1 Miamun bingan da Nan imingꞌ mungꞌ. Da Nan igi irut Anutu. Da Nan arangan Anutu. 2 Da Arangan irut Anutu impai miamun bingan. 3 I Arangan angu da Anutu itangin nam sib angu, da Anutu watangin nam mangan tangindan ugu sinungꞌ Arangan u. 4 Da Arangan isu nam maran taꞌan wainggan, da nam maran taꞌan igi irim nam puatsadan da garam gar. 5 Da nam puatsadan igi yari imingꞌ nam mimin wasaꞌ, da nam mimin warasu u.*nam mimin warasu u — Da garam mararuru fain maran ifur nan ani wainggan ibiani, ‘nam mimin wadzidziwan gin u.’

6 Da Anutu itangin garam mangan iba, arangan binganggan Yowanis. 7 Arangan iba i nida nam puatsadan igi wainggan wasi, i rib santan angu muarutsan. 8 Arangan runggan wasu nam puatsadan igi u, imaꞌ. Arangan imungꞌ ba i kupisa nam puatsadan igi wainggan. 9 Da nam puatsadan nidzun aru arida wasi i garam santan iba intap.

10 I Arangan angu da Anutu itangin intap mungꞌ, da Arangan iba mpa intap, da bitsintaꞌ garam intap wasruꞌ i Arangan garam idzuwai igi u. 11 Arangan ibawaꞌ gan intapan sib, da bitsintaꞌ gan utupan wain igi anungꞌ yis yaring i Arangan da iyu iyab u. 12 Da bitsintaꞌ rib uda Arangan yaban da muarutsan, da Arangan inang da ribigi isu Anutu narun rusan. 13 Ribigi anungꞌ isu Anutu narun rusan i garam da sagat wangunggan uda ruan ma garam gar uwayantan ma biꞌ gan u, imaꞌ. Anutu runggan inang ribigi isu i narun rusan.1Yn 2:29; 3:9; 4:7; 5:1,4,18

14 Nan arangan isu garam gar da impa wasaꞌ i agai†impa wasaꞌ i agai — ma ‘Nan arangan isu garam gar da impa wasaꞌ i agi.’ Nan ani mingꞌa nifu nan Grik ibuafir wain iruꞌ — agai da agi.. Da aga tsangan i nampanggan da binganggan tsiraꞌ isangꞌ Narun yampi bitsintaꞌ angu mingꞌa Raman gin badan. Da Arangan garam maraampi da nan nidzun wain. 15 Yowanis ini Arangan wasi da inuꞌ ibiani, “Garam arani garam aru dzi nidan ugu, ‘Garam atsungꞌa dzi ba isu miamun i dzi, i Arangan impa ratar bingan miamun, raiyi da dzi mus waꞌan.’ ” 16 I Arangan maraampi gan ntidan ntingan angu da ifinti agi santan i nam bini bini maiꞌ maiꞌ. 17 Anutu irim nan faidagin i Moses banginggan da maraampi da nan nidzun iwaꞌ imingꞌ Yisu Kristus gin. 18 Garam mangan anungꞌ iwarip itsanga Anutu u, imaꞌ. Narun yampi bitsintaꞌ aru runggan Anutu mpada uts da Raman, Arangan angu isantingꞌ Anutu wasi.

19 Nani Yowanis nan gan nida wasi da gubuꞌ garam Yuda garam gudzun gan mpada Yerusalem tanginda garam pumuꞌa Anutu da garam rima gum sib mingꞌa Ungar Mararam‡garam rima gum sib mingꞌa Ungar Mararam —ma garam Liwai fain fadan da Yowanis i guta gin i arangan wai. 20 Yowanis anungꞌ idzigin nan mangan u, imaꞌ. Iragi runggan dzidziwandan wasi angu da ribarangan ibiani, “Dzi wasu Kristus, Garam Anutu ragadan igi u.”

