1 Da gubuꞌ arigi da Sol rungꞌ ini nan babampafan i wayada Nifutsarif Yisu riban atsungꞌa gin igi da isa funub. Ibinigi da aranga fatsanga garam pumuꞌa Anutu wain igi gudzunggan tsiraꞌ, 2 da igut i arangan, “Isangꞌ agu kakara papiar faingꞌ i dzi riman da garam gudzun gudzun mpada tayangꞌ rib Yuda ungaran mpruꞌa ruan gin bits bits mingꞌa Damaskus? Da bida dzi waꞌa da rib atsungꞌa Yisu Sanaban igi,Ap 19:23; 22:4 garam da sagat, da dzi bungꞌ asangꞌ i mpungan da dzura ribarangan da uda bada Yerusalem i raruda ribarangan.” 3 Da Sol ifa Damaskus da gubuꞌ fa suda uts, da sung angu nam puatsadan tsiraꞌ bingan imingꞌ gunungun iruꞌ ba da yari itsuafiꞌ arangan. 4 Da Sol iruaꞌ iruꞌ intap da iringant i nifun mangan ini da arangan ibiani, “Sol, Sol, ibubianungꞌ da u rim ipiap i dzi?”

5 Da Sol ini i nifunggan mungaꞌ ibiani, “Nifutsarif, agu wai igi?”

Da Arangan ini, “Dzi Yisu, aru u rima ipiap in igi. 6 Da bitsintaꞌ wauriꞌ da watangꞌ afa gamp tsiraꞌ Damaskus igi. Da garam mangan bungꞌ ani da agu i nam idzuwai u bungꞌ anang.” 7 Da rib ruta Sol badan igi imunti nifu mutut. Da ribarangan iringantin ibi garam mangan ini nan, da bitsintaꞌ ribarangan anungꞌ itsanga garam mangan u.

8 Sol imunti iyab da itaꞌ maran, da bitsintaꞌ arangan anungꞌ itsanga nam mangan u. Ibinigi da rib ruta Sol badan igi mpung aranga bangin da itaraꞌ arangan yatangꞌ ifa Damaskus. 9 Da gubuꞌ iruꞌ da bits ba fada sib, da arangan maran rugampam da anungꞌ iga nam mangan ma inum nam mangan u.

10 Da garam mangan atsungꞌa i Yisu impai imingꞌ Damaskus igi, binganggan Ananaias. Da itsanga nam mangan ibi nam puafuban. Da Nifutsarif Yisu ini da arangan ibiani, “Ananaias!”

Da Ananaias ini, “Nifutsarif, wani, dzi rungꞌ impai.”

11 Nifutsarif Yisu ini da Ananaias, “Wauriꞌ da wafa Yudas ungaran mingꞌa sanab faringꞌa bida Sanampun Rururungan. Da wagut i garam mangan binganggan Sol bada mingꞌa gamp Tarsus. Arangan rungꞌ iyugin da Anutu. 12 Arangan itsanga nam mangan ibi nam puafuban da itsanga garam mangan binganggan Ananaias iwaꞌ da arangan da irim bangin ragun i arangan i nanga i maran dauman da tipa tsanganda nam.”

13 Ananaias ini, “Nifutsarif, garam ampi bingan ini da dzi i garam arigi. Arangan inang uwayant maisan iyus i Agu ampanggam mararam mpada mingꞌa Yerusalem. 14 Da arangan iyu nan akaran nida nifun imingꞌ garam pumuꞌa Anutu wain gudzun rusan gin da iba Damaskus ani, i mpunga rib santan muarutsa Agu da dzuran.”

15 Da bitsintaꞌ Nifutsarif ini da Ananaias, “Wafan! I dzi raga garam arigi i nanga dzi gumangꞌ da kupisa dzi binganggangꞌ wasi da garam utup fain, mpruꞌan da gan king gan, da rib Israil bida nigi. 16 Dzi runggangꞌ bungꞌ asantingꞌ arangan i barabin da tsakia wayawai arangan buaringꞌa i Dzi binganggangꞌ.”

