1 Gubuꞌ arigi da King Herot Agripa impungꞌ rib fain mingꞌa wasaꞌ i ampan muarutsan i nanga maisan gin. 2 Da arangan ini da ribaranga yis Dzems, Yowanis rainggan, funub i bainat. 3 Herot itsanga rib Yuda nugun nufan i sanab aru aranga nangan igi, da arangan ini da impung Petrus impruꞌ ibinigi. Nam arigi iwaꞌ da garam Yuda gubuꞌ gan tsiraꞌ gada bret yist maꞌa gin.Lk 22:1 4 Gubuꞌ mpunga Petrus sib, da itangin aranga yatangꞌ karabus, da garam singaari utup 4 imunti tayangꞌ gin. Da garam singaari 4 impa wasaꞌ i utup 4 igi bitsintaꞌ bitsintaꞌ, da santan igi gudzunggan isangꞌ 16. Herot maran ifur i mpada sangꞌa gubuꞌ tsiraꞌ Angira Atupa Sib igi ntsupan da musa uda Petrus waꞌa ba da raruda arangan i ampan maran. 5 Ibinigi da garam singaari rungꞌ impa tayangꞌ Petrus i ungar karabus igi, da bitsintaꞌ ampan muarutsan idaru gubuꞌ i nan udagin babampafan angu da Anutu i rima arangan sib.

6 Idziang aru nanga i pisa ba gubuꞌ aru Herot nida raruda Petrus igi, da Petrus igingꞌ wasaꞌ i garam singaari iruꞌrun. Da idzur aranga bangin i tsen iruꞌrun, mangan ifan da garam singaari mangan banginggan da mangan ifan da mangan banginggan. Da garam singaari fain imunti ungar karabus igi muantsi gan. 7 Sung angu da Nifutsarif angira gan iwaꞌ, da nam puatsadan yari wasaꞌ i ungar karabus igi. Da angira itsiats Petrus dzabar da inuꞌ arangan marataꞌ ini binaꞌ, “Wauriꞌ sung!” Da tsen iruꞌrun mingꞌa Petrus bangin igi igruꞌ ruan sib iruꞌ intap. 8 Da angira ini da Petrus ini binaꞌ, “Waraing ritam*ritam — Bingan fain i rit ani da ‘bigamp’ ma ‘pikap’, da bitsintaꞌ mamaꞌ faꞌ ampi bingan ini ‘rit’. da watsuf faga gangkang gam.” Da Petrus inang ibinigi. Da angira itip ini, “Watsuf ngarukui gam guntiꞌ da watsungꞌ dzi.” 9 Da Petrus yatsungꞌ i angira iwaꞌ, da bitsintaꞌ Petrus anungꞌ isruꞌ gin ibi nam angira nangan igi iwaꞌ isu nidzun u, i wain, aranga tsanga nam igi isangꞌ ibi nam puafuban. 10 Ribaranga yung ifan da iyus garam singaari ruas muntida mumai iruꞌrun da ifawaꞌ muantsi ain waꞌa fada gamp tsiraꞌ gin. Da muantsi igi runggan itus ruan, da ribarangan iwaꞌ da iyung ifan da yatangꞌ sanab mangan, da sung angu da angira itangin Petrus rai.

11 Da Petrus maran idzidziwan da ini da runggan ibiani, “Aruani da dzi sruꞌ gin nan nidzun ibi Anutu itangin angira gan iba da iyu dzi sinungꞌ Herot banginggan da nam santan rib Yuda maran furan i nangan ugu.” 12 Gubuꞌ Petrus waꞌa da nan igi, da arangan iyung ifa Yowanis, faringꞌa Markus in, rinanggan Maria ungaran. Da garam ampi bingan rungꞌ impruꞌ ruan impai ungar igi da iyugin. 13 Petrus yis muantsi manga mingꞌa manaꞌ, da sagat gum mangan, binganggan Roda, iba i tusa muantsi da sruꞌa gin manga munti manaꞌ. 14 Da bitsintaꞌ gubuꞌ aranga ringanta i Petrus nifunggan da aranga nugun itsiaꞌ tsiraꞌ bingan da arangan anungꞌ itus muantsi u; imaꞌ, aranga tip irunt yatangꞌ ifa ungar wasaꞌ da ini da rib santan igi biani, “Petrus iba munti muantsi manaꞌ!”