21 Da ribarangan itip igutin ibiani, “Da agu wai? Agu Eliya?”

Da arangan ini binaꞌ, “Dzi wayu.”

“Da mani agu profet aga rima marangꞌ gin ugu,Lo 18:15,18-19; Ywn 1:25 ma?”

Da arangan ini, “Imaꞌ.”

22 “Da agu wai? Wani da agai, i aga fanida nan mungaꞌ da garam tanginda aga badan aga. U buni ibianungꞌ i runggam?”

23 Da Yowanis ini, “Dzi su nifun mangan nuꞌa mingꞌa nam manaꞌ dadauntan bida ani, ‘Watip Nifutsarif sanaban narururungꞌ,’ isangꞌ profet Aisaia nidan ugu.”Ais 40:3; Mt 3:3; Mk 1:3; Lk 3:4

24 Da rib aru tanginda garam badan ugu da rib Farisai§Farisai — Rib Farisai igi da garam Yuda utupan tsiraꞌ mangan mpada tayangꞌ sanaban tsarifa Anutu. Da nan gan fisa gin ini garam Yuda atsungꞌa Moses Nanggan Faidagin mpruꞌa da tafan rusan uwayantan ugu rururungan angu. Ibinigi da ribarangan itsarif runggan da iraru rib mamida atsungꞌa ribarangan sanaban. Bingan Farisai igi wainggan ibi ‘rib mamida ruta rib fain mpruꞌa ruan.’ igi. 25 Da ribarangan itip igut i Yowanis ini binaꞌ, “Bida agu anungꞌ Kristus ma Eliya ma profet igi, da ibianungꞌ da agu rurub garam?”

26 Yowanis ini ribigi nan gan mungaꞌ ibiani, “Dzi rurub garam i mpui, da bitsintaꞌ garam mangan impa wasaꞌ i agam da agam wafaringꞌ u. 27 Arangan garam atsungꞌa dzi ba. Da dzi wadaum i piraꞌa fufuai i Arangan faga gangkang gan u.”Mt 3:11; Mk 1:7-8; Lk 3:16; Ap 1:5; 11:16; 13:25 28 Nam santan igi iwaꞌ imingꞌ Betani imingꞌ mpui Yordan marafain gan mingꞌa gubuꞌ yaban, aru Yowanis ruruba garam gin ugu.

29 Maiꞌ mangan da Yowanis itsanga Yisu yunga badan da arangan, da ini binaꞌ, “Agam watsangan, Anutu Dumpa Narun gan aru siata garam intap nanggan maisan rai Arangan igi! 30 Garam arani garam aru dzi nidan ugu, ‘Garam atsungꞌa dzi ba isu miamun i dzi, i Arangan impa ratar bingan miamun, raiyi da dzi mus waꞌan.’ 31 Dzi runggangꞌ anungꞌ isruꞌ i Arangan garam arangan igi u, da bitsintaꞌ dzi ba rurub garam i mpui, i wainggan ibi kupisa Arangan wasi da garam Israil.” 32 Da Yowanis itip ini nan wasi ibiani, “Dzi tsanga Marapayam Mararam isu busir maran imingꞌ gunungun iruꞌ ibampa iyab i Arangan.Mt 3:16-17; Mk 1:10-11; Lk 3:21-22 33 Dzi runggangꞌ anungꞌ isruꞌ i Arangan garam arangan igi u, da bitsintaꞌ Anutu aru tanginda dzi badan i ruruba garam i mpui ugu ini wasi da dzi ibiani, ‘Gubuꞌ u tsanganda garam aru Marapayam Mararam ruꞌa bampada yaba gin, da Arangan garam ruruba garam i Marapayam Mararam arigi.’ 34 Da dzi runggangꞌ itsangan sib da ini wasi da agam i Anutu Narunggan Arangan igi.”

