1 Gubuꞌ Apolos rungꞌ mpada Korint da Paulus iyung sanab mingꞌa mamai raiyi da iruꞌ ibawaꞌ Efesus. Mingꞌa nigi da arangan iwaꞌ da rib faꞌ faꞌ faingꞌ atsungꞌa i Yisu. 2 Da arangan igut i ribigi, “Agam iyu Marapayam Mararam da gubuꞌ agam muarutsan, ma imaꞌ?”

Da ribarangan ini, “Imaꞌ. Aga anungꞌ iringant i nan i Marapayam Mararam mangan mpadan u.”

3 Da Paulus igut i ribarangan ibiani, “Ibinigi da agam iyu mpui ruruban idzuwai igi?”

Da ribarangan ini, “Yowanis mpui ruruban gan.”

4 Da Paulus ini, “Yowanis mpui ruruban gan igi mpui ruruban parima i ruan. Da ini da ampan i muarutsa manga aru mingꞌa bampan ba i arangan, nigi Yisu.” 5 Ribigi ringanta i nan igi sib da iyu mpui ruruban i Nifutsarif Yisu binganggan. 6 Da Paulus irim bangin ragun i ribarangan, da Marapayam Mararam iba i ribarangan, da ribarangan ini nan i nifun nan mara maran da ini nan bada mingꞌa Anutu gin ibi profet ruas. 7 Garam igi santan gudzunggan isangꞌ ibi 12.

8 Da Paulus yatangꞌ rib Yuda ungaran mpruꞌa ruan gin igi da ini nan babampaf ruta nam ratan maꞌan da iraꞌ i ribigi uwayantan i Anutu nanggan mpada tayangꞌ gan garaman. Da arangan inang ibinigi isangꞌ ukam iru da bits. 9 Da bitsintaꞌ ribigi gan faingꞌ itsungin muantsi i wangunggan babampaf da ini nan maisan i Yisu Sanaban imingꞌ ampan maranggan. Ibinigi da Paulus iyu rib atsungꞌa i Yisu da itangin ungar mpruꞌa ruan igi rai. Gubuꞌ sib angu da Paulus irut rib fain ini nan babampaf i Yisu sisingꞌ bini gan imingꞌ Tiranus ungar papiaran. 10 Arangan inang ibinigi isangꞌ udzuf iruꞌrun da rib Yuda da Grik ampi bingan mpada mingꞌa provins Esia igi iringant i Nifutsarif nanggan.

11 Da Anutu inang nam maran mangan tsiraꞌ tsiraꞌ bingan mamida i nangan da waꞌan imingꞌ Paulus banginggan. 12 Ibinigi da ribigi iyu bruꞌ garam atsufa i manaꞌ i ngarukui i nanga gum rutin da bruꞌ tiasa mara-uwats gin igi, da irim i Paulus rinin da iyu ifan da irim i riban gingꞌa rinin igi rinin, da rinin idaum da marapayam maisan irunt sinungꞌ.

13 Rib Yuda faingꞌ nangan da yunga fada gamp gamp i daruda marapayam maisan yantsanga garam yintsaꞌ i daruda marapayam maisan yantsanga rib fain i Nifutsarif Yisu binganggan da ini, “Mingꞌa Yisu aru Paulus fisa i nanggan ugu binganggan, da dzi ni nan babampaf da agam i agam waꞌa ba.” 14 Garam Yuda garaman pumuꞌa Anutu wain gudzunggan mangan binganggan Skeva narun rusan marub marub 7 inang sanab arigi. 15 Gubuꞌ mangan da marapayam maisan ini ribarangan nifunggan mungaꞌ ini binaꞌ, “Dzi sruꞌ i Yisu da dzi sruꞌ i Paulus, da bitsintaꞌ agam wai igi?” 16 Da garam marapayam maisan yantsangan igi yatup iyab i ribarangan, da yis ribarangan fufunub angu, da irim biꞌ rutin da igari i ngarukui gan, da tuasarangan irunt ragidangunt iwaꞌ sinungꞌ ungar igi.

17 Da gubuꞌ garam Yuda da garam Grik mpada Efesus igi ringanta i nan i nam waꞌan igi, da tuasarangan irat funub angu da itsarif Nifutsarif Yisu binganggan. 18 Rib ampi bingan muarutsa sib iba da ini nanggan maisan nangan wasi imingꞌ ampan maran. 19 Da rib ampi bingan uda mirimp iyu papiaran kakara mirimp gin igi impruꞌ da ifanga imingꞌ ampan tsiraꞌ maran. Papiar igi santan nam ntsuman gan gudzunggan isangꞌ 50,000 moni silva. 20 I sanab bida nigi da Nifutsarif nanggan iyingꞌ isu maradzaꞌ ruta nampang.

21 Gubuꞌ nam santan igi waꞌa sib mingꞌa Efesus da Marapayam Mararam irim uwayant da Paulus da arangan irants uwayant i yunga wasaꞌ i provins Masedonia da Akaia da raiyi da musa fada Yerusalem. Da arangan ini, “Gubuꞌ dzi fawaꞌa Yerusalem sib da dzi nafan da natsanga gamp Rom nabinigi.” 22 Da arangan itangin riban rima sib iruꞌ, Timoti da Erastus, imungꞌ ifa Masedonia, da arangan impa gubuꞌ ruguntiꞌ pas imingꞌ gamp Efesus mingꞌa provins Esia.