15 Da ribigi ini da arangan ibiani, “U buburiꞌ, ma?”

Da bitsintaꞌ aranga rungꞌ udzungꞌ da ini da ribigi ibiani, “Nan nidzun, aranga rungꞌ imunti manaꞌ!”

Da ribigi ini ibiani, “Mani aranga angira gan, ma?”

16 Da bitsintaꞌ Petrus rungꞌ yis muantsi, da gubuꞌ ribarangan tusa muantsi da tsanganda arangan, da irunt fafun tsiraꞌ bingan. 17 Da Petrus iraꞌ i bangin i nanga ribaranga mpada isiꞌ angu, da aranga fis i nan i nam aru Nifutsarif nangan da uda aranga sinungꞌ karabus igi. Da aranga ni da ribarangan ibiani, “Wani da Dzems da agi raingꞌ rusangꞌ fain ugu i nam aru waꞌa i dzi ani.” Da aranga tangin ribigi rai da itip ifa mumai mangan.

18 Gubuꞌ ipis da garam singaari ruas isau Petrus da irunt fafun da iyu wangu barabin impruꞌ da nam ratan tsiraꞌ bingan da igut i ruan ifa iba, “Petrus ibuwaꞌ gan ibianungꞌ?” 19 Herot iringant i nan ibi Petrus iwaꞌ sinungꞌ karabus, da ini da garaman i sauda arangan, da bitsintaꞌ ribarangan isau arangan wasi. Da Herot igut i garam singaari mpada tayangꞌ ungar karabus igi i nan guta gin fain, da bitsintaꞌ ribarangan anungꞌ isangꞌ i dzungwara i nam aru waꞌan igi da Herot u. Ibinigi da Herot ini nifun da yis ribaranga fufunub. Da raiyi da Herot itangin Yudia rai da iruꞌ ifa mpa Kaisaria.

20 Herot isu ufuai tsiraꞌ bingan da ampan Taiya da Saidon. Da ribigi inang da iyu nam gadan imingꞌ intap king mpada tayangꞌ gin. Ibinigi da garam gudzun ruas mingꞌa gamp iruꞌ igi impruꞌ ruan da iba i tsanganda king i tipa nan. Ribaranga ni nan da Blastus, garam mpada tayangꞌ king ungaran gingꞌa gin isu miamun, da aranga ni, “Hai.” Da raiyi da ribarangan imus fa tsanganda king da guta gin i arangan ruta ribarangan mpruꞌa wangun suda bitsintaꞌ.

21 Da waꞌa gubuꞌ aru Herot tagadan igi, da aranga atsuf ngarukui king gan da impai iyab bintipan king, da ifis i nan da ampan. 22 Da ampan tsiraꞌ igi iyaiꞌ da ini binaꞌ, “Nifun arigi iba imingꞌ anutu manga gin! Anungꞌ iba imingꞌ garam gar in u!” 23 Sung angu da Nifutsarif angira gan yis Herot, da rinin gingꞌan maisan iwaꞌ da arangan da turup narun narun iga aranga nidzunggan da aranga mamp, i wain, aranga iyu nan tsarifan igi yab da anungꞌ irim bingan tsiraꞌ igi da Anutu angu u.

24 Da bitsintaꞌ Anutu nanggan iyingꞌ isu tsiraꞌ bingan da ifa isangꞌ gamp gamp.

25 Da gubuꞌ Barnabas da Sol ntsupa guman sib mingꞌa Yerusalem da itip ifa Antiok, da iyu Yowanis faringꞌa Markus in da irut ifan.