1 Gubuꞌ gagara da ufuai tsiraꞌ igi ntsupa sib, da Paulus inuꞌ rib muarutsa Yisu igi impruꞌ da ifai nan gin sib da itangin ribarangan rai da ifa provins Masedonia. 2 Arangan iyung gamp gamp mingꞌa provins Masedonia igi ifan da ifai nan iyus i rib muarutsan mpadan igi i nanga i nanggan muarutsan babampafan, da raiyi da arangan ifawaꞌ intap Grik. 3 Arangan impa ukam iruꞌ da bits imingꞌ igi. Arangan inang i uda madzung i fada provins Siria, da bitsintaꞌ iringant i nan ibi rib Yuda fain yudzu nan i isa arangan funub, ibinigi da aranga itip iyung ifa wasaꞌ i provins Masedonia. 4 Da arangan irut Pirus narunggan Sopater, garam Beria, Aristakus da Sekundus garam Tesalonaika, da Gaius garam Derbe, da Tikikus da Trofimus garam provins Esia, da Timoti. 5 Garam tuasarigi imungꞌ da ifangꞌ i agai imingꞌ gamp Troas. 6 Gubuꞌ nam gadan tsiraꞌ faringꞌa bida Bret Yist Maꞌa Gin igi ntsupa sib, raiyi da aga yu madzung da itangin gamp Filipai igi rai, da gubuꞌ 5 ifa sib da aga fawaꞌ da ribigi imingꞌ gamp Troas, da aga mpai igi isangꞌ gubuꞌ 7.

7 Suntai arigi gubuꞌ gan miamun da aga mpruꞌ ruangꞌ i branga bret da gada nam.*branga bret da gada nam — Garam gudzupuꞌ ampi bingan maran ifur ibi ampan muarutsan mungꞌ ugu inang da impruꞌ ruan gada nam sib raiyi da imus gada pasaꞌ. Mingꞌa nifun nan Grik da nan ‘branga bret’ ibuafir sanab gada nam da gada pasaꞌ. Watsanga Ap 2:42; 20:11 nabinigi. Da Paulus maran ifur i tipa yungan da maiꞌ, ibinigi da arangan ini nan gubuꞌ maran guntiꞌ bingan da rib muarutsan mpadan nigi isangꞌ mpas yatup. 8 Mumai aga mpruꞌa ruangꞌ gin igi imingꞌ iyab wagungꞌ da rampi ampi bingan rungꞌ ipuatsa igi. 9 Mamaꞌ marub mangan binganggan Yutikus impa ifa muantsi isiꞌ uda dzidzaꞌ gin igi ringampa gan da maran itatapruꞌ i gingꞌan. Da gubuꞌ aranga gingꞌa marampruꞌ funub da arangan iruaꞌ ungar igi mumai gan mpada gin suda iruꞌ da bits gin mingꞌa wagungꞌ iruꞌ ba intap warangꞌ. Da rib fain iruꞌ da iyu arangan, da bitsintaꞌ arangan imamp sib. 10 Paulus iruꞌ da igingꞌ ragun i mamaꞌ marub igi da yarimp arangan da ini da ribigi, “Agam anungꞌ runtaꞌ fafun u, arangan maran itip itaꞌ.” 11 Da Paulus itip iyab ungar wagungꞌ da irut ribigi ibrang bret da iga nam.Ap 2:42; 20:7 Da arangan ini nan da rib muarutsan igi isangꞌ gubuꞌ ipis da itangin ribigi rai da ifan. 12 Da mamaꞌ marub igi impa marataꞌ da ribigi irut ifa ungar ruta nugun nufan.

13 Da aga yab i madzung ifa gamp Asos i uda Paulus mingꞌa nigi. Arangan runggan itip sanab ibinigi, i wain, arangan ini yunga i fagan. 14 Gubuꞌ arangan waꞌan da agai i Asos da aga rut aranga yab i madzung ifa gamp Mitilini. 15 Pisa maiꞌ da aga fa uts da intap isiꞌ Kios, pisa fada maiꞌ da aga fawaꞌ intap isiꞌ Samos, da maiꞌ gan da aga fawaꞌ gamp Miletus. 16 Paulus maran ifur i runta yusa gamp Efesus da fada rururungan Miletus, i wain, arangan ibugin i mpada gubuꞌ guntiꞌ mingꞌa provins Esia, i arangan ini fada sung i waꞌa Yerusalem i tsanganda garam Yuda gubuꞌ gan tsiraꞌ faringꞌa bida Pentikos gin.