17 Ibinigi da Ananaias ifa Yudas ungaran da yatangꞌ ifa ungar wasaꞌ, da irim bangin iyab i Sol, da ini da arangan, “Dzi raingꞌ Sol, Nifutsarif Yisu aru waꞌan da agu i sanab u bada gin ugu itangin dzi iba da agu i u tipa tsanganda nam da Marapayam Mararam fungꞌa i agu.”

18 Gubuꞌ Ananaias nida nan igi sib, da sung angu nam bida yafas rini tsuafan ugu itus ruan da iruaꞌ sinungꞌ Sol maran, da arangan isangꞌ i tsanganda nam. Da arangan imunti iyab da iyu mpu ruruban. 19 Da iga nam da itip iyu riniurun faꞌ.

Da Sol irut rib Damaskus atsungꞌa i Yisu igi impa gubuꞌ fain. 20 Da sung angu arangan iraꞌ i gum nangan da fisa i nan bida Yisu igi Anutu Narunggan mingꞌa rib Yuda ungaran mpruꞌa ruan gin santan mingꞌa Damaskus igi. 21 Ampan santan iringanti i nan Sol fisa gin igi da irunt fafun tsiraꞌ bingan. Da ini da ruan, “Garam arigi da inang da ingaungꞌ rib muarutsa Yisu mpada Yerusalem. Arani da arangan iba Damaskus i tipa mpunga rib muarutsan i dzuran da uda fada Yerusalem da muntida garam pumuꞌa Anutu wain gudzun rusan maranggan.” 22 Da bitsintaꞌ Sol nanggan fisa gin igi nampanggan iyingꞌ isu tsiraꞌ. Da arangan idzuwar in da isantingꞌ wasi ibi Yisu igi Kristus, Garam Anutu Ragadan ugu. Ibinigi da rib Yuda mpada Damaskus igi anungꞌ isangꞌ i nida Sol nanggan mungaꞌ i rasudan u.

23 Gubuꞌ ampi bingan ifa sib da rib Yuda igi mpruꞌ ruan da yantung nan i isa Sol funub. 24 Da bitsintaꞌ Sol iringant i nan i nam ribarangan rantsan igi. Rib Yuda igi mpai da irim maran i gamp tsiraꞌ igi ntiangꞌ gan muantsi nifun gan santan isangꞌ idziang da gubuꞌ santan, i mpunga Sol da isa arangan funub.

25 Da bitsintaꞌ idziang mangan da Sol riban atsungꞌa gin irim arangan sib da itangin arangan iruꞌ ubing, da itangin ubing igi iwaꞌ parat mangan mingꞌa gamp tsiraꞌ igi ntiangꞌ gan, da itangin iruꞌ isiꞌ isiꞌ angu isangꞌ fawaꞌa da intap mingꞌa manaꞌ.

26 Sol itip ifa Yerusalem da yintsaꞌ i ruta Yisu riban atsungꞌa gin mpruꞌa ruan. Da bitsintaꞌ ribarangan santan irat i arangan da anungꞌ imuaruts ibi arangan iwaꞌ ibi Yisu garaman atsungꞌa gin mangan u. 27 Da bitsintaꞌ Barnabas iyu Sol ifan da aposel ruas da ini nan wasi da ribarangan ibi Sol itsanga Nifutsarif imingꞌ sanab fada Damaskus da Nifutsarif ini nan da arangan. Da Barnabas ini ibi Sol ifis i nan wasi i Yisu binganggan da ampan Damaskus ruta nam ratan maꞌan. 28 Ibinigi da Sol irut ribarangan impai da iyungꞌ wasaꞌ i gamp tsiraꞌ Yerusalem igi da ifis i Nifutsarif Yisu sisingꞌ bini gan wasi ruta nam ratan maꞌan. 29 Da irut rib Yuda nida nifu nan Grik ini nan da yudzungꞌ i nan da ruan. Da bitsintaꞌ ribarangan inang da isau sanab i isa arangan funub. 30 Da gubuꞌ rib muarutsan ringanta i nan igi, da iyu Sol iruꞌ ifa gamp Kaisaria da iwat arangan itip ifa gampan wain Tarsus.

