1 Mingꞌa gamp Kaisaria da garam mangan binganggan Kornilius impai igi. Arangan isu gudzun da imungꞌ i garam singaari Rom gan ibi 100 mpada wasaꞌ i garam singaari utupan tsiraꞌ bida garam 600. Da utup tsiraꞌ igi binganggan Utup Singaari Itali. 2 Arangan da gan utupan santan anungꞌ rib Yuda u, da bitsintaꞌ yatsungꞌ sanab rururungan i pumuꞌa Anutu da yatangꞌ warangꞌ i Arangan. Da Kornilius inang da irim moni i rima ampan Yuda sauda runggan igi sib da yugin da Anutu da gubuꞌ santan.

3 Nam nufan mangan, gubuꞌ maran ibi 3 kilok, da Kornilius itsanga nam mangan ibi nam puafuban, da itsanga dzidziwan i Anutu angira gan mangan atangꞌa ba da arangan da ini, “Kornilius!”

4 Kornilius intrung maran funub angu i angira igi da irat. Da arangan igut in, “Garam nifutsarif, ibubianungꞌ da u ba da dzi?’’

Da angira ini, “U nanggam uda gin da nanggam riman da rib sauda runggan iyab ifa Anutu maranggan ibi nam tsaradan duguntan gaunt bini. Da Arangan nugun inuf in.Wkp 2:2 5 Da arani da wawat garamam fain nafa Dzopa da nayu garam mangan binganggan Saimon, faringꞌa bida Petrus, da narut aba ani. 6 Da garam arigi impai imingꞌ garam mangan binganggan Saimon ungaran, garam aru nangan da umata i apu rini gangan da tipa nam fain gin. Da arangan ungaran imingꞌ uts da uruts ringan.”

7 Da gubuꞌ angira aru nida nan da arangan igi fada sib, da Kornilius inuꞌ gan mamaꞌ guman iruꞌrun ruta garaman singaari mangan iba da arangan. Da garaman singaari igi yatangꞌ warangꞌ i Anutu da inang da impai impruꞌ Kornilius da ipumuꞌ arangan. 8 Kornilius idzuwar i nan da garam iruꞌ da bits igi yatsungꞌ nan idzuwai angira nidan da arangan ugu, da iwat ribarangan ifa Dzopa.

9 Da gubuꞌ tipa pisan da bawaꞌa gubuꞌ wasaꞌ da Kornilius garaman iruꞌ da bits igi ifasu uts da gamp Dzopa. Da waꞌa gubuꞌ maran arigi da Petrus iyab ungar igi gudzunggan wagungꞌ i uda gin da Anutu.*iyab ungar igi gudzun gan wagungꞌ i uda gin da Anutu — Garam Israil ungar gudzunggan itangaf ruan angu da itip mumai mpada gin imingꞌ ungar gudzun wagungꞌ. Da garam inang da iyab impruꞌ maran gin da nam nufan. 10 Da arangan mangits irut da ini gada nam. Gubuꞌ rib fain rungꞌ tipa nam gadan, da Petrus itsanga nam mangan bida nam puafuban. 11 Da arangan itsangan gunungun dagangan da nam mangan bida rabiꞌ tsiraꞌ bingan isasagruꞌ ruan iruꞌ iba intap ibi rib fain mpunga i gan gudzu mun gan iruꞌ da iruꞌ. 12 Da apu mara maran yunga i fagan da bangin da afafan da dzufan imingꞌ i rabiꞌ igi. 13 Da Petrus iringant i nifun mangan nuꞌa arangan nida binaꞌ, “Petrus, wauriꞌ wayab da wais apu igi funub da wagan!’’

14 Petrus ini, “Nifutsarif, imaꞌ. Dzi anungꞌ isangꞌ i nanga bida nigi u, i wain, dzi anungꞌ iga apu bubumpuadan mangan bida nigi da gubuꞌ mangan u, ibi u nanggam faidagin paꞌa aga gin ugu.’’†dzi anungꞌ iga apu bubumpuadan mangan bida nigi da gubuꞌ mangan u, ibi u nanggam faidagin paꞌa aga gin ugu — Wok Pris gudzun 11 ini nan i apu rib aru mpada rabiꞌ igi da anungꞌ isangꞌ i rib Yuda gadan u, atsungꞌa i gan nanggan faidagin mingꞌa mungꞌ.