17 Mingꞌa Miletus da Paulus itangin nan ifan i rib muarutsan Efesus garam gudzun rusan bada i tsanganda arangan. 18 Gubuꞌ tuasarangan bawaꞌan, da arangan ini da ribarangan, “Agam isruꞌ i dzi uwayantangꞌ da nanggangꞌ mpadan da gubuꞌ miamun aru dzi atangꞌa ba provins Esia, da gubuꞌ santan aru dzi ruta agam mpadan ugu. 19 Dzi pumuꞌ Nifutsarif ruta sanab rasuda runggangꞌ da maragurun da nam intsaꞌan ampi bingan waꞌa i dzi yaba i rib Yuda nanggan udzudan. 20 Da dzi anungꞌ irat i nida Anutu nanggan nidzun wasi sangꞌa i rima agam sib igi da fisa i nan igi mingꞌa ampan maran ma mingꞌa muantsi muantsi u. 21 Dzi ni nan babampafan wasi da garam Yuda da garam Grik i parima i ruan fadan da Anutu da muarutsa agi Nifutsarifangꞌ Yisu.

22 “Waringantin! Aruani da Marapayam yusu dzi da dzi fa Yerusalem, da dzi anungꞌ isruꞌ i nam idzuwai bungꞌ awaꞌ da dzi namingꞌ aga. 23 Da bitsintaꞌ dzi sruꞌ gin i gamp santan dzi fada gin da Marapayam Mararam ini nan babampaf da dzi ibi karabus da barabin ampi bingan ifangꞌ i dzi.

24 “Da bitsintaꞌ dzi marangꞌ wafur nam mpada marataꞌ mingꞌa intap ani ibi nam nidzun mangan da dzi u; dzi uwayantangꞌ ibiani, dzi ni ntsupa sanab dzi runta gin da gum aru Nifutsarif Yisu riman da dzi i fisa i sisingꞌ bini i Anutu maraampi gan wasi.

25 “Waringantin! Aruani da dzi sruꞌ gin ibi agam tuasaru dzi mpada wasaꞌ gin da fisa i Anutu nanggan mpada tayangꞌ gan garaman rutin ugu wasangꞌ i tipa tsanganda dzi u. 26 Ibinigi da dzi ni nida nan wasi da agam bida ani, bida agam gam bits bida mamida i uda nam mpada maran taꞌan da nigi anungꞌ dzi asubangꞌ igi u. 27 I wain, dzi anungꞌ irat i fisa i Anutu uwayantan santan wasi da agam u. 28 Da agam watsanga runggam sib nampruꞌ da Anutu ampanggan santan aru Arangan suba i runggan Narunggan biꞌ gan. Marapayam Mararam itaga agam i suda gudzun gin da mpada tayangꞌ gin bida garam mpada tayangꞌ dumpa. 29 Dzi sruꞌ gin ibi dzi fada sib da iyam buman maisan bungꞌ aba wasaꞌ i agam da nawaya dumpa. 30 Da agam garamam faingꞌ ibinigi bungꞌ auriꞌ wasaꞌ i agam da nani nan umpur i untapa i rib muarutsan fada i atsungꞌa gin. 31 Ibinigi da wadamangꞌ ruam da anungꞌ gingꞌan u! Maram wafur i udzuf iruꞌ da bits da dzi anungꞌ impa asap i faida nan i agam gubuꞌ da idziang sib angu ruta maragurun.

32 “Aruani da dzi tangin agam ifa Anutu banginggan da gan maraampi gan. Maraampi gan igi isangꞌ i rima riniurun da agam nanggam muarutsan da nanga agam uda nam bini bini santan Anutu ragadan i riman da rib santan aru Arangan runggan piriangꞌan i suda i nanggan mararam.

33 “Dzi anungꞌ yafi ungꞌ i garam manga silva gan ma gol gan ma nanggan atsufan u. 34 Agam runggam isruꞌ gin sib i dzi banginggangꞌ inang gum i rima runggangꞌ sib da rima rib ruta dzi mpada mpruꞌa bida nigi. 35 Wasaꞌ i nam santan dzi nangan igi, da dzi santingꞌ agam i sanab nanga gum babampaf bida nigi da agi narim rib riniurun maꞌan sib. Da agi marangꞌ nafur agi Nifutsarifangꞌ Yisu nanggan nida bida, ‘Garam rima nam nanggan nugun tsiaꞌan iyus garam uda nam nanggan nugun tsiaꞌan.’ ”

36 Gubuꞌ Paulus nida nan da ribarangan sib da idzaꞌ faga gudzun iruꞌ da iyugin impruꞌ da ribarangan santan. 37 Da santan igi irang da impung arangan da itsutsuf. 38 Ribarangan wangun ibarabin iyus, i wain, Paulus ini tuasarangan wasangꞌ i tipa tsanganda arangan u. Da irut arangan iyung ifa madzung.