1 Raiyi da Paulus itangin Atens rai da ifa gamp tsiraꞌ Korint. 2 Mingꞌa nigi da arangan iwaꞌ da garam Yuda mangan binganggan Akwila, arangan gampan wain Pontus da gubuꞌ fain fada sib da arangan da fininggan Prisila imingꞌ gamp Rom mingꞌa intap Itali iba, i wain, Kaisar Klodius ini garam Yuda santan tanginda Rom rai da fada gamp faingꞌ. Da Paulus ifan da ribarangan, 3 da irut ribarangan impai da inang gum tipa ungar i apu rinin gangan*gum tipa ungar i apu rinin gangan — Ungar igi ibi ungar sel garam uda yunga gamp gamp i mpada gin, da itip i apu rini gangan da apu rini fufun. Da Paulus da Akwila da fininggan inang da itip ungar igi i apu rini gangan da irants da rib. i rantsan, i wain, rib iruꞌ igi inang da inang gum bida arangan nangan igi. 4 Da gubuꞌ Sabat sib angu da Paulus inang da yatangꞌ rib Yuda ungaran mpruꞌa ruan gin igi da ini nan babampaf i intsaꞌa i raꞌa i rib Yuda da Grik igi wangun i muarutsa Yisu.

5 Gubuꞌ Sailas da Timoti mingꞌa Masedonia bawaꞌan, da Paulus irim runggan santan i fisa i Anutu nanggan, da ini wasi da rib Yuda ibiani, “Yisu arigi Kristus, Garam Anutu Ragadan ugu.” 6 Da bitsintaꞌ rib Yuda ibugin i ringanta i arangan nanggan da ini nan maisan da irim ub i arangan. Ibinigi da arangan iratsi ngaruntsuaf mingꞌa aranga ngarukui gan i santingꞌa bida arangan iraraiꞌ i rungꞌ nida nan da ribigi, da ini ibiani, “Bida barabin waꞌan da agam, da imingꞌ agam banginggam, dzi adzuꞌ bangingꞌ i nigi. Gubuꞌ aruani da fadan da dzi bungꞌ afan da nafis i nan da garam utup faingꞌ.” 7 Da Paulus itangin rib Yuda ungaran mpruꞌa ruan gin igi rai da ifa garam mangan binganggan Titius Dzastus ungaran. Arangan anungꞌ garam Yuda, da bitsintaꞌ inang da yatsungꞌ rib Yuda sanaban pumuꞌa Anutu, da ungaran imingꞌ uts angu da rib Yuda ungaran mpruꞌa ruan gin. 8 Garam mangan binganggan Krispus, arangan isu gudzun i garam Yuda ungaran mpruꞌa ruan gin igi, da arangan irut gan riban mpada i ungaran imuaruts Nifutsarif. Da rib ampi bingan mingꞌa Korint igi iringant i Paulus nanggan fisa gin da imuaruts da iyu mpui ruruban.

9 Idziang mangan da Nifutsarif ini nan da Paulus i nam bida nam puafuban, da ini ibiani, “U anungꞌ ratan u. U rungꞌ wani nan igi wasi, da anungꞌ tsunginda nifum u. 10 I wain, Dzi rut agu, da garam mangan anungꞌ isangꞌ i tsarada bangin da wayada agu u, i Dzi ribangꞌ ampi bingan impa gamp aruani.” 11 Ibinigi da Paulus impa Korint isangꞌ udzuf mangan da ukam 6 da yutus i ribigi i Anutu nanggan.

12 Da bitsintaꞌ gubuꞌ Galio mpada bida gabman gudzunggan mingꞌa provins Akaia, da rib Yuda mpada mingꞌa Korint impruꞌ ruan da isu ufuai da Paulus da iyu arangan ifa mumai raruda nan gin da ini ibiani, 13 “Garam aruani iraꞌ ampan wangun i pumuꞌa Anutu i sanab faꞌ mangan isa nan faidagin udziꞌ.”