15 Da nifun igi itip inuꞌ Petrus da ini ibiani, ‘‘Nam Anutu nanga suda sapan sib da anungꞌ nida nam bubumpuadan gin u.” 16 Nam igi iwaꞌ isangꞌ iruꞌ da bits sib, da sung angu da rabiꞌ igi itip iyab gunungun.

17 Da gubuꞌ Petrus maran rungꞌ fura nan ampi bingan i nam puafuban igi wainggan, da garam iruꞌ da bits Kornilius tanginda fadan ugu ifawaꞌ sib da igut i garam fain i santingꞌa Saimon ungaran igi. Da ribarangan iba munti ungar igi ntiangꞌ gan nifun. 18 Da ribarangan inuꞌ ini binaꞌ, ‘‘Saimon, binganggan mangan Petrus, impa ani, ma?”

19 Da gubuꞌ Petrus maran rungꞌ fura nam puafuban igi, da Marapayam Mararam ini da arangan, “Waringantin, garam iruꞌ da bits isau agu. 20 Wauriꞌ da waruꞌ afa warangꞌ da warut ribarangan nafan. Da anungꞌ uda uwayant ampi bingan u, i dzi wat ribarangan iba.”

21 Da Petrus iruꞌ ifan da ini da garam iruꞌ da bits igi, “Garam aru agam saudan ugu da dzi arangan ani. Wain idzuwai da agam iba?”

22 Da ribarangan ini arangan nifunggan mungaꞌ ibiani, “Kornilius, garam suda gudzun i garam Rom singaari gan bida 100, arangan garam rururungan pumuꞌa Anutu da atangꞌa warangꞌ i Arangan. Da rib Yuda santan itsarif arangan. Da Anutu angira gan ini da arangan da iwat agai iba i uda agu fada arangan ungaran, da arangan isangꞌ i ringanta i nan idzuwai u bungꞌ ani da arangan.”

23 Da Petrus iyu ribarangan yatangꞌ ba ungar da impa tayangꞌ gin da idziang arigi.

Da gubuꞌ pisa maiꞌ da arangan yuriꞌ da irut garam iruꞌ da bits igi impruꞌ da rib muarutsan fain mpada Dzopa igi ifan. 24 Da gubuꞌ tipa pisan, da ribarangan ifawaꞌ Kaisaria. Da Kornilius inuꞌ gan utupan da gan rinun rusan fain impruꞌ ruan impai da ifangꞌ i ribarangan. 25 Gubuꞌ Petrus atangꞌa fadan, da Kornilius iba uts rutin da itatapuangꞌ iruꞌ intap imingꞌ Petrus fagan da itsarif arangan. 26 Da bitsintaꞌ Petrus iraꞌ i Kornilius iyab da ini da arangan, “Wamunti ayab. Dzi garam gar angu ibi agu.”

27 Gubuꞌ Petrus ruta arangan nida nan da yatangꞌ ifa ungar wasaꞌ igi da itsanga rib ampi bingan mpruꞌa ruan mpadan nigi. 28 Da arangan ini da ribigi, “Agam isruꞌ gin i aga rib Yuda nanggangꞌ faidagin ipaꞌ agai i aga anungꞌ isangꞌ i ruta garam utup fain mpadan u. Da bitsintaꞌ Anutu isantingꞌ dzi i dzi anungꞌ nida bida garam mangan mamida i sapan i Anutu maranggan u. 29 Ibinigi da gubuꞌ agam nuꞌa dzi, da dzi ba angu ruta nan maꞌan. Wain idzuwai da agam ini da dzi i dzi badan ani?”

30 Da Kornilius ini, “Gubuꞌ iruꞌ da bits ifa sib, da dzi mpa ungarangꞌ da dzi yugin da Anutu da gubuꞌ maran ibi 3 kilok nam nufan ibi arani. Da sung angu, da garam manga waꞌ da imunti dzi marangꞌ, da arangan nanggan atsufan igi iningining. 31 Da arangan ini da dzi, ‘Kornilius, Anutu iringant i u nanggam udagin sib da maran ifur u nanggam riman da rib sauda runggan. 32 Ibinigi da wawat garamam fain nafa Dzopa da nayu garam mangan binganggan Saimon, faringꞌa bida Petrus, da narut aba ani. Arangan impai imingꞌ garam mangan binganggan Saimon ungaran, garam aru nangan da umata i apu rini gangan da tipa nam fain gin. Da arangan ungaran imingꞌ uts da uruts ringan.’ 33 Ibinigi da dzi wat garam iruꞌ da bits igi ibiaꞌ sung angu i yuda agu bada ani. Da bini funub i u badan. Aruani da aga santan angu iba mpai impruꞌ ruangꞌ ani imingꞌ Anutu maranggan i ringanta i nan santan Nifutsarif nidan da agu i u nidan da agai.”

