fadan, da bitsintaꞌ arangan runggan ini Kaisar raruda arangan.”