23 Gubuꞌ arigi da garam faingꞌ irim ipiap i rib atsungꞌa Yisu SanabanAp 9:2; 22:4 da gagara da barabin tsiraꞌ iwaꞌ. 24 I wain ibiani, garam tipa nam i silva mangan binganggan Demitrius, arangan inang da itip anutu umpur sagat binganggan Atemis ungaran mararam maraganunggan i silva da irim gum ampi bingan da garam fain tipa nam i silva da ribigi inang da isub moni tsiraꞌ gin. 25 Da arangan inuꞌ ribigi impruꞌ da garam tipa nam faingꞌ bida nigi da ini rutin ibiani, “Raingꞌ ruas, agam isruꞌ gin i agi yu nam ntsuman tsiraꞌ i gum agi nangan ani. 26 Agam itsangan da iringantin sib i garam aru nida Paulus gin ugu yuntap i garam ampi bingan da iwaya i uwayantan da ini, ‘Anutu garam gar tipa i banginggan igi anungꞌ anutu nidzun u.’ Da arangan anungꞌ inang uwayant arigi i Efesus angu u. Imaꞌ. Pas angu i arangan uda provins Esia ani santan sib. 27 Garam igi nanggan nidan igi isangꞌ i wayada agi gumangꞌ suba moni gin ani binganggan bini, da nan igi isangꞌ i nanga anutu sagat Atemis ungaran mararam suda nam utaꞌ mingꞌa garam da sagat sib angu uwayantan. Da mangan ibiani, nan igi isangꞌ i rasuda anutu sagat tsiraꞌ Atemis, aru utup tsiraꞌ mingꞌa provins Esia da intap santan tsarifan ugu, binganggan tsiraꞌ.”

28 Gubuꞌ ribigi ringanta i nan igi da nugun iruaꞌ da iyaiꞌ nifun tsiraꞌ bingan ini binaꞌ, “Agi rib Efesus anutu gangꞌ Atemis, arangan tsiraꞌ bingan!” 29 Sung angu da gagara da ufuai tsiraꞌ iwaꞌ gamp igi da ribigi impung Gaius da Aristarkus, garam Masedonia iruꞌ atsungꞌa Paulus yungan ugu, da yuntap in ifa mumai mpruꞌa ruan da ringanta i nan gin. 30 Paulus ini fada i nida nan da ampan tsiraꞌ igi, da bitsintaꞌ, rib muarutsan igi anungꞌ itangin arangan ifan u. 31 Da Paulus rinun rusan faingꞌ mpada wasaꞌ i gabman Esia igi ibinigi itangin nan ifan da arangan da igampun ruan da arangan i anungꞌ fada mumai mpruꞌa ruan gin igi u.

32 Da ampan tsiraꞌ igi anungꞌ isruꞌ i nam idzuwai tuasaranga yaiꞌa gin u. Ibinigi da faingꞌ iyaiꞌ i nan mangan da faingꞌ iyaiꞌ i nan mangan, da ribarangan ampi bingan anungꞌ isruꞌ i wain idzuwai da tuasarangan iba mpruꞌ ruan nigi. 33 Da rib Yuda mingꞌa wasaꞌ i ampan tsiraꞌ igi yusu garam mangan binganggan Aleksander imungꞌ ifa miamun da ini da arangan i dzuwara i nam waꞌan igi wainggan. Da arangan iratsi bangin i ampan mpada isiꞌ angu i arangan ini nida nan bida rib Yuda igi anungꞌ inang asub u. 34 Da gubuꞌ ribigi sruꞌa gin bida arangan garam Yuda mangan, da santan iyaiꞌ isangꞌ ruan isangꞌ gubuꞌ maran bida awa iruꞌrun ibiani, “Agi rib Efesus anutu gangꞌ Atemis, arangan tsiraꞌ bingan!”

35 Garam gudzun mangan mpada tayangꞌ gamp igi imunti iyab da iratsi bangin, da ampan tsiraꞌ igi impai isiꞌ angu. Da arangan ini, “Agam garam Efesus, garam santan isruꞌ gin ibi gamp Efesus aruani impa tayangꞌ sagat anutu tsiraꞌ Atemis ungaran mararam da tauf mararam suda i maraganunggan aru ruaꞌa mingꞌa gunungun ruꞌa ba ugu. 36 Da nan nidzun arigi da manga wasangꞌ tungꞌa maran gin u; ibinigi da wampa isiꞌ angu ntuaꞌ da anungꞌ nanga nam manga sung sung ruta uwayant bini maꞌan u. 37 Agam iyu garam tuasarani iba ani, da bitsintaꞌ ribarangan anungꞌ iwap nam manga mingꞌ ungar mararam ma ini nan maisan mangan i agi anutu gaꞌ sagat ani u. 38 Bida Demitrius da garam ruta arangan tipa nam fain tsanganda asub i garam mangan, da nan rarudan rumingꞌ, da garam gudzun tsiraꞌ tsiraꞌ raruda nan rumpai. Ribarangan nafan da nampiꞌ runggan namingꞌ nan rarudan wasaꞌ. 39 Da bida nan faingꞌ rungꞌ mingꞌan, da agam watip da gubuꞌ nan tipan rururungan natsungꞌ agi nanggangꞌ faidagin. 40 I wain, agi mpa wasaꞌ i barabin i ufuai da nam yaiꞌa utaꞌ angu ruta wainggan maꞌan da aruani, da bida gabman tsiraꞌ ringanta i nan gin, da isangꞌ i raruda agi. Da agi wasangꞌ i nida nan manga gin u.” 41 Gubuꞌ arangan nida nan igi sib da itangin ampan igi ifan.