34 Da Petrus ini da ribarangan, “Arani da dzi sruꞌ i nan nidzun ibi Anutu iyu garam santan angu i sanampun bitsintaꞌ angu. 35 Da mingꞌa wasaꞌ i garam intap santan da Anutu iyu rib idzuwai atangꞌa warangꞌ i Arangan da nanga uwayant bini iyab. 36 Agam isruꞌ i nan Anutu riman da agai rib Israil. Arangan ifis i sisingꞌ bini ibi Yisu Kristus isu Nifutsarif i ampan santan da inang agi sangꞌ i ruta Anutu mpruꞌa wangun bitsintaꞌ. 37 Da agam isruꞌ gin ibinigi i nam tsiraꞌ waꞌa mingꞌa intap Yudia santan. Nam igi yuriꞌ imingꞌ intap Galili bampan i Yowanis fisa i Anutu nanggan i ampan parima i ruan da uda mpui ruruban. 38 Da agam isruꞌ gin i Anutu iraga Yisu, garam Nasaret ugu, i nanga Aranga guman, da irim Marapayam Mararam da nampang da Arangan. Da Yisu ifa gamp ampi bingan da inang nam bini ampi bingan, da inang rib santan mpada warangꞌ i Sadang nampanggan iwaꞌ bini, i wain, Anutu irut Arangan.

39 “Aga ni nan wasi i nam santan aga runggangꞌ tsanganda Yisu nanga mingꞌa Yerusalem da mingꞌa garam Yuda gampan santan. Ribarangan yis Arangan funub iyab gai mpara i ruan. 40 Da bitsintaꞌ gubuꞌ suda iruꞌ da bits, da Anutu itip iraꞌ i Arangan da imunti marataꞌ, da inang da Arangan iwaꞌ dzidziwan. 41 Anungꞌ iwaꞌ da ampan santan u, imaꞌ; iwaꞌ angu da agai aru Anutu tagada mungꞌ ugu i nida nan i nam waꞌan igi wasi. Da aga rut Yisu iga nam da inum bampan i Arangan tipa muntida marataꞌ sinungꞌ nam mampan. 42 Da Arangan ini nan bambafan da agai i aga fisa i sisingꞌ bini da ampan da nida nan wasi bida Anutu iraga Arangan i raruda rib rungꞌ mpada marataꞌ mpruꞌan da rib mampa sib. 43 Anutu profetan santan mungꞌ ugu ini nan wasi iyab i Arangan ibi rib santan aru muarutsa Arangan da Anutu bungꞌ asiat i nanggan maisan rai i Arangan binganggan.”

44 Da gubuꞌ Petrus rungꞌ fisa i nan, da Marapayam Mararam iruꞌ ba i ampan santan ringanta i nan igi. 45-46 Da rib muarutsan Yuda‡rib muarutsan Yuda — Nan mingꞌa papiar Grik da ibiani: ‘rib muarutsan safa i rinin ugu’, da nan ani iram iyab i rib muarutsan Yuda. ruta Petrus mingꞌa Dzopa badan igi iringant i rib muarutsan faꞌ igi nida nifu nan ruga rugan da tsarifa Anutu. Ibinigi da irunt fafun tsiraꞌ bingan i tsanganda Anutu rima Marapayam Mararam da ampan utup mangan mingꞌa manaꞌ i rib Yuda.

Da Petrus ini, 47 “Rib arani iyu Marapayam Mararam ibi agi udan ugu. Ibinigi da garam mangan wasangꞌ i paꞌa ribarangan i uda mpui ruruban u.”

48 Ibinigi da Petrus ini da rib muarutsan faꞌ igi i uda mpu ruruban i Yisu Kristus binganggan. Da gubuꞌ uda mpu ruruban sib da ribarangan igut i Petrus i ruta mpada gubuꞌ fain.