14 Paulus inang i nida ribigi nanggan mungaꞌ, da bitsintaꞌ Galio ini da ribigi ibiani, “Agam rib Yuda, bida garam aruani isa garam Rom nanggan faidagin udziꞌ ma bida arangan nanga asub tsiraꞌ mangan, da dzi sangꞌ i ringanta i agam. 15 Da bitsintaꞌ agam wangum ibarabin i nan gutagin da bingan da agam nanggam faidagin. Ibinigi da agam runggam wafan da watip nan arigi. Dzi bugin i raruda nan bida nigi!” 16 Da arangan ipaꞌ ribarangan rai iwaꞌ ifa sinungꞌ mumai raruda nan gin igi. 17 Ibinigi da ampi tsiraꞌ igi impung Sostenes, garam suda gudzun i rib Yuda ungaran mpruꞌa ruan gin, da yis arangan iruꞌ Galio maranggan uts da mumai raruda nan gin igi, da bitsintaꞌ Galio maran wafur nan manga gin u.

18 Paulus impa Korint igi gubuꞌ ampi bingan ifa sib raiyi da arangan itangin rib muarutsan igi rai da ifa gamp Senkria da iyu madzung i fada provins Siria. Prisila da Akwila irut arangan. Gubuꞌ arangan rungꞌ mpada Senkria da arangan intrap gudzun i santingꞌa bida arangan nanggan udzudan mangan mpruꞌan da Anutu mungꞌ ugu ibawaꞌ ampapan. 19 Ribarangan ifawaꞌ Efesus, da Paulus itangin Akwila da Prisila i nigi. Arangan runtaꞌ yatangꞌ rib Yuda ungaran mpruꞌa ruan gin da ini nan babampaf i ribigi muarutsa Yisu. 20 Da ribigi igut i arangan i mpada gubuꞌ ruguntiꞌ pas, da arangan ibugin. 21 Da bitsintaꞌ gubuꞌ arangan nanga i fadan da arangan ini ibiani, “Bida Anutu maran aridan da dzi bungꞌ atip naba.” Da arangan iyab i madzung da itangin Efesus rai. 22 Gubuꞌ Paulus fawaꞌa Kaisaria sib da arangan iyab Yerusalem da irim gubuꞌ wasaꞌ da ampan muarutsan. Ntsupa sib da arangan itip iruꞌ ifa gamp Antiok.

23 Paulus impa gubuꞌ fain imingꞌ Antiok sib da arangan ifa gamp gamp mingꞌa distrik Galesia da Frigia igi da inang rib atsungꞌa i Yisu mpadan igi nanggan muarutsan ibabampaf.

24 Garam Yuda mangan binganggan Apolos, gampan wain Aleksandria, iba mpa Efesus igi. Arangan garam nida nan bini da isruꞌ i Anutu nanggan kakaran bini funub da isangꞌ i fisa gin ruta nampang. 25 Rib fain yutus i arangan i Nifutsarif Yisu sanaban, da arangan inang da ifis i Yisu nanggan igi rururungan ruta riniawan da garam. Da bitsintaꞌ arangan isruꞌ i Yowanis nanggan ruruba garam angu. 26 Da arangan ifa rib Yuda ungaran mpruꞌa ruan gin igi da ifis i nan ruta nam ratan maꞌan. Gubuꞌ Akwila da Prisila ringanta i nan arangan fisa gin igi da iyu arangan ifa ringampa da idzuwar i Anutu sanaban igi rururungan nidzun da arangan.

27 Gubuꞌ Apolos nida fada provins Akaia da rib muarutsan mpada Efesus igi ifai nan i arangan da ikakar papiar mangan ifan da rib atsungꞌa i Yisu mpada Akaia igi i uda arangan. Gubuꞌ arangan fawaꞌan da irim rib muarutsa Yisu yaba i Anutu maraampi gan igi sib iyus. 28 I arangan inang da imunti ampan maran da ifis i nan babampaf i rasuda nan asub rib Yuda nida yaba i Yisu. Da arangan ifis i nan mingꞌa Anutu nanggan kakaran i santingꞌa wasi bida Yisu igi Kristus, Garam Anutu Ragadan ugu igi.