1 Da aposel ruas da garam muarutsan fain mpada intap Yudia iringant i garam utup fain uda Anutu nanggan igi i gan wangunggan. 2 Ibinigi da gubuꞌ Petrus tanginda Kaisaria rai da tipa yaba Yerusalem, da garam muarutsan Yuda*garam muarutsan Yuda — Nan mingꞌa papiar Grik da ibiani: ‘rib safa i rinin ugu’, da nan ani iram iyab i rib Yuda. Garam mararuru fain maran ifur ibi nan ani iram iyab i rib muarutsan Yuda aru nida nan babampaf i rib muarutsan santan safa rinin da atsungꞌa nan faidagin santan igi. Da bitsintaꞌ fain maran ifur ibi nan ani iram iyab i rib muarutsan Yuda santan. irim ub i arangan 3 da ini rutin, “Ibubianungꞌ da agu rut ampan mamida i safa riniubit igi mpai i gan ungaran da u rut iga nam?”

4 Ibinigi da Petrus iragi i nam santan waꞌan da arangan da ini ibiani, 5 “Dzi mpa gamp nida Dzopa gin. Da gubuꞌ mangan da dzi yugin, da dzi tsanga nam mangan ibi nam puafuban. Dzi rarab nam mangan bida rabiꞌ tsiraꞌ bingan isasagruꞌ ruan imingꞌ gunungun iruꞌ iba da dzi ibi rib fain mpunga i gan gudzu mun gan iruꞌ da iruꞌ. 6 Da dzi intrung marangꞌ i rabiꞌ igi wasaꞌ gan da dzi tsanga apu mara maran pagraꞌ da buman, yunga i fagan da bangin da afafan da dzufan. 7 Da dzi ringant i nifun mangan nida da dzi, ‘Petrus, wauriꞌ da wais funub da wagan.’

8 “Da dzi ni binaꞌ, ‘Nifutsarif, imaꞌ. Dzi anungꞌ isangꞌ i nanga bida nigi u, i wain, dzi anungꞌ iga apu bubumpuadan mangan bida nigi da gubuꞌ mangan u, ibi u nanggam faidagin paꞌa aga gin ugu.’

9 Da nifun bada mingꞌa gunungun igi itip ini da dzi ibiani, ‘Nam Anutu nanga suda sapan sib da anungꞌ nida nam bubumpuadan gin u.’ 10 Nam igi iwaꞌ isangꞌ iruꞌ da bits sib, da nam santan igi itip iyab gunungun.

11 “Gubuꞌ arunigi rururungan, da garam iruꞌ da bits ibawaꞌ ungar aga mpada gin ugu. Garam bits mpada Kaisaria iwat tuasarangan iba da dzi. 12 Da Marapayam Mararam ini da dzi ibiani, ‘Warut ribigi wafan, da anungꞌ uda uwayant ampi bingan u.’ Da raingꞌ ruas 6 igi irut dzi mpruꞌ ruangꞌ fadan, da aga fa atangꞌ garam igi ungaran. 13 Da garam igi ini nan da agai i arangan tsanganda angira bits muntida ungar da nida binaꞌ, ‘Wawat garamam fain nafa Dzopa da nasau Saimon, bingangan bits Petrus, da nani rutin i badan. 14 Arangan bungꞌ arim nan fain da agu, da mingꞌa i nan arigi da Anutu bungꞌ arim agu da ampan santan mpada agu ungaram sib da natip ayu agam sinungꞌ nam maisan.’

15 “Gubuꞌ dzi nida nan pas angu, da Marapayam Mararam iruꞌ ba i ribarangan, ibi aru ruꞌa ba i agi da miamun ugu. 16 Da dzi marangꞌ itip ifur nan Nifutsarif nida bida ani, ‘Yowanis irurub garam da sagat i mpui, da bitsintaꞌ Dzi bungꞌ arurub agam i Marapayam Mararam.’Mt 3:11; Mk 1:7-8; Lk 3:16; Ywn 1:26-27; Ap 1:5 17 Mungꞌ da Anutu irim Marapayam Mararam da agi da gubuꞌ agi muarutsa Nifutsarif Yisus Kristus ugu, da aruani da irim da ribarangan. Ibinigi da dzi wai ani i muntida sib i Anutu guman?”

18 Gubuꞌ ribaranga ringanta i Petrus nanggan igi sib, da ribaranga maran anungꞌ rufur i tipa rima ub u. Imaꞌ. Ribaranga tsarif Anutu da ini ibiani, “Aruani da Anutu inang da garam utup fain iparim i ruan da imuaruts i uda nam mpada maran taꞌan.”

19 Da gubuꞌ aru isa Stiven funub da garam muarutsan santan waꞌa da barabin da dzaranga fada gamp gamp ugu, da fain ifa mpa distrik Fonisia, da fain ifa mpa intap mangan mingꞌa uruts wasaꞌ binganggan Saiprus, da fain ifa mpa gamp tsiraꞌ Antiok. Da mingꞌa gamp santan igi da ribarangan ifis i Anutu nanggan da garam Yuda angu.Ap 8:1,4 20 Da bitsintaꞌ mingꞌa wasaꞌ i ribarangan, da garam Saiprus da Sairini fain ifa gamp Antiok da ifis i Nifutsarif Yisu sisingꞌ bini gan da garam Grik impruꞌ ibinigi. 21 Da Nifutsarif riniurunggan irut ribarangan da garam ampi bingan imuaruts da iparim i ruan ifan da Nifutsarif. 22 Garam muarutsan mpada mingꞌa Yerusalem iringant i sisingꞌ i nam waꞌan nigi da iwat Barnabas ifa Antiok. 23 Gubuꞌ Barnabas fawaꞌan da tsanganda bida Anutu rima maraampi gan da nanga bini angu i ribarangan, da aranga nugun itsiaꞌ, da ifai nan i ribarangan i rumuntida babampaf i nanggan muarutsan ruta wangunggan santan. 24 Barnabas igi da garam bini da Marapayam Mararam ifungꞌ i arangan da nanggan muarutsan ibabampaf. Da garam da sagat ampi bingan imuaruts Nifutsarif iyab i arangan nanggan nidan. 25 Da Barnabas ifa gamp Tarsus i sauda Sol. 26 Da gubuꞌ aranga waꞌan da Sol sib da aranga irut iba Antiok. Barnabas da Sol inang da irut ampan muarutsan Antiok igi impruꞌ ruan isangꞌ udzuf manga santan, da iyu ampan tsiraꞌ bingan yatangꞌ i Anutu nanggan. Rib fain irim bingan Kristen da Yisu riban atsungꞌa gin isu miamun imingꞌ Antiok.

27 Wasaꞌ i gubuꞌ arigi da profet fain itangin Yerusalem rai da iruꞌ ba Antiok. 28 Profet igi gan mangan nida Agabus in imunti iyab da mingꞌa wasaꞌ i Marapayam Mararam riniurun gan da arangan ifis i nan maradzigin mangan i nam gadan bungꞌ amaꞌ da mangits tsiraꞌ bungꞌ awaꞌ nasangꞌ intap da intap. (Raiyi da gubuꞌ Kaisar Klodius suda King, da nan igi ikap nidzun.) 29 Gubuꞌ garam muarutsan mpada Antiok igi ringanta i nan igi da maran ifur i rima rib muarutsan mpada Yudia sib. Da ribaranga bitsintaꞌ bitsintaꞌ maran ifur i rima moni sangꞌa gan ampapan angu. 30 Da ribarangan inang ibinigi, da iwat Barnabas da Sol da iyu moni arigi ifan da garam gudzun gudzun Yerusalem.