31 Da mingꞌa gubuꞌ arigi da ampan muarutsan mpada sangꞌa intap Yudia, Galili da Samaria impa bini angu ruta barabin maꞌan da nanggan muarutsan iyingꞌ ibabampaf. Da irat i Nifutsarif da yatangꞌ warangꞌ gin, da Marapayam Mararam irim nugun nufan rutin. Da ampan muarutsan igi gudzunggan iyingꞌ isu tsiraꞌ.

32 Da Petrus inang da iyung ifa gamp rugan rugan. Da gubuꞌ mangan da arangan ifa gamp Lida i tsanganda rib muarutsan mpada nigi. 33 Mingꞌa nigi da arangan iwaꞌ da garam urungun gruꞌa ruan mangan binganggan Ainias, da gubuꞌ santan da inang da igingꞌ gan rabiꞌ gan angu isangꞌ udzuf 8. 34 Petrus ini da Ainias ibiani, “Yisu Kristus inang agu rininggam idaum! Ibinigi da wamunti wayab da waipingꞌ rabiꞌ gam gingꞌa gin igi.” Da sung angu da Ainias imunti iyab. 35 Ampan santan mpada gamp Lida igi da bump tsiraꞌ Saron mingꞌa uruts ringan igi santan itsanga ibi Ainias rininggan gingꞌan ugu idaum da ribarangan imuaruts Nifutsarif Yisu.

36 Mingꞌa gamp Dzopa da sagat mangan nangan da atsungꞌa i Yisu impai igi. Da arangan bingangan Tabita, da mingꞌa nifu nan Grik da ifaringꞌ ibi Dokas.*Da arangan bingangan Tabita, da mingꞌa nifu nan Grik da ifaringꞌ ibi Dokas — Bingan Dokas mingꞌa nifu nan Grik da bingan Tabita mingꞌa nifu nan Arameik wainggan ibi ‘gazel’. Gazel igi da apu mangan bida dia nangan da gada sai da apu ragiawan. Gubuꞌ santan da arangan inang da inang uwayant bini da irim rib sauda runggan sib i nam. 37 Da gubuꞌ arigi da arangan igingꞌ rinin tsiraꞌ bingan da imamp. Da rib fain yadzuꞌ arangan riniuriatsan da isintungꞌ arangan yatangꞌ ungar wasaꞌ mingꞌa yaba wagungꞌ.

38 Dzopa igi imingꞌ uts da gamp Lida. Ibinigi da gubuꞌ Yisu riban atsungꞌa gin ringanta gin bida Petrus bampada mingꞌa Lida, da ribarangan iwat garam iruꞌ ifan i nidan nan da arangan. Da ifa gampun runggan rutin da ini, “Waba Dzopa sung angu. ” 39 Da Petrus irut garam iruꞌ igi itip ifa Dzopa. Gubuꞌ ribarangan fawaꞌa ungar igi, da iyu arangan iyab ifa ungar wagungꞌ. Da sagat yaruf ampi bingan imunti itsuafiꞌ Petrus da irang. Da isantingꞌ arangan i ngarukui da nam atsufan fain Dokas tipan da gubuꞌ arangan rung ruta ribarangan mpadan ugu.

40 Da Petrus iwat rib santan igi iwaꞌ ifa manaꞌ. Da arangan yidzaꞌ faga gudzun da iyugin da Anutu. Da arangan yitam i ruan da irarab sagat mampan igi da ini binaꞌ, “Tabita, wauriꞌ wayab!” Da sagat igi maran itaꞌ. Da gubuꞌ arangan tsanganda Petrus, da arangan impai iyab. 41 Petrus impung arangan bangin da irim arangan sib i muntida yaban. Da arangan inuꞌ sagat yaruf yaruf igi impruꞌ da rib muarutsan fain igi i tipa atangꞌa ba ungar wasaꞌ igi. Da arangan isantingꞌ ribarangan i Tabita maran tipa taꞌan. 42 Da rib santan mpada Dzopa igi iringant i nam aru waꞌan igi, da rib ampi bingan imuaruts Nifutsarif. 43 Petrus impai imingꞌ Dzopa igi gubuꞌ ampi bingan. Arangan irut garam mangan binganggan Saimon impai igi, garam nangan da umata i apu rini gangan da tipa nam fain gin.