1 Gubuꞌ Sol tsanganda garam gudzun gudzun igi isa Stiven funub, da aranga maran ifur ibi nigi iwaꞌ bini i arangan maranggan.

Gubuꞌ aru Stiven mampan igi, da rib Yuda fain inang maisan tsiraꞌ bingan i rib muarutsan santan mpada mingꞌa Yerusalem igi. Ibinigi da rib muarutsan igi itangin Yerusalem igi rai da idzarang ifa gamp gamp imingꞌ intap Yudia da Samaria. Da aposel ruas angu rumpai imingꞌ Yerusalem igi. 2 Da garam fain atsungꞌa Anutu sanaban mararam idzufungꞌ Stiven riniuriatsan, da irang igampun ruan tsiraꞌ bingan. 3 Da bitsintaꞌ Sol ini wayada ampan muarutsan igi da irim barabin tsiraꞌ gin. Da aranga fa rib muarutsan igi ungar ungaran, da impung garam da sagat impruꞌ, da itangin yatangꞌ karabus.

4 Da rib muarutsan aru tanginda Yerusalem rai da dzaranga fada gamp gamp ugu ifis i sisingꞌ bini imingꞌ gamp ribaranga mpada gin igi. 5 FilipFilip Ap 6:5 iruꞌ ifa gamp mangan mingꞌa intap Samaria da ifis i Kristus sisingꞌ bini gan da rib gamp igi. 6 Da ampi tsiraꞌ iringant i nan Filip fisa gin igi da itsanga nam maran mangan santingꞌa bida Anutu ruta arangan. Ibinigi da ribarangan santan iyu uwayant bitsintaꞌ da irim ringan i arangan nanggan fisa gin igi bini angu. 7 Da Filip iwat marapayam maisan iwaꞌ ifa sinungꞌ rib ampi bingan. Da gubuꞌ waꞌa sinungꞌ ribarangan, da iyaiꞌ nifun tsiraꞌ bingan. Da Filip inang rib ampi bingan urungun gruꞌa ruan da fagan agadan rinin idaum. 8 Ibinigi da rib santan mpada mingꞌa gamp igi nugun itsiaꞌ tsiraꞌ bingan.

9 Garam mangan binganggan Saimon impai gamp tsiraꞌ igi. Da gubuꞌ guntiꞌ bingan da arangan inang da isantingꞌ nampanggan i mirimp maran maran. Da rib Samaria igi santan irunt fafun i nam arangan nangan igi. Da Saimon itsarif ruan ibi arangan garam nifutsarif mangan. 10 Da ampan santan mpada gamp igi, tsiraꞌ da isiꞌ, irim uwayantan santan i ringanta i Saimon nanggan igi da ini, “Garam arani isangꞌ nampang bada mingꞌa Anutu gin faringꞌa bida ‘Nampang Tsiraꞌ’.” 11 Da ribarangan irim uwayantan santan i ringanta i aranga nanggan igi, i wain ibi gubuꞌ guntiꞌ bingan da ribarangan irunt fafun i tsanganda mirimp maran maran arangan nangan i santingꞌa nampanggan.

12 Da bitsintaꞌ Filip ifis i sisingꞌ bini i Anutu nanggan mpada tayangꞌ gan garaman da Yisu igi Kristus, Garam Anutu Ragadan ugu. Ibinigi da garam da sagat ampi bingan imuaruts Filip nanggan fisa gin igi da iyu mpu ruruban. 13 Da Saimon runggan ibinigi imuaruts Filip nanggan igi da iyu mpu ruruban. Da impa uts da Filip da irut iyung, da itsanga Filip nanga nam maran mangan tsiraꞌ tsiraꞌ santingꞌa Anutu nampanggan da irunt fafun gin.

14 Gubuꞌ aposel ruas mpada Yerusalem ringanta i rib Samaria igi muarutsa Anutu nanggan igi, da iwat Petrus da Yowanis ifa Samaria. 15 Gubuꞌ rib iruꞌ igi fawaꞌa Samaria, da yugin i rib faꞌ bungꞌ muarutsan igi i Anutu rima Marapayam Mararam da ribarangan, 16 i wain, Marapayam Mararam anungꞌ iwarip iba i ribarangan u. Ribarangan iyu mpu ruruban i Nifutsarif Yisu binganggan angu. 17 Da Petrus da Yowanis irim bangin ragun i rib muarutsan igi bits bits da ribarangan iyu Marapayam Mararam.

18 Da gubuꞌ Saimon tsanganda Anutu rima Marapayam Mararam da ampan igi da gubuꞌ Petrus da Yowanis rima bangin ragun i ribarangan, da arangan ini da Petrus da Yowanis ibiani, “Nani da agam moni gam pas. 19 Da warim nampang bida agam gin igi da dzi nampruꞌ, i rib idzuwai dzi rima bangingꞌ ragun gin bungꞌ ayu Marapayam Mararam.”