35 Da tipa pisa maiꞌ mangan da Yowanis itip imunti nigi da riban atsungꞌa gin iruꞌrun imunti impruꞌ da arangan. 36 Da gubuꞌ arangan tsanganda Yisu bayunga fadan da ini ibiani, “Watsangan i! Anutu Dumpa Narun gan igi!” 37 Da Yowanis riban iruꞌ igi iringant i nan arangan nidan da yatsungꞌ Yisu. 38 Gubuꞌ Yisu taningꞌan da tsanganda rib iruꞌ igi atsungꞌa Arangan, da igutin ini binaꞌ, “Agam isau nam idzuwai?”

Da rib iruꞌ igi ini Arangan nifunggan mungaꞌ ibiani, “Rabai” (wainggan ibi ‘Kidungwaga’), “u mpa anungꞌ?”

39 Da Yisu ini, “Waba ntuaꞌ da agam bungꞌ atsangan.” Ibinigi da tuas arangan ifan da itsangan Yisu gan mpada gin. Da gubuꞌ arigi da tuas arangan irut Arangan impai, i gubuꞌ maran ibi 4 kilok nam nufan sib.

40 Garam iruꞌrun ringanta i Yowanis nan gan da atsungꞌa Yisu igi gan bits Andru, Saimon Petrus rainggan. 41 Gubuꞌ arangan tanginda Yisu rai da ifa rururungan da iwaꞌ da rainggan Saimon da ini rutin ibiani, “Aga tsanga Mesia sib wa.” (Bingan Mesia isangꞌ Kristus, da wainggan ibiani, ‘Garam Anutu ragadan’.) 42 Da Andru iyu rainggan ifan da Yisu. Yisu irarab arangan da ini binaꞌ, “Agu Saimon, Yowanis narunggan, da nafaringꞌ agu Sifas.” (Bingan Sifas isangꞌ bingan Petrus, da wainggan ibiani, ‘tauf’.)

43 Maiꞌ mangan da Yisu maran ifur i fada intap Galili. Da Arangan ifawaꞌ da Filip da ini rutin ini binaꞌ, “Watsungꞌ dzi.” 44 Filip igi garam gamp Betsaida, Andru da Petrus gampan wain ibinigi. 45 Filip ifawaꞌ da Natanail da ini rutin ibiani, “Aga waꞌ da garam Moses kakara nan gin mungꞌ mingꞌa wasaꞌ i Nan Faidagin da profet ruas bida nigi kakara nan gin ugu. Arangan Yisu, garam Nasaret, Yosef narunggan.”

46 Natanail igutin, “Gamp Nasaret? Nam bini idzuwai igi isangꞌ i waꞌa nigi ba?”

Da Filip ini, “Waba angu da watsangan.”

47 Gubuꞌ Yisu tsanganda Natanail yunga badan da ini ibiani i arangan, “Watsangan! Garam Israil nidzun mangan igi, nan umpur imaꞌ i gan wangunggan.”

48 Natanail igutin ini binaꞌ, “U busruꞌ i dzi ibianungꞌ?”

Da Yisu ini, “Dzi tsanga agu mungꞌ gubuꞌ aru u mpada yaung gai fik warangꞌ, da Filip imus nuꞌa agu.”

49 Natanail ini nan mungaꞌ ini binaꞌ, “Rabai!**Rabai! — Nan Rabai wainggan ibi ‘Kidungwaga’. Anutu Narunggan agu! Garam Israil King gan agu!”

50 Yisu ini da arangan ini binaꞌ, “Dzi ni da agu sib ibi dzi tsanga agu mpa yaung gai fik warangꞌ; u ringant i nan arigi angu da u muaruts? Agu bungꞌ atsanga nam tsiraꞌ bingan nayus nigi.” 51 Da Arangan itip ini, “Dzi nani nan nidzun bingan da agam, agam bungꞌ atsanga gunungun dagangan da Anutu angira gan yaban da ruꞌan i Garam Narunggan.”