20 Da Petrus ini Saimon nifunggan mungaꞌ ibiani, “Anutu bungꞌ awaya agu da u moni gam nabinigi, i wain, u maram ifur ibi agu sangꞌ i rima nam ntsuman igi i uda nam Anutu runtaꞌ angu riman! Uwayant bida nigi irunt intiꞌ! 21 U wangunggam anungꞌ irururung imingꞌ Anutu maranggan. Ibinigi da u wasangꞌ i ruta agai nanga gum Anutu riman da agai ani u. 22 Waparim i ruam sinungꞌ uwayantam maisan igi da waugin da Nifutsarif i siata u uwayantam maisan mingꞌa u wangunggam igi rai. Da mabi Arangan bungꞌ asiat u nanggam maisan rai. 23 Dzi tsanga ibi agu anungꞌ irim wangunggam santan da Anutu, da nigi iwaꞌ ibi nam ngkiangan mangan mingꞌa u wangunggam da inang agu waꞌ ibi nam maisan mamaꞌ guman utaꞌ.”

24 Ida Saimon igampun runggan da Petrus da Yowanis da ini, “Agam waugin da Nifutsarif i dzi, i nam maisan agam nidan igi anungꞌ waꞌa i dzi u.”

25 Gubuꞌ Petrus da Yowanis nida nan wasi da fisa i Nifutsarif Yisu nanggan da ampan santan igi sib, da ribarangan itangin gamp igi rai da itip ifa Yerusalem. Da mingꞌa sanab fadan, da ribarangan ifis i sisingꞌ bini da rib mpada gamp isiꞌ isiꞌ ampi bingan mingꞌa intap Samaria igi.

26 Da Nifutsarif angira gan mangan ini da Filip ibiani, “Wauriꞌ da wafa wabi fiꞌ da wafa sanampun tanginda Yerusalem rai da ruꞌa mingꞌa nam manaꞌ dadauntan fada gamp Gadza.” 27 Ibinigi da Filip yuriꞌ da ifan. Da gubuꞌ arangan rungꞌ mingꞌa sanab igi fadan, da arangan iwaꞌ da garam Itiopia mangan. Garam igi isu gudzun i rib Itiopia kwin gan, ma “Kandasi” gan, ungaran ufuma nam bunumpan gin. Da arangan garam mangan rib itsuai arangan sib. Da garam igi ifa Yerusalem sib i tsarifa Anutu, 28 da arani da itip ifa gampan da impa iyab karisan kausiꞌ untapa gin. Da ifaris nan mingꞌa papiar profet Aisaia kakaran ugu. 29 Da Marapayam Mararam ini da Filip ibiani, “Wafa uts da karis aga da wayung ringampa gin.”

30 Ibinigi da Filip irunt ifa uts da karis igi da iringant i garam igi farisa nan mingꞌa papiar profet Aisaia kakaran igi. Da Filip igut in, “Nan agu faringꞌan igi wainggan idzidziwan da agu, ma imaꞌ?”

31 Da garam igi ini nifun mungaꞌ ibiani, “Bida garam mangan mamida i dzuwara i nan ani wainggan da dzi, da dzi nabu sruꞌ gin nabianungꞌ? Wayab ba da warut dzi nampai karis ani.”

32 Da garam gudzun igi ifaringꞌ nan mingꞌa Aisaia papiaran kakaran nida bida ani:

34 Da garam gudzun igi ini da Filip, “Dzi ni guta i agu, profet ini mangan igi? Ini nan ani iyab i runggan ma garam mangan?” 35 Ibinigi da Filip iyu nan Aisaia kakaran igi isu miamun, impruꞌ da Anutu nanggan kakaran fain, da ifis i Yisu sisingꞌ bini gan da arangan.

36 Gubuꞌ ribarangan rungꞌ runta sanab fadan, da ribarangan iwaꞌ mumang mangan mpui mingꞌa gin. Da garam gudzun igi ini da Filip ibiani, “Watsangan! Mpui ani. Nam manga rumamingꞌ i tsunginda sanab i dzi yuda mpui ruruban, ma?” 37 *Garam gudzupuꞌ fain maran ifur ibi nan fain imingꞌ ampap ani impruꞌ ibiani: ‘Filip ini da garam igi, “Dzi bungꞌ arurub agu bida agu muarutsa nidzun i u wangunggam.’’ Da garam igi ini Filip nifunggan mungaꞌ ibiani, “Dzi muaruts ibi Yisus Kristus igi Anutu narunggan.” ’

38 Da garam gudzun igi ini da garam mpunga bruꞌ kausi igi gan i antungꞌan. Da ribarangan yantungꞌ, da arangan irut Filip iruꞌ ifa mpui, da Filip irurub arangan. 39 Da gubuꞌ ribarangan mpruꞌa ruan uriꞌa yaba ba sinungꞌ mpui, da sung angu da Nifutsarif Marapayaman Mararam iyu Filip sinungꞌ mumang igi. Da garam gudzun igi anungꞌ itip itsanga Filip u, da arangan nugun itsiaꞌ tsiraꞌ bingan da ifa gan sanaban nida fada gin igi. 40 Da Filip itsangan ibi arangan iwaꞌ gamp tsiraꞌ mangan nida Asdot†Asdot — ma Adzotus, mingꞌa nifu nan Grik in. Mingꞌa nigi da arangan ifa gamp santan da ifis i sisingꞌ bini iyab i Yisu igi da ampan ifa isangꞌ aranga fawaꞌa gamp tsiraꞌ Kaisaria.